Mfano wa vikapu viwili vyenye kuyu.

¹Bwana alinionyesha, nikaona vikapu viwili vyenye kuyu, vilikuwa vimewekwa mbele ya Jumba la Bwana, Nebukadinesari, mfalme wa Babeli, alipokuwa amekwisha kumteka Yekonia, mwana wa Yoyakimu, mfalme wa Yuda, nao wakuu wa Yuda pamoja na mafundi wa seremala na wahunzi kuwatoa Yerusalemu na kuwapeleka Babeli.[#Yer. 29:2; 2 Fal. 24:14-15.]

²Kikapu kimoja kuyu zake zilikuwa nzuri kabisa, kama kuyu za malimbuko zilivyo; kikapu cha pili kuyu zake zilikuwa mbaya kabisa, hazikulika kwa ubaya wao.

³Bwana akaniuliza: Unaona nini, Yeremia? Nikamwambia: Kuyu; hizi kuyu nzuri ni nzuri kabisa, nazo hizi mbaya ni mbaya kabisa, haziliki kwa ubaya wao.[#Yer. 1:11,13.]

⁴Neno la Bwana likanijia kwamba:

⁵Hivi ndivyo, anavyosema Bwana Mungu wa Isiraeli: Kama hizi kuyu nzuri zinavyopendeza, ndivyo, nitakavyowatazama kwa kupendezwa Wayuda waliotekwa, niliowatuma kutoka mahali hapa kwenda katika nchi ya Wakasidi.

⁶Nitayaelekeza macho yangu, yawaangalie kwa kupendezwa nao, nitawarudisha katika nchi hii, nitawajenga, nisiwabomoe tena, nitawapanda, nisiwang'oe tena.[#Yer. 31:28.]

⁷Nitawapa mioyo ya kunijua, ya kuwa mimi ni Bwana, watakuwa ukoo wangu, nami nitakuwa Mungu wao, kwani watanigeukia kwa mioyo yote.[#Yer. 31:33-34.]

⁸Tena hivi navyo ndivyo, Bwana anavyosema: Kama zile kuyu zilivyo mbaya, zisilike kwa ubaya wao, ndivyo, nitakavyomtoa Sedekia, mfalme wa Yuda, na wakuu wake na masao ya Yerusalemu nao waliosalia katika nchi hii nao wakaao katika nchi ya Misri,[#Yer. 29:17.]

⁹nitawatoa, watupwe vibaya huko na huko katika nchi zote zenye wafalme huku ulimwenguni, watukanwe na kuzomelewa, wafyozwe na kuapizwa po pote, nitakapowatupa.[#Yer. 29:18.]

¹⁰Nitatuma kwao panga na njaa na magonjwa mabaya, mpaka watakapomalizika na kutoweka katika nchi, niliyowapa wao na baba zao.