Kufungwa na kufunguliwa kwake Yeremia.

¹*Katika mwanzo wa ufalme wa Yoyakimu, mwana wa Yosia, mfalme wa Yuda, ndipo, neno hili lilipotoka kwake Bwana kwamba:

²Hivi ndivyo, Bwana anavyosema: Simama uani pa Nyumba ya Bwana, nao watu wa miji yote watakaopaingia kutambika Nyumbani mwa Bwana uwaambie maneno yote, niliyokuagiza kuwaambia, usipunguze hata neno moja.

³Labda watasikia, warudi kila mmoja katika njia yake mbaya, nipate kugeuza moyo kwa ajili ya mabaya, niliyoyawaza kuwafanyizia kwa matendo yao mabaya.[#Yer. 36:3.]

⁴Nawe utawaambia: Hivi ndivyo, Bwana anavyosema: Msiponisikia, msipoendelea kuyashika Maonyo yangu, niliyowapa ninyi, yawe machoni penu,

⁵msipoyashika maneno ya wafumbuaji walio watumishi wangu, mimi ninaowatuma kwenu pasipo kuchoka kila kunapokucha, msipowasikia,[#Yer. 25:4.]

⁶nitaigeuza Nyumba hii kuwa kama Silo, nao mji huu nitautoa, uapizwe na mataifa yote yaliyoko ulimwenguni.[#Yer. 7:12-14; 1 Sam. 4:4,12.]

⁷Watambikaji na wafumbuaji na watu wote wa ukoo huu wakamsikia Yeremia, alipoyasema maneno haya katika Nyumba ya Bwana.

⁸Yeremia alipokwisha kuyasema yote, Bwana aliyomwagiza kuwaambia watu wote wa ukoo huu, ndipo, watambikaji na wafumbuaji na watu wote wa ukoo huu walipomkamata wakisema: Sharti ufe kabisa!

⁹Mbona umetufumbulia katika Jina la Bwana kwamba: Nyumba hii itakuwa kama Silo, nao mji huu utakuwa mavunjiko, usikae mtu? Kisha watu wote wa ukoo huu wakamkusanyikia Yeremia katika Nyumba ya Bwana.

¹⁰Wakuu wa Yuda walipoyasikia maneno haya wakatoka nyumbani mwa mfalme, wakapanda kwenda katika Nyumba ya Bwana, wakakaa kwenye mlango mpya wa Bwana.

¹¹Watambikaji na wafumbuaji wakawaambia wakuu na watu wote wa ukoo huu, wakasema: Mtu huyu anapaswa na hukumu ya kuuawa, kwani mji huu ameufumbulia maneno, kama mlivyosikia ma masikio yenu.[#Tume. 6:13.]

¹²Yeremia akawaambia wakuu wote na watu wote wa ukoo huu, akasema: Bwana amenituma kuyafumbua hayo maneno yote yatakayoijia Nyumba hii na mji huu, mliyoyasikia.

¹³Sasa fanyeni mwenendo mwema na matendo mema mkiisikia sauti ya Bwana Mungu wenu! Ndipo, Bwana atakapogeuza moyo, asiwafanyizie hayo mabaya, aliyoyasema![#Yer. 7:3.]

¹⁴Lakini mimi nitazameni! Nimo mikononi mwenu; nifanyizieni, mliyoyaona na macho yenu kuwa mema yanyokayo!

¹⁵Lakini jueni hili kabisa: Ninyi mtakaponiua mtafanya, damu ya mtu asiyekosa iwajie ninyi na mji huu nao wakaao humu! Kwani Bwana amenituma kweli kwenu kuyasema maneno haya masikioni penu.*

¹⁶Ndipo, wakuu na watu wote wa ukoo huu walipowaambia watambikaji na wafumbuaji: Mtu huyu hapaswi na hukumu ya kuuawa, kwani amesema na sisi katika Jina la Bwana.

¹⁷Kulikuwa na wazee wa nchi hii, wakainuka, wakauambia mkutano wote wa watu wa ukoo huu, wakasema:

¹⁸Mika wa Moreseti alikuwa mfumbuaji siku za Hizikiya, mfalme wa Yuda, akawaambia watu wote wa Yuda kwamba: Hivi ndivyo, Bwana Mwenye vikosi anavyosema: Sioni utalimwa kuwa shamba, nao Yerusalemu utageuka kuwa machungu ya mavunjiko, nao mlima wa Nyumba ya Bwana utakuwa kilima chenye mwitu.[#Mika 3:12.]

¹⁹Je? Hizikiya, mfalme wa Yuda, nao Wayuda wote walimwua? Hakumcha Bwana na kuutuliza uso wake Bwana? Naye Bwana akageuza moyo, asiwafanyizie hayo mabaya, aliyowaambia. Na sisi tufanye kibaya kilicho kikuu kama hicho, tuzikoseshe roho zetu?[#Yer. 18:8.]

Mfumbuaji Uria anauawa.

²⁰Kulikuwa na mtu mwingine aliyefumbua katika Jina la Bwana, ni Uria, mwana wa Semaya wa mji wa Kiriati-Yearimu. Naye akayafumbua yote yatakayoujia mji huu na nchi hii sawasawa kama Yeremia.

²¹Mfalme Yoyakimu na watu wake wote wa vita na wakuu wote walipoyasikia maneno yake, mfalme akatafuta, jinsi atakavyomwua. Uria alipoyasikia, akaogopa, akakimbia kwenda Misri.

²²Mfalme Yoyakimu akatuma watu kwenda Misri; ni Elnatani, mwana wa Akibori, na watu wengine waliokwenda naye Misri.

²³Wakamtoa Uria huko Misri, wakampeleka kwake mfalme Yoyakimu, akampiga kwa upanga, mzoga wake akautupa kwenye makaburi yao waliokuwa wa ukoo huu.

²⁴Lakini Ahikamu, mwana wa Safani, alimshika Yeremia kwa mkono wake, asitiwe mikononi mwa watu wamwue.[#2 Fal. 22:12.]