Wokovu wa Isiraeli na wa Yuda.

¹Hili ndilo neno lililomjia Yeremia likitoka kwa Bwana kwamba:

²Hivi ndivyo, Bwana Mungu wa Isiraeli anavyosema kwamba: Yaandike hayo maneno yote, niliyokuambia katika kitabu!

³Kwani ndivyo, asemavyo Bwana: Tazama! Siku zitakuja, nitakapoyafungua mafungo yao walio ukoo wangu wa Isiraeli na wa Yuda, niwarudishe katika ile nchi, niliyowapa baba zao, nayo itakuwa yao tena; ndivyo, Bwana anavyosema.[#Yer. 29:14.]

⁴Haya ndiyo maneno, Bwana aliyoyasema kwa ajili ya Isiraeli na ya Yuda,

⁵kwani hivi ndivyo, Bwana anavyosema: Tumesikia sauti ya kustusha na kushangaza, hakuna penye utengemano.

⁶Ulizeni, mwone, kama yuko mwanamume atakayezaa! Mbona nimewaona waume wote wakitia mikono yao viunoni pao kama mwanamke anayetaka kuzaa? Mbona nyuso zote zimegeuka, zikachujuka?[#Yes. 13:8.]

⁷Kumbe siku hiyo ni kubwa, hakuna ifananayo nayo; ndipo, Yakobo anaposongeka, lakini napo atapatoka, aokoke.[#Yoe. 2:11; Sef. 1:15.]

⁸Ndivyo, asemavyo Bwana Mwenye vikosi: Itakuwa siku ile, nitakapoyavunja makongwa shingoni pako na kuyararua mafungo yako, wageni wasiwatumikishe tena.[#Yer. 27:12.]

⁹Ila watamtumikia Bwana Mungu wao na Dawidi, mfalme wao, nitakayemwinua kwao.[#Yer. 23:5; Ez. 34:23.]

¹⁰Ndivyo, asemavyo Bwana: Nawe, mtumishi wangu Yakobo, usiogope, wala usistuke, Isiraeli! Kwani utaniona, nikikuokoa na kukutoa katika nchi za mbali, nacho kizazi chako nitakitoa katika nchi, walikofungiwa. Yakobo atarudi, atatulia pasipo kusumbuliwa, kwani hakuna atakayemhangaisha.[#Yer. 46:27; Yes. 44:2.]

¹¹Kwani mimi niko pamoja na wewe nikuokoe; ndivyo, asemavyo Bwana. Kwani nitayamaliza mataifa yote, ambayo nimekutawanya kwao, wewe peke yako sitakumaliza, nitakuchapa tu, kama yakupasavyo, nisikuache pasipo patilizo lo lote.[#Yer. 10:24.]

¹²Kwani hivi ndivyo, Bwana anavyosema: Kidonda chako hakiwezekani, pigo lako haliponi.[#Yer. 15:18.]

¹³Hakuna akupigiaye shauri, alitoe jipu lako usaha; hakuna dawa ya kubandika, ikuponye.

¹⁴Wote waliokupenda wamekusahau, hawakuulizi tena, kwani nimekupiga, kama ninavyopiga mchukivu, nimekuchapa pasipo huruma, kwa kuwa ulifanya maovu mengi, kweli makosa yako ni makali.

¹⁵Mbona unakililia kidonda chako, ya kuwa maumivu yako hayawezekani? Nimekufanyizia hayo, kwa kuwa ulifanya maovu mengi, nayo makosa yako ni makali.

¹⁶Kweli wote waliokula wewe wataliwa, nao wote waliokusonga watakwenda kufungwa; waliokunyang'anya nao watanyang'anywa, nao wote waliopokonya mali zako nitawatoa, wapokonywe nao mali zao.[#Yes. 33:1.]

¹⁷Kwani ndivyo, asemavyo Bwana: Nitakupatia uzima tena, hata vidonda vyako nitaviponya, kwa kuwa wewe Sioni wamekuita Mfukuzwa kwa kwamba: Hakuna anayemwuliza.[#Yes. 33:6.]

¹⁸Hivi ndivyo, Bwana anavyosema: Mtaniona, nikiyafungua mafungo ya mahema yake Yakobo, nikiyahurumia makao yake; nao mji utajengwa tena juu ya chungu zake, hata jumba kuu litakaa, kama yalipasavyo.[#Yer. 30:3.]

¹⁹Namo mwao zitatoka nyimbo za kushukuru na sauti zao wachekao; nami nitawapa kuwa wengi, wasiwe wachache, nitawapa utukufu, wasibezwe.

²⁰Nao watoto wao watakuwa kama kale; nalo kundi lao la watu litapata nguvu usoni pangu, nao wote waliowakorofisha nitawapatiliza.

²¹Mkuu wao atakuwa mtu wa kwao; atakayewatawala atatoka katikati yao; nami nitamfikisha, anijie karibu, kwani yuko nani ajipaye moyo wa kunijia mwenyewe? ndivyo, asemavyo Bwana.[#Yer. 30:9.]

²²Nanyi mtakuwa ukoo wangu, nami nitakuwa Mungu wenu.[#Yer. 24:7.]

²³Mtakiona kimbunga cha Bwana, hata makaa yenye moto yakitoka kwake, nao upepo wa chamchela wenye nguvu utawaangukia vichwani wao wasiomcha Mungu.[#Yer. 23:19.]

²⁴Ukali wake Bwana wenye moto hautatulia, mpaka uyafanye na kuyatimiza mawazo ya moyo wake; siku za mwisho mtayatambua haya.