Kutii kwao Warekabu na kubisha kwao Wayuda.

¹Hili ndilo neno lililomjia Yeremia likitoka kwa Bwana siku za Yoyakimu, mwana wa Yosia, mfalme wa Yuda, kwamba:[#1 Mambo 2:55.]

²Nenda nyumbani mwao Warekabu kusema nao, uwapeleke Nyumbani mwa Bwana katika ukumbi mmoja, uwape mvinyo, wanywe.

³Nikamchukua Yazania, mwana wa Yeremia, mwana wa Habasinia, pamoja na ndugu zake na wanawe wote nao wote walio wa mlango wa Warekabu.

⁴Nikawapeleka Nyumbani mwa Bwana katika ukumbi wa wana wa Hanani, mwana wa Igidalia, aliyekuwa mtu wa Mungu. Nao ukumbi huo ulikuwa kando ya ukumbi wa wakuu uliokuwa juu ya ukumbi wa Masea, mwana wa Salumu, aliyekuwa mlinda kizingiti.

⁵Kisha nikaweka mbele yao walio wa mlango wa Warekabu mitungi iliyojaa mvinyo na vikombe, nikawaambia: Nyweni mvinyo!

⁶Wakajibu: Hatunywi mvinyo, kwani Yonadabu, mwana wa baba yetu Rekabu, alituagiza kwamba: Msinywe mvinyo ninyi na wana wenu kale na kale![#2 Fal. 10:15,23.]

⁷Wala msijenge nyumba, wala msimwage mbegu, wala msipande mizabibu, wala msiwe nayo! Ila mkae mahemani siku zenu zote, mpate kuwapo siku nyingi huku nchini, mliko wageni ninyi.

⁸Tukaisikia sauti ya Yonadabu, mwana wa baba yetu Rekabu, katika mambo yote, aliyotuagiza, tusinywe mvinyo sisi wala wake zetu wala wana wetu wa kiume na wa kike:

⁹hatujengi nyumba za kukaa humo, wala mizabibu wala mashamba wala mbegu hatunazo.

¹⁰Tunakaa mahemani, kwani tumeyasikia, tukayafanya yote, kama baba yetu Yonadabu alivyotuagiza.

¹¹Ikawa, Nebukadinesari, mfalme wa Babeli, alipopanda katika nchi hii, ndipo, tuliposema: Haya! Na tuje kwenda Yerusalemu na kuvikimbia vikosi vya Wakasidi na vya Washami! Basi, tukakaa Yerusalemu.

¹²Neno la Bwana likamjia Yeremia kwamba:

¹³Hivi ndivyo, Bwana Mungu wa Isiraeli anavyosema: Nenda kuwaambia watu wa Yuda nao wakaao Yerusalemu: Je? Hamtaki kuonyeka, myasikie maneno yangu? Ndivyo, asemavyo Bwana:

¹⁴Maneno yake Yonadabu, mwana wa Rekabu, aliyowaagiza wanawe, wasinywe mvinyo, yametimizwa nao: hawanywi mvinyo hata siku hii ya leo, kwani wamelisikia agizo la baba yao. Mimi nami nimesema nanyi pasipo kuchoka kila kulipokucha, lakini hamkunisikia.

¹⁵Nikatuma kwenu watumishi wangu wote walio wafumbuaji pasipo kuchoka kila kulipokucha kwamba: Rudini kila mtu katika njia yake mbaya na kufanya matendo mema! Msifuate miungu mingine kuitumikia! Ndipo, mtakaporudi katika nchi, niliyowapa baba zenu! Lakini hamkuyatega masikio yenu, wala hamkunisikia.[#Yer. 25:4-7.]

¹⁶Kweli, wana wa Yonadabu, mwana wa Rekabu, wamelitimiza agizo la baba yao, alilowaagiza; lakini wao wa ukoo huu hawanisikii.

¹⁷Kweli, hivi ndivyo, Bwana Mungu Mwenye vikosi, Mungu wa Isiraeli, anavyosema: Mtaona, nikiwaletea Wayuda nao wakaao Yerusalemu yale mabaya yote, niliyoyasema ya kuwafanyizia, kwa kuwa niliposema nao, hawakunisikia, nilipowaita, hawakujibu.[#Yer. 7:13.]

¹⁸Nao walio wa mlango wa Rekabu Yeremia akawaambia: Hivi ndivyo, Bwana Mwenye vikosi, Mungu wa Isiraeli, anavyosema: Kwa kuwa mmelisikia agizo la baba yenu Yonadabu, mkayashika maagizo yake yote, mkayafanya yote, kama alivyowaagiza,

¹⁹kwa hiyo ndivyo, Bwana Mwenye vikosi, Mungu wa Isiraeli, anavyosema: Hatakoseka mtu wa Yonadabu, mwana wa Rekabu, atakayesimama usoni pangu siku zote.