Watakapojuta, Bwana atawapokea.

¹Ndivyo, asemavyo Bwana: Kama utarudi, Isiraeli, rudi kwangu! Kama utayaondoa matapisho yako machoni pangu, hutafukuzwa.

²Ndipo, utakapoapa na kumtaja Bwana kwa kweli na kwa unyofu na kwa wongofu. Nao wamizimu watajiombea mema kwake pamoja na kumshangilia.[#Yer. 12:16; Yes. 65:16.]

³Kwani hivyo Bwana aliwaambia waume wa Yuda nao wakaao Yerusalemu: Jilimieni shamba jipya, msipande miibani![#Hos. 10:12.]

⁴Jitahirini, mwe wake Bwana, mkiyaondoa magovi ya mioyo yenu, ninyi waume wa Yuda nanyi mkaao Yerusalemu, kwamba: Makali yangu yasitokee yakiteketeza kama moto, watu wakishindwa kuzima, kwa ajili ya mabaya ya matendo yenu![#Yer. 9:26; 5 Mose 10:16.]

Vita vitaiangamiza nchi ya Yuda.

⁵Tangazeni katika nchi ya Yuda! Namo Yerusalemu watu na wasikie, mkisema! Pigeni baragumu katika nchi! Pazeni sauti kwa nguvu kabisa mkitangaza kwamba: Kusanyikeni, tuingie katika miji yenye maboma!

⁶Twekeni bendera, ielekee Sioni! Jihimizeni kukimbia, msisimame! Kwani mimi ninaleta mabaya kutoka upande wa kaskazini, hata mavunjiko mengi.[#Yer. 1:14.]

⁷Simba ametoka mwituni kwake kupanda kwetu, mwenye kuangamiza mataifa ameondoka, akatoka mahali pake, aigeuze nchi yako kuwa mapori, miji yako iwe mabomoko tu.

⁸Kwa hiyo jifungeni magunia! Ombolezeni na kulia! Kwani moto wa makali yake Bwana hautaondoka kwetu.

⁹Ndivyo, asemavyo Bwana: Itakuwa, siku ile moyo wa mfalme utapotea pamoja na mioyo ya wakuu wake, nao watambikaji watastuka, hata wafumbuaji watapigwa na bumbuazi.

¹⁰Nikasema: E Bwana Mungu! Kweli umewapoteza watu wa ukoo huu nao Wayerusalemu ulipowaambia: Mtakaa na kutengemana! Kumbe sasa upanga umewafikia rohoni![#Yer. 6:14.]

¹¹Siku zile watu wa ukoo huu nao Wayerusalemu wataambiwa: Upepo uchomao moto umetoka vilimani nyikani, ukaja kuwavumia wazaliwa wa ukoo wangu, sio wa kupunga wala wa kupepeta.

¹²Ni upepo mkali zaidi, hauiwezi kazi hiyo, ukanijia; sasa mimi nitasema nao yawapasayo, yawapate.

¹³Tazameni, anapanda kama mawingu, magari yake ni kama kimbunga, farasi wake wanakwenda mbiombio kuliko tai. A, tumekwisha kupatwa, tunaangamia.

¹⁴Ifueni mioyo yenu, Wayerusalemu, ubaya uitoke, mpate kuokolewa! Mawazo yako maovu yatakaa mpaka lini ndani yako?[#Yes. 1:16.]

¹⁵Kwani inasikilika sauti ya mtangazaji atokaye nchi ya Dani, tena mwingine anapiga mbiu ya maovu atokaye milimani kwa Efuraimu kwamba:

¹⁶Yakumbusheni mataifa, yaipige mbiu hii kuifikisha Yerusalemu kwamba: Wenye kuvizia wanakuja, wanatoka nchi ya mbali, waipigie miji ya Yuda makelele yao ya vita.

¹⁷Wanajisimamisha kama walinzi wa shamba wakiuzunguka mji, kwani umenibishia; ndivyo, asemavyo Bwana.[#Yer. 1:15; 6:3.]

¹⁸Mwenendo wako na matendo yako yamekupatia haya; ubaya wako ndio unaokuletea huu uchungu, unakuchoma rohoni mwako.

Masikitiko ya mfumbuaji.

¹⁹Tumboni mwangu, tumboni mwangu ndimo, ninamoona machungu, hata mwenye maganda ya moyo wangu, maana moyo wangu umenichafuka sana, siwezi kunyamaza, kwani nimesikia sauti ya baragumu rohoni mwangu na makelele ya mapigano.[#Yes. 16:9.]

²⁰Inatangazwa, jinsi mavunjiko yanavyofuata mavunjiko mengine, nchi yote nzima imeharibika, mara navyo vituo vyangu vimeharibiwa pamoja na mahema yangu kwa kitambo kimoja tu.

²¹Mpaka lini nitaiona bendera? Mpaka lini nitaisikia sauti ya baragumu?

²²Kwani walio ukoo wangu ni wapumbavu; mimi hawakunijua kwa kuwa watoto wenye ujinga wasiotambua kitu; kweli ndio wajuzi wa kufanya mabaya, lakini kufanya mema hawajui kabisa.

²³Nilipoitazama nchi, nikaiona kuwa peke yake tu pasipo kitu cho chote; nikazitazama mbingu nazo, lakini nako hakuna mwanga.

²⁴Nikaitazama milima nayo, nikaiona, inavyotukutika, hata vilima vyote vikatikisika.

²⁵Nikatazama, nikaona ya kuwa hakuna mtu, hata ndege wote wa angani walikuwa wamekimbia.

²⁶Nikatazama, nikaona, ya kuwa mashamba yenye matunda ni nyika, nayo miji yao yote ilikuwa imebomolewa, Bwana asiione tena kwa kuwa na makali yenye moto.

²⁷Kwani Bwana alisema hivyo: Nchi yote nzima itakuwa jangwa, lakini sitaimaliza kabisa.[#Yer. 5:10,18.]

²⁸Kwa sababu hii nchi inaomboleza, nazo mbingu huko juu zinajivika weusi; kwa sababu nimeyasema niliyoyawaza moyoni, sitajuta, wala sitarudi na kuyaacha.

²⁹Kwa makelele yao wapanda farasi na wenye kuvuta pindi watu wote waliomo mijini wamekimbia, wakaingia machakani, wakapanda magengeni, miji yote ikaachwa, hakuna mtu anayekaa humo.

³⁰Nawe ukiharibiwa hivyo utafanyaje? Ijapo uvae nguo nyekundu za kifalme, ujipambe mapambo ya dhahabu, hata utie wanja machoni pako, huo uzuri wako utakuwa wa bure, wapenzi wako watakubeza, tamaa zao ni kukuua tu.

³¹Nimesikia sauti kama ya mwanamke mwenye kuzaa aonaye uchungu zaidi kwa kuzaa mara ya kwanza, ni sauti ya binti Sioni, akipiga kite na kuikunjua mikono yake kwamba: A, yamenipata! Roho yangu inazimia mbele yao wauao.