Mapatilizo ya nchi ya Misri.

¹Hili ndilo neno la Bwana lililomjia mfumbuaji Yeremia kwa ajili ya wamizimu.

²Yatakayowapata Wamisri. Kwa ajili ya vikosi vya Farao Neko, mfalme wa Misri, vilivyokuwa Karkemisi penye mto wa Furati, vilipopigwa na Nebukadinesari, mfalme wa Babeli, katika mwaka wa nne wa Yoyakimu, mwana wa Yosia, mfalme wa Yuda, anasema:[#2 Mambo 35:20; Yes. 19; Ez. 29—30.]

³Tengenezeni ngao ndogo na kubwa, mwende vitani!

⁴Watandikeni farasi, wapandeni, ninyi wapanda farasi! Jipangeni, wenye kofia za chuma vichwani! Inoeni mikuki, kisha zivaeni shati za chuma!

⁵Mbona ninawaona hawa, wakirudi nyuma kwa kustuka? Mbona wanguvu wao wamepondeka, wakakimbia sana pasipo kugeuka? Matisho po pote! ndivyo, asemavyo Bwana.

⁶Lakini naye mwenye miguu miepesi hatakimbia, wala mwenye nguvu hatapona. Upande wa kaskazini kando ya mto wa Furati wamejikwaa, wakaanguka.

⁷Alikuwa nani aliyepanda kama mto wa Nili, maji yake yakajirusha kama ya mito mikubwa?

⁸Mmisri alipanda kama mto wa Nili, maji yakajirusha kama ya mito mikubwa, akasema: Nitapanda kuifunikiza nchi, niangamize mji nao wakaao humo!

⁹Pandeni, ninyi farasi! Pigeni mbio kama wenye wazimu, ninyi magari! Wapiga vita na watokee, wale Wanubi na Waputi washikao ngao na Waludi washikao pindi, wajuao kuzivuta!

¹⁰Siku hii ni yake Bwana Mungu Mwenye vikosi, ni siku ya lipizi ya kuwalipiza wapingani wake, panga zitakula, zishibe, mpaka zilewe kwa damu zao, kwani wao ndio kama ng'ombe za kumtambikia Bwana Mungu Mwenye vikosi katika nchi ya upande wa kaskazini kwenye mto wa Furati.[#5 Mose 32:42; Yes. 34:5.]

¹¹Pandeni Gileadi kuchukua mafuta ya kwaju, ninyi wanawali mliozaliwa Misri! Ni bure, ukitumia dawa nyingi, hakuna itakayokuponya.[#Yer. 8:22.]

¹²Mataifa yameyasikia yakutiayo soni, vilio vyako vimeijaza nchi. Kwani mpiga vita amejikwaa kwa mpiga vita mwenziwe, wakaanguka wote wawili pamoja.

¹³Hili ndilo neno, Bwana alilomwambia mfumbuaji Yeremia, Nebukadinesari, mfalme wa Babeli, alipokuja kuipiga nchi ya Misri:

¹⁴Pigeni mbiu huko Misri na kuitangaza Migidoli! Tena itangazeni Nofu na Tahapanesi kwamba: Jipangeni na kujitengeneza! Kwani panga zimewala waliokuzunguka.

¹⁵Mbona watukufu wako wamelazwa chini? Hawakusimama, kwani Bwana aliwakumba;

¹⁶akakwaza wengi, wakaangukiana mtu na mwenziwe wakiambiana: Inuka, turudi kwetu kwa wenzetu wa ukoo katika nchi, tulikozaliwa, tuzikimbie panga za wanguvu!

¹⁷Ndiko, walikomwita Farao, mfalme wa Misri: Angamio, ameikosa siku yake ya kupona!

¹⁸Ndivyo, asemavyo Mfalme, Jina lake Bwana Mwenye vikosi: Hivyo, nilivyo Mwenye uzima, atakuja afananaye na Tabori ulio mkuu wa kuipita milima mingine au na Karmeli huko pwani.

¹⁹Jifanyizieni vyombo vya kwenda navyo mkitekwa, ninyi wanawali mkaao Misri! Kwani Nofu utakuwa mahame tu kwa kuteketea, msikae mtu.

²⁰Misri ni mori mzuri mno, lakini mbung'o anakuja upesi toka kaskazini.

²¹Nao warugaruga wao waliokuwa kwao kama ndama wenye manono, hao nao wamegeuka, wakakimbia wote pamoja, hawakusimama, kwani siku ya kuangamia kwao iliwafikia, ndio wakati wa kupatilizwa kwao.

²²Mashindo yao yakawa kama ya nyoka akikimbia, kwani wale wanakuja na vikosi vyao, wanawajia wakishika mashoka kama wakata kuni.

²³Ndivyo, asemavyo Bwana: Wataikata misitu yao isiyochunguzika, kwani ni wengi kuliko nzige, hawahesabiki.

²⁴Wanawali wa Misri, wamepatwa na soni kwa kutiwa mikononi mwa watu waliotoka kaskazini.

²⁵Bwana Mwenye vikosi, Mungu wa Isiraeli, anasema: Mtaniona, ninavyompatiliza Amoni wa No naye Farao na nchi yake ya Misri hata miungu yake na wafalme wake; nitampatiliza Farao kweli nao wote wamwegemeao.[#Yer. 43:12.]

²⁶Nitawatia mikononi mwao wanaozitafuta roho zao, namo mikononi mwa Nebukadinesari, mfalme wa Babeli, namo mikononi mwa watumishi wake. Lakini hayo yatakapokwisha, nchi itakaa watu kama siku za kale; ndivyo, asemavyo Bwana.

Waisiraeli wanatulizwa mioyo.

²⁷Wewe mtumishi wangu Yakobo, usiogope! Nawe Isiraeli, usistuke! Kwani utaniona, nikikuokoa na kukutoa huko mbali, nao walio kizazi chako nitawatoa katika ile nchi, walikopelekwa kwa kutekwa. Yakobo atarudi, akae na kutulia pasipo kuhangaika, kwani hakuna atakayemstusha.[#Yer. 30:10; Yes. 44:2.]

²⁸Ndivyo, asemavyo Bwana: Wewe ntumishi wangu Yakobo, usiogope! Kwani mimi niko pamoja na wewe, kwani nitayamaliza mataifa yote, ambayo nimekutupa kwao, lakini wewe sitakumaliza, nitakuchapa tu, kama yakupasavyo, nisikuache pasipo patilizo lo lote.[#Yer. 30:11.]