Mapatilizo ya Wamoabu.

¹Yatakayowapata Wamoabu. Hivi ndivyo, Bwana Mwenye vikosi, Mungu wa Isiraeli, anavyosema: Nebo yameupata, kwani umebomolewa! Kiriatemu umepatwa na soni kwa kutekwa, kweli boma lake lililokuwa mlimani limepatwa na soni kwa kustuka.

²Hakuna tena utukufu wa Moabu; mle Hesiboni wanawawazia mabaya kwamba: Twende, tuwang'oe, wasiwe kabila! Nawe Madimeni, utanyamazishwa, panga zitakufuata nyuma.

³Toka Horonemu kunasikilika makelele, maangamizo na mavunjiko ni makubwa.

⁴Wamoabu wamevunjika, vilio vinasikilika hata Soari.

⁵Kwani njia ya kupandia Luhiti wanaipanda na kulia, hata katika njia ya kutelemkia toka Horonemu kunasikilika yowe zao wasongekao kwa ajili ya mavunjiko kwamba:

⁶Kimbieni! Ziponyeni roho zenu! Mwe kama mti wa nyikani usio na majani![#Yer. 17:6.]

⁷Kwa kuwa unayaegemea matendo yako na vilimbiko vyako, wewe nawe utatekwa, naye Kemosi hana budi kwenda kuhamishwa pamoja na watambikaji wake na wakuu wake.[#1 Fal. 11:7.]

⁸Mwangamizaji ataujia kila mji, hakuna mji utakaopona, penye bonde pataangamia, napo penye mbuga pataharibika, kama Bwana alivyosema.

⁹Wapeni Wamoabu mabawa, watoke na kuruka! Kwani miji yao itakuwa mapori, msikae mtu.

¹⁰Ameapizwa afanyaye kazi ya Bwana na kulegea! Ameapizwa auzuiaye upanga, usiue![#1 Sam. 15:3,9,11.]

¹¹Wamoabu walikaa pasipo kuhangaishwa tangu ujana wao, wakatulia penye mvinyo zao zenye shimbi, hawazitoi chomboni na kumimina katika kingine, wala hawajakwenda kuhamishwa; kwa hiyo yapendezayo vinywa vyao kuyala ni yaleyale, nayo yapendezayo pua zao kuyanusa hayakugeuka.

¹²Ndivyo, asemavyo Bwana: Kwa hiyo wataona, siku zikija, nitakapotuma kwao mafundi wa mvinyo, watavipindua vyombo vyao na kuzimwaga mvinyo zilizomo, kisha wataivunja hiyo mitungi yao.

¹³Ndipo, Wamoabu watakapoona soni kwa ajili ya Kemosi, kama walio wa mlango wa Isiraeli walivyoona soni kwa ajili ya Beteli mlimokuwa na egemeo lao.

¹⁴Mwasemaje: Sisi tu wenye nguvu, tu mafundi wa kupiga vita?

¹⁵Wamoabu wataangamia, miji yao itapandiwa, nao vijana wao waliochaguliwa watakuwa hawana budi kutelemka, wauawe; ndivyo, asemavyo Mfalme, Jina lake ni Bwana Mwenye vikosi.

¹⁶Angamio lao Wamoabu liko karibu, mabaya yao yanakuja upesi sana.

¹⁷Nyote mkaao na kuwazunguka waombolezeeni pamoja nao wote walijuao jina lao! Semeni: Kumbe fimbo yenye nguvu imevunjika! Nayo ilikuwa bakora yenye utukufu!

¹⁸Ondokeni penye utukufu, mkae mchangani penye ugumu, ninyi wanawali mkaao Diboni! Kwani mwenye kuwaangamiza Wamoabu anapanda kufika kwako, ayabomoe maboma yako!

¹⁹Ninyi mkaao Aroeri, simameni njiani na kupeleleza mkiwauliza watoro walioepuka, mkisema: Kumetendeka nini?

²⁰Wamoabu wamepatwa na soni kwa kuvunjika; lieni na kupaza sauti: Yatangazeni kwenye Arnoni, ya kuwa Wamoabu wameangamia!

²¹Mapatilizo yameijia nchi yenye mbuga huko Holoni na Yasa na Mefati,

²²na Diboni na Nebo na Beti-Dibulatemu,

²³na Kiriatemu na Beti-Gamuli na Beti-Meoni,

²⁴na Kirioti na Bosira na miji yote ya nchi ya Moabu iliyoko mbali, nayo iliyoko karibu.

²⁵Pembe ya Moabu imekatwa, nao mkono wake umevunjwa; ndivyo, asemavyo Bwana.

²⁶Walevyeni! Kwani wamejikuza kuliko Bwana; na waanguke kifudifudi katika matapiko yao, wachekwe nao hao![#Yer. 25:15.]

²⁷Au Waisiraeli hawakuchekwa kwenu? Je? Walionwa kwenye wezi, mkiwatingishia vichwa kila mlipowataja?

²⁸Ninyi mkaao Moabu, tokeni mijini, mkae magengeni, mwe kama hua wanaojenga matundu yao juu penye miamba iliyokatika.

²⁹Tumesikia, ya kuwa Wamoabu walijivuna sanasana, wakajikuza kwa kujivuna kwao, kwa kiburi chao wakawaza makuu mioyoni mwao.

³⁰Ndivyo, asemavyo Bwana: Mimi nimeyajua makorofi yao, ya kuwa hayana maana, nayo maneno yao makuu, ya kuwa hawakuyafanya.

³¹Kwa hiyo ninawalilia Wamoabu, ninawapigia Wamoabu wote makelele; wengine wanawapigia kite watu wa Kiri-Heresi.

³²Kuliko Yazeri ninawalilia ninyi mizabibu ya Sibuma, matawi yenu yaliendelea kufika baharini, yalifika kweli kwenye bahari ya Yazeri; siku za kiangazi walipochuma zabibu zenu, mara mwangamizaji akaja.

³³Ndipo, shangwe za furaha zilipotoweka Karmeli na katika nchi ya Moabu. Nayo mvinyo iliyokuwa kamulioni nikaikomesha, hawakamui tena kwa kupiga shangwe; shangwe zao sizo shangwe tena.

³⁴Toka Hesiboni wanapiga makelele, hata Elale na Yasa wanapaza sauti zao, tena toka Soari hata Horonemu na Eglati-Selisia hulia, ya kuwa nayo maji ya Nimurimu yatakuwa yamekauka.

³⁵Ndivyo, asemavyo Bwana: Nitawakomesha Wamoabu, wasipande vilimani kuivukizia miungu yao.

³⁶Kwa hiyo moyo wangu unawapigia Wamoabu kite na kuvuma kama zomari, nao watu wa Kiri-Heresi moyo wangu unawapigia kite na kuvuma kama zomari, kwa kuwa mapato waliyojipatia yamepotea.[#Yer. 4:19; Yes. 15:7; 16:11.]

³⁷Kwani vichwa vyote vitakuwa vyenye vipara, nazo ndevu zote zitakuwa zimenyolewa, nayo mikono yote itakuwa yenye chale, navyo viuno vyote vitakuwa na magunia.[#Yer. 47:5.]

³⁸Po pote vipaani katika nchi ya Moabu napo barabarani po pote patakuwa na maombolezo, kwani nitawavunja Wamoabu, kama ni chombo kisichopendeza; ndivyo, asemavyo Bwana.

³⁹Kumbe wamevunjika! Pigeni vilio! Kumbe Wamoabu wamezigeuza kosi zao kwa soni! Tangu hapo Wamoabu watakuwa kicheko na kitisho kwao wote wakaao na kuwazunguka.

⁴⁰Kwani hivi ndivyo, Bwana anavyosema: Tazameni, anawarukia Wamoabu kama kozi na kuwakunjulia mabawa yake.[#Yer. 49:22.]

⁴¹Kirioti umetekwa, nayo miji yenye maboma imechukuliwa; kwa hiyo mioyo ya wapiga vita wa Moabu itakuwa siku ile kama moyo wa mwanamke anayetaka kuzaa.

⁴²Wamoabu wataangamizwa, wasiwe taifa tena, kwa kuwa wamejikuza kuliko Mungu.

⁴³Mastuko na miina na matanzi yatawapata ninyi mkaao Moabu; ndivyo, asemavyo Bwana.

⁴⁴Ayakimbiaye mastuko ataanguka mwinani; atokaye mwinani atakamatwa na tanzi; haya yatakuwa hapo, nitakapowatimilizia hao Wamoabu mwaka wa mapatilizo yao; ndivyo, asemavyo Bwana.[#Yes. 24:17-18.]

⁴⁵Watoro wakisimama kivulini kwenye Hesiboni kwa kuishiwa nguvu, moto utatoka Hesiboni namo Sihoni kati, moto uwakao sana utatoka, utavila vipanja vya Wamoabu nazo tosi zao wapigao vita.[#4 Mose 21:28-29.]

⁴⁶Yatawapata, ninyi Wamoabu! Ukoo wake Kemosi utaangamia! Kwani wanao wa kiume watachukuliwa kwenda utumwani, nao wanao wa kike watakwenda kuwa vijakazi.

⁴⁷Kisha nitayafungua mafungo ya Moabu, siku zitakapotimia; ndivyo, asemavyo Bwana.

Mpaka hapa ni hukumu za Moabu.