Adui wakali watakuja.

¹Jihimizeni kukimbia, ninyi wana wa Benyamini, mtoke Yerusalemu! Namo Tekoa pigeni baragumu! Nako kwenye Beti-Keremu twekeni bendera, kwani toka kaskazini yanakuja mabaya yanayotisha na mavunjiko yaliyo makuu.[#Yer. 4:6.]

²Binti Sioni aliye mzuri aliyejizoeza mororo nitamwangamiza.

³Watakuja kwake wachungaji na makundi yao, watapiga mahema kwake na kumzinga, walishe kila mmoja fungu lake wakisema: Jitakaseni, mpigane nao![#Yer. 4:17.]

⁴Inukeni, tupapandie, jua lingaliko juu! A, tumechelewa sisi! Jua linataka kuchwa, vivuli vya jioni vinajivuta.

⁵Inukeni! Tupande na usiku, tuyaharibu majumba yake![#Yer. 5:1.]

⁶Kwani ndivyo, Bwana Mwenye vikosi anavyosema: Kateni miti, kisha mwifukie kuwa boma la kuuzinga Yerusalemu! Maana ndio mji utakaopatilizwa kwa ajili ya ukorofi uliomo mwake.

⁷Kama kisima kinavyoyatoa maji yake, ndivyo, unavyoyatoa mabaya yake. Makorofi na mapotovu husikilika mwake, macho yangu huona siku zote maumivu na mapigo.

⁸Onyeka, Yerusalemu, roho yangu isije kujitenga nawe, nisikugeuze kuwa nchi yenye mapori matupu yasiyokaa watu!

Kukasirika kwake mfumbuaji.

⁹Hivi ndivyo, Bwana Mwenye vikosi anavyosema: Masao yako, Isiraeli, yataokotezwa kama yake mzabibu; ukunjue tena mkono wako kama mchuma zabibu, akiyatazama matawi!

¹⁰Nimwambie nani na kumshuhudia, wapate kusikia? Tazama! Hawakutahiriwa penye masikio, hawawezi kusikia. Neno lake Bwana likawa kicheko kwao, hawapendezwi nalo.

¹¹Nami nimejaa makali ya Bwana yenye moto, nimechoka kuyazuia. Basi, na yapige watoto wanaocheza njiani nao vijana, wakikusanyika pamoja, kwani wote, waume na wake, wazee na wakongwe, watashikwa nayo.

¹²Nyumba zao zitaachiliwa wengine, hata mashamba na wanawake vilevile, kwani nitawakunjulia mkono wangu wao wakaao katika nchi hii; ndivyo, asemavyo Bwana.

¹³Kwani wao wote, walivyo wadogo mpaka wakiwa wakubwa, hutamani mali tu; hata wafumbuaji na watambikaji wote pia hufanya yenye uwongo.[#Yer. 8:10-12.]

¹⁴Madonda yao walio wazaliwa wa ukoo wangu huyaponya juujuu wakisema: Tengemaneni! Tengemaneni! lakini hakuna utengemano.[#Yer. 8:11; Ez. 13:10,16; 1 Tes. 5:3.]

¹⁵Watapatwa na soni, kwani hufanya yatapishayo; lakini hawaoni soni, wala hawajui kuiva nyuso. Kwa hiyo wataanguka pamoja na wenzao watakaoanguka siku hiyo, nitakapowapatiliza; ndipo, watakapojikwaa. Ndivyo, Bwana anavyosema.

Mungu amewasumbukia bure.

¹⁶Hivi ndivyo, Bwana anavyosema: Simameni njiani, mwone! Ulizeni mapito ya kale, kama njia njema ni ipi? Hiyo ishikeni, mzipatie roho zenu kituo! Wakasema: Hatutaishika.[#Yer. 44:16; Mat. 11:29.]

¹⁷Nitawawekea walinzi, mwiangalie sauti ya baragumu! Wakasema: Hatutaiangalia.[#Yes. 52:8; Ez. 3:17.]

¹⁸Kwa hiyo sikieni, ninyi wamizimu! Ninyi mliokutanika, yatambueni yatakayokuwa kwao!

¹⁹Nayo nchi, sikia! Na mnione, nikiwaletea mabaya watu wa ukoo huu, ndiyo yaliyozaliwa na mawazo yao, kwani maneno yangu hawakuyasikiliza, nayo Maonyo yangu wameyakataa.[#5 Mose 32:1; Yes. 1:2.]

²⁰Uvumba utokao Saba unanifaliaje? Nayo manukato yatokayo nchi ya mbali ni ya nini? Ng'ombe zenu za tambiko hazinipendezi, wala vipaji vyenu vya tambiko havinifurahishi.[#Yes. 1:11.]

²¹Hivi ndivyo, Bwana anavyosema: Nitazameni, jinsi ninavyoweka mawe ya kukwazia njiani kwao walio ukoo huu, nao watajikwaa wote pia, baba na watoto, wenyeji na wenzao wataangamia.[#Yes. 8:14.]

²²Hivi ndivyo, Bwana anavyosema: Tazameni! Watu watakuja toka nchi ya kaskazini, taifa kubwa litainuka kwenye mapeo ya nchi.[#Yer. 5:15; 5 Mose 28:49.]

²³Hushika pindi na mikuki, ni wakorofi pasipo huruma, makelele yao ni kama kuvuma kwa bahari, nao hupanda farasi; wamejivika kama watu waendao vitani, wapigane na wewe, binti Sioni.[#Yer. 50:42.]

²⁴Tulipokisikia kivumo chao, mikono yetu ikalegea, tukasongeka, uchungu ukatushika kama wa mzazi.

²⁵Msitoke kwenda shambani, wala njiani msiende! Kwani panga za adui ziko, zinawastusha po pote.

²⁶Mlio wazaliwa wa ukoo wangu, jivikeni magunia, mpate kugaagaa mavumbini! Ombolezeni kama waliofiwa na mwana wa pekee! Vilio na viwe vyenye uchungu sana! Kwani mara mwangamizi atatujia.[#Amo. 8:10.]

Yeremia amefanya kazi za bure.

²⁷Nimekuweka kwao walio ukoo wangu, uwajaribu, kwani ni wagumu, uwatambue ukizijaribu njia zao.

²⁸Wao wote ndio wabishi wenyewe waendao wakisingizia, ni wagumu kama shaba na vyuma, wao wote ndio wapotezaji wabaya.[#Ez. 22:18.]

²⁹Mifuo ikifukutwa, mle motoni hutoka shaba tu. Imekuwa kazi bure kuyeyusha mara kwa mara, kwani mabaya yaliyomo hayakutengeka.

³⁰Sharti waitwe fedha zitupwazo, kwani Bwana amewatupa.[#Yes. 1:22.]