Mali za Iyobu amchaye Mungu.

¹Kulikuwa na mtu katika nchi ya usi, jina lake Iyobu. Mtu huyu alikuwa mnyofu wa kweli mwenye kumcha Mungu, nayo mabaya alikuwa ameyaepuka.[#1 Mose 10:23; 22:21; 36:28; Yer. 25:20; Omb. 4:21; Ez. 14:14,20.]

²Kwake walizaliwa wana saba wa kiume na watatu wa kike.

³Makundi yake yalikuwa mbuzi na kondoo pamoja 7000 na ngamia 3000 na majozi ya ng'ombe 500 na punda majike 500, hata watumwa wake wakawa wengi sana. Kwa hiyo yule mtu alikuwa mkuu kuliko watu wote waliokaa upande wa maawioni kwa jua.

⁴Wanawe wa kiume walifanya nyumbani mwake kila mmoja sikukuu yake; ndipo, walipowaalika maumbu zao watatu kula na kunywa pamoja nao.

⁵Ikawa, kila walipozila hizo sikukuu zao, Iyobu hutuma kwao, akawatakasa kesho yake asubuhi akiwatolea ng'ombe za tambiko, wao wote kila mtu yake, kwani Iyobu alisema: Labda wanangu wamekosa wakiacha kumcha Mungu mioyoni mwao. Hivyo ndivyo, Iyobu alivyovifanya siku zote.

Uvumilivu wa Iyobu katika majaribu makuu.

⁶Ikawa siku moja, wana wa Mungu walipokuja kumtokea Bwana, Satani naye akaja katikati yao.[#Iy. 2:11; 1 Fal. 22:19-22; 1 Mambo 21:1; Zak. 3:1.]

⁷Bwana akamwuliza Satani: Umetoka wapi? Satani akamjibu Bwana akisema: Natoka katika kutembea katika nchi na kujiendea huko na huko.

⁸Bwana akamwuliza Satani: Umemwangalia mtumishi wangu Iyobu? Kwani katika nchi hakuna mtu kama yeye, ni mnyofu wa kweli mwenye kumcha Mungu, nayo mabaya ameyaepuka.[#Iy. 1:1.]

⁹Satani akamjibu Bwana akisema: Je? Iyobu anamcha Mungu bure?[#Sh. 73:13.]

¹⁰Wewe humwangalii mwenyewe na nyumba yake nayo yote yaliyo yake po pote? Ukazibariki kazi za mikono yake, nayo makundi yake yameieneza nchi.

¹¹Haya! Ukunjue mkono wako, uyapige yote yaliyo yake! Ndipo, atakapokutukana usoni pako.

¹²Bwana akamwambia Satani: Tazama, yote yaliyo yake nakupa! Ila yeye mwenyewe tu usimguse kwa mkono wako! Ndipo, Satani alipotoka usoni pake Bwana.

¹³Ikawa siku moja, wanawe wa kiume na wa kike walipokula sikukuu na kunywa nvinyo nyumbani mwa ndugu yao aliyezaliwa wa kwanza,

¹⁴mjumbe akaja kwake Iyobu, akamwambia: Ng'ombe walipokuwa wanalima, nao punda walipolisha kando yao,

¹⁵mara watu wa Saba wakatushambulia, wakawachukua, nao vijana wakawapiga kwa ukali wa panga zao, mimi nikapona peke yangu tu, nikupashe habari.[#1 Mose 10:7,28; 25:3.]

¹⁶Huyu angali akisema, akaja mwingine, akasema: Moto wa Mungu umeanguka toka mbinguni, ukawaka kwenye mbuzi na kondoo, ukawala pamoja na vijana, mimi nikapona peke yangu tu, nikupashe habari.

¹⁷Huyu angali akisema, akaja mwingine, akasema: Wakasidi wamekuja vikosi vitatu, wakatushambulia, wakawakamata ngamia, wakawachukua, nao vijana wakawapiga kwa ukali wa panga zao, mimi nikapona peke yangu tu, nikupashe habari.[#1 Mose 11:28.]

¹⁸Huyu angali akisema, akaja mwingine, akasema: Wanao wa kiume na wa kike walipokula sikukuu na kunywa nvinyo nyumbani mwa ndugu yao aliyezaliwa wa kwanza,

¹⁹mara upepo mkubwa uliotoka upande wa nyika ukazipiga pembe zote nne za ile nyumba, ikawaangukia wale vijana, wakafa; mimi nikapona peke yangu tu, nikupashe habari.

²⁰Ndipo, Iyobu alipoinuka, akazirarua nguo zake, akajinyoa kichwa chake, akajitupa chini kumwangukia Mungu,[#1 Mose 37:34.]

²¹akasema: Nilipotoka tumboni mwa mama nilikuwa mwenye uchi, tena nitakapotoka huku nitakuwa mwenye uchi vilevile. Bwana ndiye aliyenipa, Bwana ndiye aliyeyachukua tena, Jina la Bwana na litukuzwe![#Mbiu. 5:15; 1 Tim. 6:7.]

²²Katika mambo hayo yote Iyobu hakukosa, wala hakumwazia Mungu kuwa mwenye mambo yasiyopasa.