¹Sikieni na kulisikiliza neno langu!

²Hili litakuwa la kuituliza mioyo yenu.

³Niacheni, nipate kusema mimi nami! Nitakapokwisha kuyasema yangu, na msimange tena.

⁴Je? Yuko mtu, ninayemsuta? Mbona sishindwi na kuvumilia?

⁵Nigeukieni mimi, mpate kustuka na kuiweka mikono vinywani mwenu!

⁶Kweli nami nikiyakumbuka nashikwa na woga, mwili wangu nao unakufa ganzi.

⁷Mbona wasiomcha Mungu huwapo? Mbona huwa wazee, nguvu zao zikiendelea kuongezeka?[#Sh. 37:4-12; Yer. 12:1.]

⁸Vizazi vyao huviona kwao kwa macho yao kuwa vyenye nguvu, nao wajukuu wao wako machoni pao.

⁹Nyumba zao hukaa salama pasipo kustushwa, nayo fimbo ya Mungu haiwapigi.

¹⁰Ng'ombe wao waume huzaza vema pasipo kukosa, ng'ombe wao wake huzaa vizuri pasipo kuharibu mimba.

¹¹Huwatembeza watoto wao walio wengi kama kundi la kondoo, nao vijana wao huchezacheza na kupaza sauti

¹²wakiimbia patu na mazeze na kuifurahia milio ya mazomari.

¹³Siku zao huzitumia za kula mema, kisha hushuka kuzimuni kwa mara moja.

¹⁴Nao humwambia Mungu: Ondoka kwetu! hatupendezwi kuzijua njia zako.[#Iy. 22:17.]

¹⁵Mwenyezi ni nani, tumtumikie? Inatufaliaje kumtokea na kumwomba?

¹⁶Lakini tazameni: mema yao hawayashiki mikononi mwao, kwa hiyo mashauri yao wasiomcha Mungu na yanikalie mbali![#Iy. 22:18.]

¹⁷Taa zao wasiomcha Mungu zikizima, ni mara ngapi? Si kila mara, unapowajia mwangamizo wao? Ni mara ngapi, Mungu akiwapatia matanzi kwa kuwakasirikia,[#Iy. 18:5,12.]

¹⁸wawe kama bua kavu penye upepo au kama makapi, yakipokonywa na upepo wa chamchela?[#Sh. 1:4.]

¹⁹Mwasema: Mungu huwawekea watoto wao maovu yao; lakini angewalipisha wenyewe, wapate kumjua,[#Iy. 20:10; 2 Mose 20:5.]

²⁰macho yao wenyewe yangeuona mwangamizo wao, wakinyweshwa makali yake Mwenyezi yaliyo yenye moto.

²¹Kwani mlango wao unawezaje kuwapendeza huko nyuma yao, miezi yao ikiisha kukatwa kwa kuitimiza hesabu yao?

²²Je? Wanataka kumfundisha Mungu, apate kuwajua? Naye ndiye awahukumuye nao walioko huko juu.[#Mbiu. 5:8.]

²³Huwa hivi: mmoja anakufa mwenye nguvu zake zote, naye alikuwa anatengemana na kutulia kabisa,

²⁴vyombo vyake vya kukamulia vikijaa maziwa, kiini cha mifupa yake nacho kikiwa chenye mafuta.

²⁵Mwingine anakufa mwenye uchungu rohoni mwake, kwa kuwa hakuna chema cho chote, alichokila.

²⁶Kisha hulala pamoja humo uvumbini, vidudu vikiwafunika wote wawili.[#Iy. 3:13-19.]

²⁷Tazameni! Ninayajua mawazo yenu nayo mashauri yenu ya kunikorofisha.

²⁸Mwasema: Nyumba ya mkuu aliyetesa watu iko wapi? Mahema, wasiomcha Mungu waliomokaa, yako wapi nayo?

²⁹Je? Wapitao njiani hamkuwauliza hayo? Hamzitambui habari zao za mambo, waliyoyaona wao?

³⁰Kwamba: Siku ya msiba mbaya hupona, siku, makali yanapotokea, huepuka.

³¹Yuko nani anayeziumbua njia zake usoni pake? Tena yuko nani anayemlipisha aliyoyafanya yeye?

³²Naye husindikizwa mpaka mazikoni, tena kaburini kwake wanangoja zamu.

³³Udongo wa bondeni anauona kuwa mtamu, watu wote wanamfuata nyuma yake, nao waliomtangulia hawahesabiki.

³⁴Nanyi mnaniambiaje matulizo ya moyo yaliyo ya bure? Kwani yanayosalia ya majibu yenu, ni ukatavu tu.

Elifazi anasema mara ya tatu: Iyobu hana budi kujuta.

Elifazi wa Temani akajibu akisema: