Ugumu wa kuzitambua sababu zake Mungu za kuwaachilia tu wasiomcha.

¹Mbona hazikuwekwa na Mwenyezi siku zake za mapatilizo? Mbona hawazioni hizo siku zake wao wamjuao?

²Wasogezao mipaka wako huku, nao wanyang'anyao makundi ya kondoo, wayachunge kuwa yao.[#5 Mose 27:17.]

³Punda wao waliofiwa na wazazi huwachukua, nao ng'ombe wa wajane huwakamata kuwa rehani.

⁴Huwakumba maskini, waondoke njiani, wanyonge wa huku chini wote pia hawana budi kujificha.

⁵Watazameni, kama hawafanani nao vihongwe vya nyikani: hutoka na mapema kufanya kazi zao za kujipatia chakula, wanakojipatia chakula cha watoto, ndiko porini.

⁶Mashambani kwa watu huchuma ya kujilisha, nayo mizabibu yao wasiomcha Mungu huiokoteza.

⁷Hulala usiku wenye uchi pasipo nguo za kujifunika, hawana mablanketi ya kujizuilia baridi ya kipupwe.

⁸Hulowa kwa kunyewa na mvua za milimani, kwa kukosa kimbilio hujibana mwambani.

⁹Tena wako wapokonyao kifuani kwa mama waliofiwa na baba, nao wanyonge huwavua mavazi kuwa rehani;

¹⁰kisha huwaacha, wajiendee wenye uchi pasipo nguo yo yote; nao wenye njaa huchukuzwa viganda vya ngano.[#Yes. 58:7.]

¹¹Uani pa mabwana zao hutengeneza mafuta, ijapo wenyewe wawe wenye kiu, huwakamulia wao zabibu.[#Yak. 5:4.]

¹²Wenye kufa wakipiga kite, husikilika toka mjini, nazo roho zao waliouawa kwa nguvu hulilia malipizo, lakini wakipumbazwa vibaya hivyo, Mungu haviangalii.

¹³Wenye kuchukizwa na mwanga ndio wenzao wale, hukataa kuzitambua njia zake hivyo, zilivyo, penye mikondo yake hawakai.

¹⁴Mwuaji huinuka, kukipambazuka, aje kumwua mnyonge naye mkiwa, mambo ya usiku hufanana nayo yake mwizi.

¹⁵Macho ya mzinzi hungoja kuchwa kwa kwamba: Pasipatikane jicho litakaloniona; kwa hiyo huuficha uso wake.

¹⁶Penye giza hujipenyeza nyumbani mwa watu, kwa kukataa kuona mwanga hujifungia mchana.

¹⁷Mapema yao hao wote pamoja ndio giza kuu, kwani huvijua mastusho yake hilo giza kuu.

¹⁸Yeye kwa kuwa kama aendaye juu ya maji laiti angepita upesi, fungu lake la huku chini liapizwe, njia ya kwenda mizabibuni asiishike tena![#1 Mose 49:4.]

¹⁹Kama kiangazi kinavyotowesha maji ya theluji kwa ukali wa jua, vivyo hivyo kuzimu na kuwatoweshe wakosaji walio hivyo.

²⁰Nalo tumbo la mama na limsahau, wadudu wakiufurahia utamu wa mwili wake; kwa kuwa mpotovu na avunjwe kama mti, asikumbukwe tena.

²¹Kwa maana aliwanyang'anya vyao wanawake wasiozaa, nao wajane hakuwafanyizia chema cho chote.

²²Kwa uwezo wake Mungu huwakalisha sana walio wenye nguvu, hata aliyekwisha kukata tamaa ainuke tena na kupata uzima.

²³Humpa kukaa na kutulia kwa kupata egemeo, nayo macho yake huzielekea njia zao.

²⁴Wakiisha kujipatia utukufu mara hawako tena, hutoweka kwa kupokonywa kama wote wengine; nao hukatwa kama masuke yaliyoko juu mabuani.

²⁵Au sivyo vilivyo? Yuko nani awezaye kuniumbua kuwa mwongo na kuyatokeza maneno yangu kuwa ya bure?

Bildadi anasema mara ya tatu: Mtu yuko nani machoni pa Mungu?

Bildadi wa Sua akajibu akisema: