¹Hivyo, Mungu alivyo Mwenye uzima, ijapo akatae kuniamulia,

²hivyo, Mwenyezi alivyoitia roho yangu machungu haya,

³siku zote, nitakapokuwa ninakokota roho bado, pumzi ya Mungu itakapokuwa ingalimo puani mwangu:

⁴midomo yangu haitasema neno lipotokalo, wala ulimi wangu hautaongopa.[#Sh. 34:14.]

⁵Ninyi sitawaitikia kale na kale mpaka nitakapozimia, sitakoma kuvieleza kwamba: Sikukosa.

⁶Neno hili ninalishika sana, sitaliacha kwamba: Mimi ni mwongofu, moyo wangu haunisutii moja tu miongoni mwao siku zangu.[#Tume. 24:16; 1 Kor. 4:4.]

⁷Mchukivu wangu na yampate yanayompata asiyemcha Mungu, naye aniinukiaye na yampate yaleyale yanayompata mpotovu.

⁸Kwani mwovu akijipatia mapato kwa kukorofisha watu, Mungu atakapoitaka roho yake kwake, yuko na kingojeo gani?[#Luk. 12:20.]

⁹Mungu atavisikia vilio vyake, masongano yatakapompata?

¹⁰Au atamfurahia Mwenyezi, amlilie Mungu kila, anapotaka?

¹¹Nitawafundisha ninyi matendo yake mkono wa Mungu, Mwenyezi anayoyafanya, sitawaficha!

¹²Ninyi nyote yatazameni mliyoyaona! mbona mwajisemea tena maneno yaliyo bure kabisa?

¹³Hili ni fungu lake asiyemcha Mungu lililoko kwake Mungu, tena ni urithi, watakaoupata kwake Mwenyezi, wao wakorofi.

¹⁴Wanawe watakapokua watauawa na upanga, nao wajukuu wake hawatashiba vyakula.[#Iy. 21:19.]

¹⁵Watakaosalia kwake watazikwa kwa kuuawa na kipindupindu, nao wajane wao hawatawaombolezea.

¹⁶Ijapo, alimbike fedha kuwa nyingi kama mavumbi, ijapo, ajiwekee mavazi kuwa mengi kama mchanga,

¹⁷ijapo, ayaweke hivyo, atakayeyavaa ni mwongofu, nazo fedha watajigawanyia wao watakatao.[#Fano. 13:22.]

¹⁸Akijenga nyumba yake, huwa kama buibui, au kama dungu, wanalomjengea mlinzi.

¹⁹Anakwenda kulala mwenye mali, lakini ni mara ya mwisho, akifumbua macho, hakuna mali tena.

²⁰Mastusho yanamfikia kama maji mengi, upepo wa chamchela unampokonya usiku.

²¹Upepo utokao maawioni kwa jua unamchukua, ajiendee, ukimwondoa kwa nguvu hapo pake, alipokuwa.

²²Unampiga mishale yake pasipo kumhurumia, hata atake hili mojo tu: kukimbia, atoke mkononi mwake.

²³Watu wanampigia makofi na kumzomea, akitoka hapo pake, alipokuwa.