Ujuzi wa Mungu hauchunguziki.

¹Fedha zina mahali pao zinapoonekana, nazo dhahabu zina mahali pao, wanapozifulia mitoni.

²Vyuma vinachimbuliwa uvumbini, tena yako mawe yanayotokea shaba kwa kuyeyushwa.

³Nalo giza mtu analikatia mpaka, ayachunguze mawe yaliyoko kule kuliko na giza lenyewe kwenye mlango wa kuzimu.

⁴Huko anachimbua shimo refu sana, kisha nayo njia ya ndani ya nchi pasipokaa watu; wanawahauliwa kwa kuwa chini ya hapo, watu wanapokanyaga; ndiko, wanakojiangika na kuning'inia, watu wengine wakiwa mbali.

⁵Nchi itoayo chakula juu chini yake inafudikizwa kwa kuchimbuliwa na nguvu zilizo sawa nazo za moto.

⁶Mahali pamojamoja huonekana mawe yenye almasi, pengine nayo madongo yenye dhahabu.

⁷Naye tai haijui njia hiyo, wala macho ya kozi hayajaiona kwa kuchungulia.

⁸Nyama wakali wenye majivuno hawajaikanyaga, wala simba mwenyewe hajaishika.

⁹Nayo mawe magumu yenyewe mtu huyavunja kwa mkono wake, hata milima anaifudikiza kwa kuichimbua toka misingini.

¹⁰Miambani anachonga njia za kupitia ndani yao; ndivyo, macho yake yanavyoona yote yaliyo yenye kima.

¹¹Vijito vya ndani anaviziba, visimchuruzikie maji, apate kuyatokeza mwangani yaliyofichika ndani ya nchi.[#Iy. 28:25.]

¹²Lakini werevu wa kweli unaonekana wapi? napo mahali penye utambuzi pako wapi?

¹³Hakuna mtu ajuaye, unapotengenezwa, hauonekani katika nchi yao wenye uzima.

¹⁴Vilindi husema: Kwetu sisi hauko, nayo bahari husema: mimi nami sinao.

¹⁵Hata kwa dhahabu safi haupatikani, wala haulipiki kwa fedha kuwa bei yake,[#Fano. 3:14-15; 8:10-11.]

¹⁶wala haupimiki kwa dhahabu tupu ile ya Ofiri, wala kwa almasi au kwa vito vya sardio vilivyo vyenye kima.[#1 Fal. 9:28.]

¹⁷Wala dhahabu wala vioo vizuri mno ndivyo vinavyolingana nao, wala haununuliki kwa vyombo vya dhahabu vyenye urembo.

¹⁸Marijani na ulanga uangazikao vizuri hayakumbukwi uliko, kuwa na werevu wa kweli ni mali kuliko lulu.

¹⁹Hauwezekani kulinganishwa navyo vito vya topasio vitokavyo Nubi, wala haupimiki kwa dhahabu itakatayo kabisa.[#2 Mose 28:17.]

²⁰Je? Werevu wa kweli unatoka wapi? napo mahali penye utambuzi pako wapi?

²¹Umefichika machoni pao wote walio wenye uzima, nao ndege wa angani hawauoni, kwa kuwa uko umefunikwa.

²²Kuzimu nacho kifo husema: Kwa masikio yetu tulisikia tu, ukitajwa.

²³Mungu anaitambua njia ya kwenda kwake, yeye tu anapajua, hapo pake ulipo.[#Fano. 8:22-31.]

²⁴Kwani yeye huchungulia hata mapeoni kwa nchi, huyaona yaliyoko chini ya mbingu.

²⁵Alipoutengeneza ukali wa upepo, alipoupima wingi wa maji,[#Iy. 26:10.]

²⁶alipoyatengeneza maongozi ya mvua nayo njia ya umeme ulio wenye ngurumo:

²⁷hapo ndipo, alipouona, kisha akautangaza kwa watu, akaushikiza, akauchunguza.

²⁸Kisha akawaambia watu: Tazameni! Kumcha Bwana ndio werevu wa kweli, kuyaepuka mabaya ndio utambuzi.[#Sh. 111:10; Fano. 1:7.]

Iyobu anasema na moyo wake kwa kuyakumbuka ya kale, aliyokuwa nayo.

Iyobu akaendelea kutoa mifano akisema: