¹Laiti ningekuwa, kama nilivyokuwa katika miezi iliyopita,

²Mungu alipoziangalia siku zangu!

³Hapo taa yake ilimulika juu ya kichwa changu, kwa mwanga wake nikaenda hata gizani.[#Sh. 18:29.]

⁴Siku zile nilikuwa mwenye nguvu za kiume, Mungu naye akakaa hemani mwangu kuwa mwenzangu wa mashauri.[#Sh. 25:14.]

⁵Hapo Mwenyezi alikuwa pamoja na mimi, nao watoto wangu wakanizunguka.

⁶Hapo miguu yangu ilioshwa kwa maziwa, nao mwamba uliochuruzika vijito vya mafuta ulikuwa kwangu.

⁷Nilipotokea langoni kwenye mji, nikiweke kiti changu uwanjani,

⁸vijana waliponiona wakaondoka kwenda pengine, nao wazee wakainuka, wasimame;

⁹Wakuu wakayakomesha maneno yao na kuviweka viganja vinywani mwao.

¹⁰Sauti za mabwana wakubwa nazo zikanyamaza, ndimi zao zikagandamana na fizi zao.

¹¹Sikio la mtu liliponisikia, akanishangilia, jicho la mtu liliponiona, akanishuhudia.

¹²Kwani nilimponya mnyonge, aliponililia, hata waliofiwa na wazazi, walipokosa msaidiaji.[#2 Mose 22:21-22; 3 Mose 19:18.]

¹³Mbaraka yake aliyeufikia mwangamizo ikanijia, nayo mioyo ya wajane nikaichangamsha.

¹⁴Nilivaa wongofu, uniwie nguo, nayo maamuzi yangu yakawa kama kanzu na kilemba.

¹⁵Kipofu nilikuwa macho yake, kiwete nilikuwa miguu yake.

¹⁶Maskini mimi nilikuwa baba yao, nalo shauri la mtu, nisiyemjua, nikalichunguza vema.[#Iy. 31:18.]

¹⁷Lakini mpotovu nilimvunja meno, namo mlemle katika meno yake nikayapokonya aliyoyanyang'anya.[#Sh. 58:7.]

¹⁸Kwa hiyo nilisema: Katika kiota changu ndimo, nitakamozimia, siku zangu zitakapokuwa nyingi kama za mtende.

¹⁹Mizizi yangu itatandama juu penye maji, nao umande utayanyea matawi yangu usiku kucha.

²⁰Utukufu, nilio nao, utakuwa mpya kila siku, nao upindi wangu utajipatia nguvu mpya mkononi mwangu.

²¹Mimi watu walinisikiliza na kungoja, nimalize; nilipowapa shauri langu, wakaninyamazia.

²²Hakuwako mwingine aliyesema, nilipokwisha kusema, maneno yangu yakawa kama matone yaliyowadondokea.

²³Kama wanavyongoja mvua, ndivyo, walivyoningoja, vinywa vyao vikaasama kama vyao wanaotwetea mvua ya vuli.

²⁴Walipotaka kukata tamaa, nikawachekea, hawakuweza kuuinamisha chini uso wangu, ulipoangaza.

²⁵Nilipojielekeza kwenda kwao nilikaa nao kama kichwa chao, au kama mfalme katika vikosi vyake kwa kuwa kama mtu anayewatuliza mioyo waliosikitika.