Iyobu anayaonyesha mateso yake.

¹Sasa wananicheka walio wenye siku chache kuliko mimi, ambao baba zao nilikataa kuwaweka mahali, mbwa wa makundi yangu ya kondoo walipokuwa nao.[#Iy. 29:8-11.]

²Nazo nguvu za mikono yao zingenifalia nini? Kwani uwezo wao wenye nguvu ulikuwa umeangamia.

³Kwa kuwa ukosefu na njaa zilikuwa ziliwagofua, huguguna nayo mazao ya nyika iliyo kama jangwa jeusi, iliyo tupu kabisa pasipo cho chote cha kulisha watu.

⁴Kwa hiyo huchuma vijanijani vyenye chumvi panapo na vichakachaka, nayo mizizi ya mifagio ni chakula chao.

⁵Hufukuzwa penye watu wengine, wakiwazomea kama wezi.

⁶Hawana budi kukaa katika makorongo yaogopeshayo, hata mashimoni ndani ya nchi, hata miambani.

⁷Hulia kwa njaa vichakani wakilala chini ya upupu.

⁸Ndio wenye upumbavu wenyewe wasiojua hata majina yao, nako kwao walifukuzwa na kupigwa.

⁹Sasa nimegeuka kuwa mtu wao hao wa kumzomea, nikapata kuwa kwao kama fumbo.[#Iy. 17:6; Sh. 69:13; Omb. 3:63.]

¹⁰Kwa kutapishwa na mimi huwa mbali, wasinifikie karibu, lakini hawajikatazi kunitemea mate usoni pangu.[#Mat. 26:67.]

¹¹Vilivyowazuia wakavifungua, wanitese, usoni pangu wakavitupa mbali hivyo vifungo vyao.

¹²Hawa watu waovu hujisimamisha kuumeni kwangu, waisukume miguu yangu, iondoke kwao, nazo njia zao zilizowaangamiza hunitwika mimi.

¹³Njia yangu wakaichimbua, isipitike, wao wakosao msaidiaji husaidia kunitumbukiza mwangamizoni.

¹⁴Kama ni kutokea katika ufa mpana, hunijia mimi, makelele yao huzidi sana kwa kusukumana.

¹⁵Mastusho kama hayo yakanigeukia, kama ni kwa nguvu za upepo yakautangua ukuu wangu upesi, nayo yawezayo kuniokoa yakatoweka kama wingu.

¹⁶Kwa hiyo roho yangu imeyeyuka sasa ndani yangu, siku za kuteseka zikanipata.[#Sh. 42:5.]

¹⁷Usiku unaichoma mifupa yangu huko ndani, mpaka ioze, nayo maumivu yangu yanayoniguguna hayapumziki.

¹⁸Hizo nguvu nyingi zikaligeuza vazi langu, zikanikaza kama ukosi wa kanzu yangu.[#Iy. 7:5.]

¹⁹Zikanibwaga matopeni, nikafanana nayo mavumbini na majivu.

²⁰Nikikulilia, wewe, hunijibu; hata nikisimama, unanitazama tu.[#Iy. 19:7; Sh. 22:3.]

²¹Umegeuka kuwa mpingani wangu asiyenihurumia, kwa huo uwezo wa mkono wako ukanifukuza.

²²Ukaniinua na kuniweka juu ya upepo, unipeleke, ukaniyeyusha kwa hizo nguvu za chamchela.

²³Nakujua, utakakonipeleka, ndiko kufani, uniingize nyumbani mwenye mkutano wao wote waliokuwa uzimani.

²⁴Je? Mtu akitumbukia shimoni hanyoshi mkono? Au mtu akizama hapigi yowe kwa sababu hiyo?

²⁵Aliyepatwa na siku ngumu sikulia naye? Roho yangu haikumsikitikia naye mkiwa?

²⁶Nilipotazamia mema, mabaya yakaja; nilipongojea mwanga, giza ikaja.[#Yer. 14:19.]

²⁷Matumbo yakachafuka, yakakataa kunyamaza, siku za mateso ziliponifikia mimi nami.

²⁸Nikajiendea na msiba wangu pasipo kuona jua, nikaondoka penye mkutano, nipate kulia.

²⁹Nimegeuka kuwa ndugu yao mbwa wa mwitu, na mwenzao mumbi wapigao kite.

³⁰Ngozi yangu inachubuka kwa kuwa nyeusi, itoke mwilini mwangu, nayo mifupa yangu imeungua kwa joto la mwili.

³¹Hivyo zeze langu limegeuka kuwa la kuombolezea, nalo zomari langu hupiga sauti za vilio tu.[#Sh. 30:12.]