Elihu anaanza kusema na kuzieleza sababu za kunyamaza kwake.

¹Hao watu watatu walipoacha kumjibu Iyobu, kwa kuwa alikuwa mwongofu machoni pake,

²ndipo, makali ya Elihu wa Buzi, mwana wa Barakeli wa mlango wa Ramu, yalipowaka moto, naye Iyobu ndiye, makali yake yaliyemwakia, kwa kuwa alijiwazia rohoni mwake kuwa hakumkosea Mungu.[#1 Mose 22:21; Iy. 9:20; 13:18; 19:6-7; 23:7; 27:2,6; 31:35.]

³Nao wale wenzake watatu makali yake yakawawakia, kwa kuwa hawakuona tena la kumjibu Iyobu la kumwumbua kuwa amekosa.[#Iy. 15:5; 18:21; 20:29; 22:5.]

⁴Lakini Elihu alikawia kusema na Iyobu, kwani wale walikuwa wakubwa kumpita yeye kwa siku zao.

⁵Elihu alipoona, ya kuwa hakuna jibu tena litokalo vinywani mwao wale watatu, makali yake yakawaka kama moto.

⁶Ndipo, Elihu wa Buzi, mwana wa Barakeli, alipojibu, akasema:

Mimi ni mdogo kwa miaka, ninyi m wazee, kwa hiyo nimejizuia, nikaogopa kuwaelezea ninyi, ninayoyajua mimi.

⁷Nilisema: Wenye uzee na waseme, walio na miaka mingi na waujulishe werevu wa kweli.[#Iy. 12:12.]

⁸Lakini kinachowapa watu utambuzi ni roho iliyomo mwao pamoja na pumzi yake yeye Mwenyezi.

⁹Lakini wazee wenye miaka mingi sio wanaoerevuka kweli, wao wazee sio wanaoyajua mashauri yaliyo sawa.

¹⁰Kwa hiyo nasema: Nisikilizeni, mimi nami niyaeleze, ninayoyajua!

¹¹Tazameni! Nimeyangojea maneno yenu, nikausikiliza utambuzi wenu, mlipouchunguza, mvumbue, hayo mambo yalivyo.

¹²Ninyi nimewaangalia sana, hii ni kweli; lakini nilipotazama sikumwona aliyemshinda Iyobu, wala mmoja wenu hakuweza kumjibu aliyoyasema.

¹³Msiseme: Kwa kuwa ni mwenye werevu wa kweli, tumeona, atakayemshinda ni Mungu, si mtu.

¹⁴Hajajiweka tayari kusema na mimi, lakini kama ninyi mlivyosemeana naye, sitamjibu hivyo.

¹⁵Ndipo, walipostuka, hawakujibu tena, wakawa wamepotelewa na maneno ya kusema.

¹⁶Walipokuwa hawasemi neno, nikangoja, lakini wakasimama tu pasipo kujibu tena.

¹⁷Basi, nami na nijibu fungu langu, nami na niyaeleze, ninayoyajua.

¹⁸Kwani nimejaa maneno ya kusema, roho yangu humu ndani yangu imesongeka, mpaka niyatoe.

¹⁹Tazameni: Tumbo langu linafanana na mvinyo isiyofunguliwa njia, ni kama viriba vipya vinavyotaka kupasuka.

²⁰Na niseme, humu ndani mpanuke kidogo tu, na niifumbue midomo yangu, nijibu nami.

²¹Sitaki kupendelea uso wa mtu, wala maneno yaliyo mafuta ya midomo tu sitamwambia mtu,

²²kwani yaliyo mafuta ya midomo tu sijui kuyasema, muumbaji wangu angeniondoa upesi sana.