Mungu anatokea mawinguni, aonyesha mastaajabu yaliyoko ulimwenguni.

¹Ndipo, Bwana alipomjia Iyobu akiwa mwenye upepo wa kuvuma na nguvu, akasema:[#Iy. 31:35.]

²Ni nani huyu ayatiaye giza matengenezo yangu akijisemea maneno yakosayo ujuzi?[#Iy. 34:35.]

³Haya! Jifunge viuno vyako kama mtu wa kiume! Kisha nitakuuliza, unijulishe mambo.[#Iy. 40:7.]

⁴Nilipoiweka misingi ya nchi, ulikuwa wapi? Kama unajua utambuzi, ieleze!

⁵Ni nani aliyeviweka vipimo vyake? Sema, kama unavijua! Au ni nani aliyeipima kwa kamba ya kupimia?[#Fano. 30:4.]

⁶Misingi yake ilikochimbiwa, ndiko wapi? Au ni nani aliyeliweka jiwe lake la pembeni,

⁷zilipopiga shangwe nyota za mapema zote pamoja, nao wote waliokuwa wana wa Mungu walipopiga vigelegele?

⁸Ni nani aliyeifunga bahari kwa milango, ilipotoka tumboni mwa nchi kwa kufurika?

⁹Nilipoipatia mawingu kuwa mavazi yake ka kungu jeusi kuwa nguo zake za kujitandia?

¹⁰Nilipoipinga kwa kuishurutisha kuyafuata maongozi yangu, napo nilipoiwekea makomeo na milango kuwa mipaka?[#Fano. 8:29.]

¹¹Nilipoiambia: Ufike mpaka hapa, usipapite! Ndipo, mawimbi yako yenye majivuno yatakapokomea?[#Sh. 104:8-9.]

¹²Tangu hapo, siku zako zilipoanza, uliagiza, kuche, ukayajulisha mapambazuko mahali pao pa kutokea,

¹³yapate kuyashika mapeo ya nchi, waovu wafukuzwe, waitoke nchi?

¹⁴Hapo nchi hugeuka kama udongo, ukichorwa marembo, vyote vikijipanga kuwa kama mavazi yake mazuri mno.

¹⁵Lakini wanaonyimwa mwanga wao ndio waovu, nayo mikono iliyokunjuliwa kwa majivuno huvunjwa.

¹⁶Penye matokeo ya bahari ulipafika? Ukatembea humo ndani ya bahari mlimo na vilindi?

¹⁷Malango ya kifo yakafunguka mbele yako? Nayo malango ya kuzimu ukayaona?

¹⁸Ukapata kuutambua nao upana wa nchi? Kama unaujua wote, haya! Ueleze!

¹⁹Njia ya kwenda huko, mwanga unakokaa, iko wapi? napo mahali pake giza pako wapi?

²⁰Unaweza kuisindikiza, uipeleke kwake? Njia za kwenda nyumbani kwake unazijua?

²¹Kweli unazijua! Kwani hapo ulikuwa umekwisha kuzaliwa, nayo hesabu ya siku zako ni kubwa!

²²Penye vilimbiko vya theluji ulipafika? Navyo vilimbiko vya mvua ya mawe uliviona?

²³Siku za masongano ndizo, nilizoviwekea, hata siku ya magombano nayo ya mapigano.[#Yos. 10:11.]

²⁴Njia ya kwenda hapo, mwanga unapogawanyika, iko wapi? Upepo wa maawioni kwa jua unatoka wapi, uenee juu ya nchi?

²⁵Ni nani azichimbiaye mvua mifereji, zikifurika? Tena ni nani, auelekezeaye umeme njia yake, ukinguruma?[#Iy. 28:26.]

²⁶Ni nani ainyesheaye mvua hiyo nchi isiyokaa watu, nako kusikopatikana wana wa Adamu, kule nyikani?

²⁷Ni nani atakayelishibisha jangwa napo palipo patupu kabisa, apachipuze na kuotesha majanijani?

²⁸Je? Baba ya mvua yuko wapi? Ayazaaye matone ya umande ni nani?

²⁹Tumboni mwa nani ndimo, barafu inamotoka? Tena ni nani auzaaye umande wa theluji, utoke mbinguni?[#Sh. 147:16.]

³⁰Ni kazi ya nani, maji yakipata mafuniko kama ya mawe, nayo maji ya vilindi yakishikamana huko juu kwa kugandamanishwa?

³¹Je? Mafungo ya zile nyota saba za Kilimia unaweza kuyafunga? au kuyafungua mapingu yao zile nyota tatu za Choma, nikuchome?[#Iy. 9:9.]

³²Je? Utazitoa nyota za Mviringo wa Nyama kila moja wakati wake? au zile za Gari na za watoto wake utaziongoza?

³³Je? Maongozi ya mbinguni unayajua? au ni wewe unayezipa nchi hii, ziitawale?

³⁴Je? Unaweza kuzipaza sauti zako, zifike mawinguni, uite mvua yenye maji mengi, ije kukufunika?

³⁵Je? Unaweza kuutuma umeme, uende mahali fulani, kisha ukuambie: Mimi hapa! Nimerudi!

³⁶Ni nani afanyaye yenye ujuzi kama hayo pasipo kujulikana? Au ni nani ayatambulishaye kwao wayachunguzao?

³⁷Ni nani awezaye kuyahesabu mawingu, asipotelewe? Au ni nani awezaye kuvimwaga viriba vya mbinguni,[#1 Mose 7:11.]

³⁸mavumbi yashikamane kuwa udongo wa chepechepe, nayo mengine yageuke kuwa matope yagandamanayo?

³⁹Je? Unaweza kumpokonya simba mke nyama, aliyemrarua? Au unaweza kuikomesha njaa ya wana wa simba,

⁴⁰wakiwa mapangoni mwao, waotame, au wakikaa mafichoni na kuvizia?[#Iy. 37:8.]

⁴¹Ni nani awapatiaye makunguru vilaji vyao, wana wao wakimlilia Mungu na kutangatanga kwa kukosa chakula?[#Sh. 147:9.]