Maajabu ya nyama huuonyesha werevu wa kweli wa Mungu.

¹Je? Unajua wakati, minde wanapozalia, au umeangalia, majike ya kulungu wanapopatia mimba?

²Miezi yao ya kuwa wenye mimba umekwisha kuihesabu? Tena unajua wakati, wanapozalia?

³Huchutama, kisha huwazaa watoto wao, huko ndiko kuukomesha uchungu wao.

⁴Watoto wao hupata nguvu kwa kukua penye mapori matupu; wakijiendea na kutoka kwao hawarudi tena.

⁵Ni nani aliyewatuma punda milia kujiendea tu? au ni nani aliyeyafungua mafungo yao vihongwe?

⁶Si mimi niliyewapa nyika kuwa nyumba zao nalo jangwa la chumvi kuwa makao yao?

⁷Wao huyacheka makelele yaliyomo mijini, maana hawazisikii tena sauti za ukorofi za wasimamizi.

⁸Milimani ndiko, wanakojionea malisho yao, vijani vibichi vyote huvifuatafuata.

⁹Je? Nyati atapendezwa akikutumikia? Atatafuta kilalo cha kuwamo zizini mwako?

¹⁰Je? Unaweza kumfunga nyati kwa kamba, akulimie matuta, akikufuata na kulivuta jembe mabondeni pako?

¹¹Kwa kuwa nguvu zake ni nyingi, unaweza kumwegemea, umwachie kazi zako za shambani?

¹²Atayapeleka mazao yako nyumbani, ukimtegemea hivyo? Au yaliyomo chanjani mwako atayakusanya vema?

¹³Mabawa ya mbuni huchezacheza, lakini je? Hayo mabawa na manyoya yake yako na upole?

¹⁴Kwani mayai yake huyaacha hapo mchangani, huo mchanga uyaangue kwa joto lake;

¹⁵husahau, ya kama labda mguu utapapita utakaoyakanyaga, au nyama wa porini atayapondaponda.

¹⁶Watoto wake huwakuza kwa ukali, kama sio wake, haogopi kwamba: Labda hautafaa huo utunzaji wake.

¹⁷Kwani Mungu humsahaulisha werevu wa kweli, wala hakumgawia utambuzi wo wote.

¹⁸Lakini anapoyapigapiga mabawa yake, aondoke, humcheka naye farasi pamoja naye ampandaye.

¹⁹Je? Ni wewe uliyempa farasi nguvu zake kubwa? Je? Ni wewe uliyemvika singa za shingoni?

²⁰Je? Ni wewe unayemtuma, aogopeshe watu akiruka kwa mara moja kama nzige na kufoka sana?

²¹Huparapara bondeni akizifurahia nguvu zake, hutoka kwenda kukutana nao washikao mata.

²²Hucheka waoga, maana hastuki, wala penye panga harudi nyuma.

²³Podo hupiga kelele juu yake, nayo mikuki imetukayo pamoja na chembe za mishale.

²⁴Akichafuka kwa ukali humeza nchi, baragumu likilia, hasimami,

²⁵ila kila anapolisikia baragumu husema: Haya! Toka mbali hunusa, mapigano yaliko, akiyasikia matangazo ya wakuu na makelele ya vikosi.

²⁶Je? Ni kwa utambuzi wako kipanga akiruka angani na kuyanyosha mabawa yake kwenda kusini?

²⁷Au ni kwa agizo lako, tai akipaa juu sana na kujitengenezea kiota cha mahali palipo juu?

²⁸Hutua penye miamba, apate kulala magengeni juu; ngome yake ilipo, ndipo papo hapo.

²⁹Toka huko juu huchungulia akitafuta chakula, macho yake huyaona nayo yaliyoko mbali.

³⁰Makinda yake hufyonza damu, napo panapo nyamafu yupo hapo.[#Hab. 1:8; Mat. 24:28.]

Iyobu anamnyenyekea Mungu.

Bwana akamjibu Iyobu akisema: