¹Je? Mgombezaji atabishana naye Mwenyezi?[#Yes. 45:9.]

²Atakayebishana na Mungu na ajibu!

³Ndipo, Iyobu alipomjibu Bwana akisema:

⁴Mimi ni mdogo zaidi, nikujibu nini? Nimekifumba kinywa changu kwa kiganja changu.

⁵Nimesema mara moja, lakini sitajibu tena, sitaendelea kusema mara ya pili.

Mungu anasema mara ya pili akizionyesha nguvu zake.

⁶Bwana akamjibu Iyobu akiwa mle upeponi mwenye nguvu za kuvuma, akasema:

⁷Haya! Jifunge viuno vyako kama mtu wa kiume! Kisha nitakuuliza, upate kunijulisha![#Iy. 38:3.]

⁸Je? Mashauri, niliyoyakata, utayatangua wewe? Je? Utaniumbua kuwa mwovu, ujitokeze kuwa mwongofu?

⁹Je? Uko na mkono kama wake Mungu? Kwa kupaza sauti utaweza kunguruma kama yeye?[#Iy. 37:5.]

¹⁰Haya! Jipambe utukufu na ukuu! Jivike urembo na enzi!

¹¹Yamwage machafuko ya ukali wako, mbwage chini kila, utakayemwona, ya kuwa amejivuna!

¹²Kila utakayemwona, ya kuwa amejivuna, umnyenyekeze! Nao waovu waangushe papo hapo, wanaposimama!

¹³Wachimbie uvumbini wote pamoja, nazo nyuso zao zifungie gizani hapo, wanapochimbiwa!

¹⁴Ndipo, nitakapokutukuza mimi nami kwa kwamba: Mkono wako wa kiume unakuokoa.

¹⁵Mtazame kiboko, niliyemwumba, kama nilivyokuumba wewe; naye hula majani kama ng'ombe.

¹⁶Zitazame nguvu zake, alizo nazo kiunoni mwake, nao uwezo wake uliomo mishipani mwa tumbo lake.

¹⁷Hunyosha mkia wake, uwe kama mwangati, mishipa ya mapaja yake imefungamana.

¹⁸Mifupa yake ndio mabomba ya shaba, nazo mbavu zake ndio fimbo za chuma.

¹⁹Wa kwanza wa viumbe vya Mungu ndiye yeye, naye aliyemwumba alimgawia nao upanga wake.

²⁰Mapori ya milimani humtolea chakula, nao nyama wote wa porini huchezacheza hapo.

²¹Hulala chini ya miti yenye kivuli hujificha penye matete mabwawani.

²²Ile miti yenye kivuli humfunika kwa kivuli chao, nayo mifuu ya mtoni humzunguka.

²³Tazama, ijapo maji ya mto yafurike sana, hastuki kamwe, hutulia, ijapo mto kama Yordani umshambulie kuingia kinywani.

²⁴Yuko nani atakayemkamata, akiwa macho? Au yuko nani atakayeitoboa pua yake, amfunge kwa kamba?