Nguvu zake Nondo wa baharini (Lewiatani).

¹Je? Unaweza kumvua nondo wa baharini kwa ndoana au kuufunga ulimi wake kwa kamba katika taya la chini?[#Yes. 27:1.]

²Au utaweza kumtia ugwe puani mwake? Au utaweza kulitoboa shavu lake kwa kulabu?

³Je? Atazidi kukulalamikia? Au atakuambia maneno ya upole?

⁴Atafanya agano na wewe, umchukue, awe mtumishi wako kale na kale?

⁵Je? Utamchezesha kama ndege, ukimfunga wa kufurahisha vijana wa kike?

⁶Chama cha wavuvi kinamchuuzia na kuwagawanyia wachuuzi vipande vipande?

⁷Je? Utaweza kueneza mikuki ngozini pake au kichwani pake vyusa vya wavuvi?

⁸Haya! Mpelekee mkono wako, umkamate! Ndipo, utakapolikumbuka pigano hilo, usilirudie tena.

⁹Tazama! Hicho kingojeo cha kumkamata ni uwongo, ukimtazama tu utakufa ganzi.

¹⁰Hakuna ajipaye moyo wa kumwamsha; tena yuko nani atakayesimama usoni pangu, mimi Mungu?

¹¹Yuko nani aliyeanza kunipa kitu, nimlipe? Yote pia yaliyoko chini ya mbingu ni yangu mimi.[#Rom. 11:35.]

¹²Sitanyamaza, nisiseme, jinsi viungo vyake vilivyo, nazo nguvu zake, jinsi zilivyo kubwa, nayo matengenezo yake, jinsi yalivyo mazuri.

¹³Yuko nani awezaye kulichuna vazi lake? Yuko nani atiaye mkono katika mataya yake yenye meno mawilimawili?

¹⁴Yuko nani awezaye kuifungua milango ya kinywa chake? Kwani pande zote zinayo meno yaogopeshayo.

¹⁵Magamba yake ni mazuri mno kwa hivyo, yanavyojipanga: kama ni kukazwa kwa nguvu ya chapa, hugandamana karibukaribu,

¹⁶hushikamana kabisa kila moja na mwenzake, upepo tu usiweze kupita katikati yao.

¹⁷Kweli kila moja linagandamana na mwenzake, yanashikana kwa nguvu, yasitengeke.

¹⁸Akienda chafya humulikisha mwanga, nayo macho yake yanafanana nayo makope ya mapambazuko.

¹⁹Mienge ya moto hutoka kinywani mwake, nayo hurukisha macheche ya moto.

²⁰Katika mianzi ya pua yake hutoka moshi kama wa chungu kichemkacho au wa moto wa matete.

²¹Pumzi yake huunguza kama makaa yenye moto, hata miali ya moto hutoka kinywani mwake.

²²Shingoni pake ndipo, nguvu zinapokaa, mbele yake yako matetemeko na mastusho.

²³Manofu ya mwili wake yanashupaa, kwa kukazana hapo, yalipo, hayatikisiki.

²⁴Moyo wake nao ni mgumu kama jiwe, ugumu wake ni kama wa jiwe la chini la kusagia.

²⁵Akiinuka, nao wenye nguvu hushikwa na woga, kwa kustushwa hukosa njia ya kukimbilia.

²⁶Ukimpiga kwa upanga haumwingii, wala mkuki wala mshale wala chuma cho chote.

²⁷Chuma hukiwazia kuwa jani kavu, nayo shaba huiwazia kuwa mti uliobunguka.

²⁸Mishale ya upindi haiwezi kumkimbiza, nayo mawe ya kombeo kwake hugeuka kuwa kama makapi.

²⁹Marungu huwaziwa naye kuwa mabua makavu, tena huicheka shindo ya mkuki, ukitupwa.

³⁰Upande wake wa chini una vigae vyenye pembe, alipogaagaa ni kama matopeni, palipopita gari la kupuria.

³¹Hukichafua nacho kilindi, kiwe kama chungu kinachochemka; huivuruga nayo bahari, iwe kama dawa, zikivurugwa chunguni.

³²Nyuma yake hiyo njia, aliyoishika, huangazika, hilo povu la kilindi mtu angeliwazia kuwa mvi.

³³Huku nchini hakuna afananaye naye; alichoumbiwa, ni hiki: asistuke kamwe!

³⁴Wote walio wakuu huwatazama tu, kuliko wenye majivuno wote mfalme ndiye yeye.

Iyobu anajuta.

Iyobu akamjibu Bwana akisema: