Yona anamwomba Bwana, amwokoe.

¹Bwana akaagiza samaki mkubwa, aje ammeze Yona, Yona akawamo tumboni mwa samaki huyo siku tatu mchana na usiku.[#Mat. 12:40; 16:4.]

²Mle tumboni mwa huyo samaki Yona akamwomba Bwana Mungu wake

³kwamba:

Nimemlilia Bwana niliposongeka, akaniitikia;

kuzimuni ndani nimemlalamikia, aniokoe,

ndipo, alipoisikia sauti yangu.

⁴Umenitupa vilindini baharini ndani,

mafuriko ya maji yanizunguke,

mawimbi yako yote na maumuko yako yote yakapita juu yangu.

⁵Nami nikawaza kwamba: Nimetupwa, nisitokee tena machoni pako,

nitawezaje kuliona tena Jumba lako takatifu?

⁶Maji yamenizunguka ya kuitosa nayo roho yangu,

vilindi vimenizunguka,

majani ya baharini yamekizinga kichwa changu.

⁷Nimezama kuifikia misingi ya milima,

makomeo ya nchi yamenifungia kale na kale,

lakini wewe Bwana Mungu wangu umenitoa kuzimuni, niwe mzima.

⁸Roho yangu ilipokuwa katika kuzimia ndani yangu,

ndipo, nilipomkumbuka Bwana,

maombo yangu yakakufikia katika Jumba lako takatifu.

⁹Washikao mizimu iliyo ya uwongo tu humwacha awahurumiaye,[#Sh. 31:7.]

¹⁰lakini mimi nitapaza sauti za kukushukuru,

ziwe ng'ombe zangu za tambiko, nitakazokutolea,

nayo, niliyokuapia na niyalipe! Wokovu uko kwake Bwana.

¹¹Ndipo, Bwana alipomwagiza yule samaki, naye akaja

kumtapika Yona pwani.