Waniniwe wanajutishwa na Yona.

¹Neno la Bwana likamjia Yona mara ya pili kwamba:[#Yona 1:2.]

²Ondoka, uende katika mji ule mkubwa wa Niniwe, uutangazie utume, nitakaokuambia!

³Ndipo, Yona alipoondoka, akaenda Niniwe, kama Bwana alivyomwagiza. Niniwe ulikuwa mji mkubwa machoni pa Mungu; kuupita kati ulikuwa mwendo wa siku tatu.[#Yona 4:11.]

⁴Yona akaanza kuingia mjini mwendo wa siku moja, akapiga mbiu kwamba: Zingaliko siku 40; zitakapopita, mji wa Niniwe utabomolewa.

⁵Ndipo, watu wa Niniwe walipomtegemea Mungu, wakatangaza, watu wafunge mfungo, wakavaa magunia wote, wakubwa mpaka wadogo.[#Mat. 12:41.]

⁶Habari ya mambo hayo ikafika hata kwa mfalme wa Niniwe, naye akaondoka katika kiti chake cha kifalme, akalivua vazi lake la kifalme, akavaa gunia, akajikalisha majivuni.

⁷Kisha akatangaza mbiu mle Niniwe ya kwamba: Kwa amri ya mfalme na ya wakuu wake yanaagizwa haya: Watu na nyama, kama ni ng'ombe au kondoo, wasionje kitu cho chote, wasile, wala maji tu wasinywe!

⁸Ila wajivike magunia, watu nao nyama, wakaze kumlilia Mungu! Kisha kila mtu arudi katika njia yake mbaya na kuyaacha makorofi yaliyomo mikononi mwake!

⁹Labda ndivyo, Mungu atakavyogeuza moyo, ayaache makali yake yenye moto, tusiangamie.[#Yoe. 2:14.]

¹⁰Mungu alipoyaona matendo yao, ya kuwa wamerudi katika njia zao mbaya, ndipo, Mungu alipogeuza moyo, akaacha kuyafanya yale mabaya, aliyoyasema, ya kuwa atawafanyizia; hakuyafanya.[#Yer. 18:7-8.]