Nyama wenye kutakata na wenye uchafu.

¹Bwana akasema na Mose na Haroni, akawaambia:[#1 Mose 7:2; Tume. 10:14-15.]

²Waambieni wana wa Israeli kwamba: Katika nyama wote walioko nchini mtakula hawa wenye miguu minne:[#Kol. 2:16; 1 Tim. 4:4.]

³wote wenye kwato zilizopasuka na kutengeka kabisa, kama ni wenye kucheua, mtawala.

⁴Lakini miongoni mwao wenye kucheua wapasukao kwato msiwale hawa: Ngamia; kweli anacheua, lakini hazipasui kwato zake vema, kwa hiyo ni mwiko kwenu.

⁵Pelele; naye anacheua, lakini hazipasui kwato, kwa hiyo ni mwiko kwenu.

⁶Sungura; naye anacheua, lakini hazipasui kwato, kwa hiyo ni mwiko kwenu.

⁷Nguruwe; kweli anazipasua kwato na kuzitenga kabisa, lakini hacheui, kwa hiyo ni mwiko kwenu.

⁸Nyama zao hao msizile, nayo mizoga yao msiiguse! kwani wao ni mwiko kwenu.

⁹Katika nyama wote waliomo majini mtakula hawa: wote wenye mapezi na magamba waliomo majini baharini na mitoni mtawala.

¹⁰Lakini wote wasio wenye mapezi na magamba waliomo baharini na mitoni miongoni mwao viumbe vyote vinavyotembea majini namo miongoni mwao nyama wote waliomo majini na wawe tapisho kwenu.

¹¹Kweli na wawe tapisho kwenu! Nyama zao msizile, nayo mizoga yao na mwione kuwa tapisho;

¹²wote waliomo majini wasio wenye mapezi na magamba wawe tapisho kwenu.

¹³Namo katika ndege wamo, mtakaowaona kuwa tapisho, hawaliki kwa kuwa tapisho: kozi na pungu na furukombe,

¹⁴na tumbuzi na mwewe na ndugu zake,

¹⁵na makunguru yote na ndugu zao,

¹⁶na mbuni na kinega na dudumizi na kipanga na ndugu zake,

¹⁷na mumbi na shakwe na bundi,

¹⁸na yangeyange na korwa na tai,

¹⁹na korongo na kitwitwi na ndugu zake na hudihuda na popo.

²⁰Wadudu wote wenye mabawa wanaokwenda kwa miguu minne wawe tapisho kwenu.

²¹Katika wadudu wote wenye mabawa wanaokwenda kwa miguu minne mtawala wao tu walio wenye miguu miwili mirefu ya kurukia nchini inayokaa penye miguu yao mingine juu kidogo.

²²Mtakaowala miongoni mwao, ndio panzi na ndugu zao na nzige na ndugu zao na senene na ndugu zao na funutu na ndugu zao.

²³Lakini wadudu wote wengine wenye mabawa wanaokwenda kwa miguu minne wawe tapisho kwenu.

²⁴Kwao hao mtajipatia uchafu; kila atakayegusa mizoga yao atakuwa mwenye uchafu mpaka jioni.[#3 Mose 5:2; 14:46.]

²⁵Naye kila atakayechukua mzoga wao mmoja miongoni mwao sharti azifue nguo zake, naye atakuwa mwenye uchafu mpaka jioni.

²⁶Kila nyama mwenye kwato zilizopasuka pasipo kutengeka kabisa nao wasiocheua ndio walio wachafu kwenu; kila atakayewagusa atakuwa mwenye uchafu.

²⁷Nao nyama wote wenye miguu minne wanaokanyaga kwa nyayo ndio walio wachafu kwenu; kila atakayegusa mizoga yao atakuwa mwenye uchafu mpaka jioni.

²⁸Naye atakayechukua mizoga yao sharti azifue nguo zake, naye atakuwa mwenye uchafu mpaka jioni. Hao ndio walio wachafu kwenu.

²⁹Tena katika nyama wadogo wanaotambaa juu ya nchi ndio hawa watakaokuwa wachafu kwenu: Fuko na panya ma mjusi na ndugu zao:

³⁰guruguru na kenge na mbulu na goromoha na kinyonga.

³¹Hawa ndio walio wachafu kwenu katika nyama watambaao. Kila atakayewagusa wakiisha kufa atakuwa mwenye uchafu mpaka jioni.

³²Hata kila kitu, hawa watakachokiangukia wakifa, kitakuwa chenye uchafu kama ni chombo chochote cha mti au nguo au ngozi au gunia. Nacho kila chombo kinachotumiwa cha kufanyizia kazi kitiwe majini, nacho kitakuwa chenye uchafu mpaka jioni; ndipo, kitakapokuwa kimetakata tena.

³³Lakini kila chombo cha udongo, ambacho mmoja wao ataanguka ndani yake, sharti wakivunje, nayo yote yaliyomo yatakuwa yenye uchafu.

³⁴Vilaji vyote vinavyoliwa vikiingiwa na maji kama hayo ni vyenye uchafu; navyo vinywaji vyote vinavyonywewa vikiwa katika chombo kama hicho ni vyenye uchafu.

³⁵Nacho cho chote, mzoga mmoja tu miongoni mwao utakachokiangukia, ni chenye uchafu; kama ni jiko la kuchomea mikate au la kupikia, sharti libomolewe, maana ni lenye uchafu, hata kwenu sharti liwe lenye uchafu.

³⁶Lakini chemchemi na mashimo, maji yalimokusanyika, yatakuwa yametakata; lakini atakayeigusa mizoga yao akiyatoa humo atakuwa mwenye uchafu.

³⁷Tena kama mzoga mmoja miongoni mwao utaangukia mbegu zo zote za kupanda, watu wanazotaka kuzipanda, zitakuwa zimetakata.

³⁸Lakini kama mzoga mmoja miongoni mwao utaziangukia hizo mbegu, zikiisha lowekwa, sharti ziwe chafu kwenu.

³⁹Tena mmoja wao hao nyama, mnaowala, akifa, atakayeugusa mzoga wake atakuwa mwenye uchafu mpaka jioni.

⁴⁰Atakayekula nyama ya mzoga wake sharti azifue nguo zake, tena atakuwa mwenye uchafu mpaka jioni. Naye atakayeuchukua mzoga wake sharti azifue nguo zake, tena atakuwa mwenye uchafu mpaka jioni.[#2 Mose 22:31.]

⁴¹Nyama wadogo wanaotambaa juu ya nchi wote pia wawe tapisho kwenu, wasiliwe.

⁴²Wote wanaojikokota tumboni nao wote wanaokwenda kwa miguu minne nao wote wenye miguu mingi zaidi, wale wadudu wote wanaotambaa juu ya nchi msiwale, kwani ndio tapisho.

⁴³Msijifanye wenyewe kuwa tapisho kwa ajili ya hao wadudu watambaao, wala msijipatie uchafu kwa ajili yao mkichafuliwa nao.

⁴⁴Kwani mimi ni Bwana, Mungu wenu, kwa hiyo sharti mjitakase, mwe watakatifu, kwani mimi ni mtakatifu. Msijipatie uchafu wenyewe kwao hao wadudu wote wanaotambaa juu ya nchi.[#3 Mose 19:2.]

⁴⁵Kwani mimi ndiye Bwana aliyewatoa ninyi katika nchi ya Misri na kuwapandisha kuja huku, niwe Mungu wenu; kwa hiyo sharti mwe watakatifu, kwa kuwa mimi ni mtakatifu!

⁴⁶Haya ndiyo maonyo ya kufundisha mambo ya nyama na ya ndege na ya viumbe vyote vyenye uzima vinavyotembea majini na ya wadudu wote watambaao juu ya nchi,

⁴⁷mpate kuwapambanua walio wachafu nao wanaotakata, ndio nyama wanaoliwa nao wasioliwa.