Ndoa zinazokatazwa.

¹Bwana akamwambia Mose kwamba:

²Sema na wana wa Isiraeli na kuwaambia: Mimi Bwana ni Mungu wenu.[#2 Mose 23:24.]

³Msifanye matendo kama yale ya nchi ya Misri, mlikokaa, wala msifanye matendo kama yale ya nchi ya Kanaani, nitakakowapeleka kukaa huko, wala msiyafuate maongozi yao.

⁴Mtakapoyafanya maamuzi yangu na kuyaangalia maongozi yangu, myafuate, mimi Bwana nitakuwa Mungu wenu.

⁵Kwa hiyo yaangalieni maongozi yangu! Naye mtu ye yote atakayeyafanya maamuzi yangu atapata uzima kwa njia hiyo, maana mimi ni Bwana.[#Neh. 9:29; Ez. 20:11; Rom. 10:5; Gal. 3:12.]

⁶Mtu ye yote asiingie kwa mwenziwe aliye ndugu yake wa kuzaliwa naye, amfunue uchi wake. Maana mimi ni Bwana.

⁷Uchi wa baba yako wala uchi wa mama yako usiufunue; aliye mama yako usimfunue uchi wake.

⁸Uchi wa mkewe baba yako usiufunue. Kwani ndio uchi wa baba yako.[#1 Mose 35:22; 5 Mose 27:20; 1 Kor. 5:1.]

⁹Uchi wa umbu lako aliye binti baba yako au binti mama yako, kama amezaliwa nyumbani mwenu au nje, usiufunue uchi wao hao.

¹⁰Uchi wa binti mwanao, wa kiume au wa kike, usifunue uchi wao hao, kwani ni uchi wako mwenyewe.[#5 Mose 27:22.]

¹¹Uchi wake binti mkewe baba yako, aliyezaliwa na baba yako, usiufunue huo uchi wake, maana ni umbu lako.

¹²Uchi wake umbu lake baba yako usiufunue, maana ni ndugu ya baba yako wa kuzaliwa naye.

¹³Uchi wa ndugu ya mama yako usiufunue. Kwani ni ndugu ya mama yako wa kuzaliwa naye.

¹⁴Uchi wa baba yako mkubwa au mdogo usiufunue, wala mkewe usimkaribie, maana ni mama yako.

¹⁵Uchi wa mkweo aliye mke wa mwanao wa kiume usiufunue huo uchi wake.[#1 Mose 38:16.]

¹⁶Uchi wa mkewe mkubwa au mdogo wako usiufunue, maana ni uchi wa ndugu yako wa kuzaliwa naye.[#Mar. 6:18.]

¹⁷Uchi wa mwanamke usiufunue pamoja nao wa mwanawe wa kike. Wala usimchukue binti mwanawe wa kiume wala binti mwanawe wa kike kuufunua uchi wake. Maana hao wanawake ni ndugu wa kuzaliwa pamoja; huo ndio uzinzi.[#5 Mose 27:23.]

¹⁸Wala usichukue mwanamke ukiwa na ndugu yake wa kike, umtie yule wivu kwa kuufunua uchi wake huyu siku zile, yule akiwa angaliko yu hai.

Mambo mabaya yanayokatazwa.

¹⁹Usimkaribie mwanamke aliye mwenye uchafu kwa kuwa miezini, uufunue uchi wake.[#3 Mose 15:24; Ez. 18:6; 22:10.]

²⁰Usiingie kwa mkewe mwenzako, ulale naye na kumpa mimba, usijipatie uchafu kwake.[#2 Sam. 11:4.]

²¹Namo miongoni mwao walio wa uzao wako usitoe hata mmoja wa kumpa Moloki, wamwingize motoni, usipate kulichafua Jina la Mungu wako. Mimi ni Bwana.[#5 Mose 18:10; 2 Fal. 21:6; Sh. 106:37; Yer. 7:31.]

²²Aliye wa kiume usilale naye, kama unavyolala na mwanamke, maana hayo ni matapisho.[#1 Mose 19:5; Rom. 1:27; 1 Kor. 6:9.]

²³Wala usije kulala na nyama ye yote ukijipatia uchafu kwake, wala mwanamke asisimame mbele ya nyama kupata mimba kwake; huo ndio uchafu mbaya zaidi.

²⁴Usijichafue kwa mambo hayo yote! Kwani kwa kuyafanya hayo yote walijichafua wamizimu wote, nitakaowafukuza mbele yenu.

²⁵Kwa kuwa nchi ilipata kuwa yenye uchafu, nitailipisha huu uovu wake, iwatapike waliokuwa wenyeji huko.

²⁶Lakini ninyi yaangalieni maongozi yangu na maamuzi yangu, msiyafanye hayo matapisho yote, wala ninyi mlio wenyeji wala wageni watakaokuwa kwenu.

²⁷Kwani matapisho hayo yote waliyafanya wao waliokuwako mbele yenu katika nchi hiyo, hata nchi ikapata kuwa yenye uchafu.

²⁸Nanyi mtakapoyafanya, nchi itawatapika kwa kuichafua, kama ilivyowatapika wamizimu waliokuwako mbele yenu.

²⁹Kwani wote watakaoyafanya matapisho hayo, basi, wao watakaoyafanya watang'olewa kwao walio ukoo wao.

³⁰Kwa hiyo yaangalieni, niliyowaambia, yanayowapasa kuyaangalia, msiyafuate na kuyafanya yale maongozi yatapishayo, yaliyofanywa mbele yenu, msijipatie uchafu kwa kuyafanya. Mimi Bwana ni Mungu wenu.