Siku ya mapumziko.

¹Bwana akamwambia Mose kwamba:

²Sema na wana wa Isiraeli ukiwaambia: Sikukuu za Bwana, mtakazozitangaza kuwa za kukutania Patakatifu, hizo sikukuu zangu ndizo hizi:

³Kazi sharti zifanywe siku sita, lakini siku ya saba ni siku ya kupumzika kabisa ya kukutania Patakatifu; hapo isifanywe kazi yo yote, maana ndiyo siku ya mapumziko ya kumheshimu Bwana katika makao yenu yote.[#2 Mose 20:8-11.]

Sikukuu ya Pasaka.

⁴Hizi ndizo sikukuu za Bwana za kukutania Patakatifu, nanyi sharti mzitangaze, siku zao zilizowekwa zitakapotimia:[#2 Mose 23:14-19.]

⁵Katika mwezi wa kwanza siku ya kumi na nne ya mwezi saa za jioni ni Pasaka ya Bwana.[#2 Mose 12.]

⁶Siku ya kumi na tano ya mwezi uo huo ni sikukuu ya Bwana ya Mikate isiyochachwa; ndipo mle siku saba mikate isiyochachwa.

⁷Siku ya kwanza na mkutanie Patakatifu, msifanye kazi yo yote ya utumishi,

⁸ila mmtolee Bwana siku saba ng'ombe za tambiko za kuteketezwa. Siku ya saba mkutanie tena Patakatifu, msifanye kazi yo yote ya utumishi.

Kutoa malimbuko.

⁹Bwana akamwambia Mose kwamba:

¹⁰Sema na wana wa Isiraeli ukiwaambia: Mtakapoingia katika nchi hiyo, nitakayowapa, hapo mtakapoyavuna mavuno yake, mganda wa kwanza wa mavuno yenu sharti mwupeleke kwa mtambikaji.

¹¹Naye aupitishe motoni huo mganda mbele ya Bwana, uwapendezeshe kwake. Kesho yake siku ya mapumziko ndipo mtambikaji aupitishe motoni.[#Mat. 28:1; 1 Kor. 15:20.]

¹²Tena siku hiyo ya kuupitisha mganda wenu motoni sharti mtengeneze mwana kondoo wa mwaka mmoja asiye na kilema kuwa ng'ombe ya tambiko ya Bwana ya kuteketezwa nzima

¹³pamoja na vilaji vyake vya tambiko: pishi moja ya unga mwembamba uliochanganywa na mafuta wa kumteketezea Bwana kuwa mnuko wa kumpendeza, tena kibaba kimoja cha mvinyo kuwa kinywaji chake cha tambiko.

¹⁴Msile mikate ya ngano mpya wala bisi wala chenga za masuke machanga mpaka siku hiyo, mtakapomtolea Mungu wenu vipaji hivyo vya tambiko. Maongozi haya na yawe ya kale na kale kwa vizazi vyenu po pote, mtakapokaa.

Sikukuu ya Pentekote.

¹⁵Kuanzia kesho yake siku ya mapumziko, ni siku ile mlipoupeleka mganda wa kupitishwa motoni, mjihesabie majuma mazima saba, yatimie;[#2 Mose 23:16; 34:22; 4 Mose 28:26-31.]

¹⁶siku zao, mtakazozihesabu mpaka kesho yake siku ya mapumziko ya saba ni siku 50; zikitimia, ndipo mmtolee Bwana vilaji vipya vya tambiko.[#5 Mose 16:9-12.]

¹⁷Makaoni mwenu mtoe mikate miwili ya kupitishwa motoni iliyotengenezwa kwa pishi moja ya unga mwembamba, iliyookwa ilipokwisha kuchachuka, ipate kuwa malimbuko ya Bwana.

¹⁸Pamoja na hiyo mikate sharti mpeleke wana kondoo saba wa mwaka mmoja wasio na vilema na ndama mmoja dume na madume mawili ya kondoo, wawe ng'ombe za tambiko za Bwana za kuteketezwa nzima pamoja na vilaji na vinywaji vyao vya tambiko; vikichomwa moto viwe mnuko mzuri wa kumpendeza Bwana.

¹⁹Kisha sharti mtengeneze dume moja la mbuzi kuwa ng'ombe ya tambiko ya weuo na wana kondoo wawili wa mwaka mmoja kuwa ng'ombe za tambiko za shukrani.

²⁰Kisha mtambikaji awapitishe motoni pamoja na hiyo mikate ya malimbuko kuwa kipaji cha kupitishwa motoni mbele ya Bwana pamoja na hawa wana kondoo wawili; kwa kuwa hawa ni watakatifu wa Bwana, watakuwa mali za watambikaji.

²¹Siku hiyo sharti mtangaze, watu wenu wakutanie Patakatifu, msifanye kazi yo yote ya utumishi. Maongozi haya na yawe ya kale na kale kwa vizazi vyenu po pote, mtakapokaa.

²²Mtakapovuna mavuno ya nchi yenu msikate napo pembeni penye mashamba yenu kupavunia napo, wala msiokoteze viokotezo vya mavuno yenu, ila mviache, viokotezwe na wakiwa na wageni. Mimi Bwana ni Mungu wenu.[#3 Mose 19:9.]

Mwaka mpya.

²³Bwana akamwambia Mose kwamba:[#4 Mose 10:10; 29:1-6.]

²⁴Waambie wana wa Isiraeli kwamba: Katika mwezi wa saba siku ya kwanza ya mwezi iwe kwenu siku ya mapumziko ya ukumbusho wa kupiga baragumu, mtakapokutania Patakatifu.

²⁵Msifanye kazi yo yote ya utumishi, ila mmtolee Bwana ng'ombe za tambiko.

Sikukuu ya Mapoza.

²⁶Bwana akamwambia Mose kwamba:[#3 Mose 16.]

²⁷Siku ya kumi ya huo mwezi wa saba ni siku ya Mapoza, napo ndipo mkutanie Patakatifu pamoja na kujitesa kwa kufunga na kumtolea Bwana ng'ombe ya tambiko ya kuteketezwa.

²⁸Siku hiyo msifanye kabisa kazi yo yote, kwani ndio siku ya Mapoza ya kuwapatia ninyi upozi mbele ya Bwana Mungu wenu.

²⁹Kila asiyejitesa mwenyewe kwa kufunga siku hiyohiyo atang'olewa kwao walio ukoo wake.

³⁰Naye kila atakayefanya kazi yo yote siku hiyohiyo nitamwangamiza kabisa, atoweke katikati yao walio ukoo wake.

³¹Kwa hiyo msifanye kazi yo yote. Maongozi haya na yawe ya kale na kale kwa vizazi vyenu po pote, mtakapokaa.

³²Iwe kwenu siku ya mapumziko ya kupumzika kabisa ya kujitesa kwa kufunga. Sharti mpumzike jioni ile siku ya tisa ya mwezi huo toka hapo jioni, ikiwa jioni tena, mpumzike kwa kuishika hiyo siku yenu ya mapumziko.

Sikukuu ya Vibanda.

³³Bwana akamwambia Mose kwamba:[#2 Mose 23:16; 34:22.]

³⁴Waambie wana wa Isiraeli: Siku ya kumi na tano ya mwezi huo wa saba ni sikukuu ya Bwana ya Vibanda siku saba.[#4 Mose 29:12-39; 5 Mose 16:13-15.]

³⁵Siku ya kwanza na mkutanie Patakatifu, msifanye kazi yo yote ya utumishi.

³⁶Siku saba sharti mmtolee Bwana ng'ombe za tambiko za kuteketezwa; siku ya nane na mkutanie Patakatifu, mmtolee Bwana ng'ombe za tambiko za kuteketezwa, ni siku ya mkutano, kwa hiyo msifanye kazi yo yote ya utumishi.[#Yoh. 7:37.]

³⁷Hizi ndizo sikukuu za Bwana, ndipo mtangaze, watu wakutanie Patakatifu kumtolea Bwana ng'ombe za tambiko za kuteketezwa: za kuteketezwa nzima pamoja na vilaji vya tambiko, tena ng'ombe za tambiko za kuchinjwa pamoja na vinywaji vya tambiko, kila moja siku yake, kama siku inavyopaswa.

³⁸Lakini tena ziko siku za mapumziko za Bwana na vipaji, mnavyovitoa wenyewe, hata vipaji, mnavyovitoa kwa kuyalipa mliyoyaapa, na vipaji vinginevingine, mnavyomtolea Bwana kwa kupendezwa mioyoni.

³⁹Siku ya kumi na tano ya mwezi wa saba, mtakapokuwa mmekwisha kuyachuma mapato ya nchi, sharti mle sikukuu ya Bwna siku saba, siku ya kwanza ni ya mapumziko, nayo ya nane ni ya mapumziko.

⁴⁰Tena siku ya kwanza na mjipatie matunda mazuri ya miti na makuti mabichi ya mitende na matawi ya miti ya maporini na ya mitoni, mmfurahie Bwana Mungu wenu siku saba.[#Neh. 8:14-16.]

⁴¹Siku hiyo iliyo sikukuu ya Bwana sharti mwile kila mwaka siku saba. Maongozi haya na yawe ya kale na kale kwa vizazi vyenu, mwile sikukuu hii siku saba.

⁴²Na mkae vibandani siku saba, wote walio wenyeji kwao Waisiraeli na wakae vibandani.

⁴³Ni kwa kwamba vizazi vyenu wajue, ya kuwa niliwakalisha vibandani nilipowatoa katika nchi ya Misri. Mimi Bwana ni Mungu wenu.

⁴⁴Mose akawaambia wana wa Isiraeli hizo sikukuu za Bwana.