Mbaraka ya Mungu.

¹Msijitengenezee vinyago vilivyo vya bure! Wala msijisimamishie mifano ya Mungu iliyochongwa kwa miti wala ya nguzo zilizoyeyushwa kwa shaba, wala msijipatie katika nchi yenu mawe yenye machorochoro ya kuyaangukia. Kwani mimi Bwana ni Mungu wenu.[#2 Mose 20:4-5.]

²Siku zangu za mapumziko sharti mziangalie, napo Patakatifu pangu sharti mpache. Mimi ni Bwana.[#2 Mose 20:8.]

³Kama mtayafuata maongozi yangu, myaangalie maagizo yangu na kuyafanya,

⁴nitawapa mvua zenu, siku zao zitakapotimia, nchi ipate kuyatoa mazao yake, nayo miti ya mashambani ipate kuyatoa matunda yao.[#5 Mose 11:14.]

⁵Ndipo, siku za kupura zitakapopokelewa na siku za kuchuma zabibu, nazo siku za hayo machumo zitapokelewa na siku za kupanda, nanyi mtakula chakula chenu na kushiba, mkae katika nchi yenu na kutulia.

⁶Maana hiyo nchi nitaipatia utengemano, mpate kulala pasipo kustushwa, nao nyama wabaya nitawatoa katika hiyo nchi, wala upanga hautapita katika nchi yenu.

⁷Mtakapowakimbiza adui zenu, wataangushwa kwa panga mbele yenu.

⁸Watu watano wa kwenu watakimbiza mia, nao mia wa kwenu watakimbiza maelfu kumi; ndivyo, adui zenu watakavyoangushwa kwa panga mbele yenu.

⁹Nami nitwageukia, niwape kuzaa, mpate kuwa wengi, kwani nitalitimiza Agano langu, nililolisimika nanyi.

¹⁰Mtakula ngano za kale zilizowekwa kale, tena hizo za kale mtaziondoa tu, mpate pa kuziwekea mpya.

¹¹Nalo Kao langu nitaliweka katikati yenu, kwa kuwa Roho yangu haitawachukia.

¹²Nitatembea katikati yenu, nami nitakuwa Mungu wenu, nanyi mtakuwa ukoo wangu.[#2 Kor. 6:16.]

¹³Mimi Bwana ni Mungu wenu aliyewatoa katika nchi ya Misri, msiwe watumwa wao, nayo miti ya makongwa yenu nikaivunja, nikawapa kujiendea na kujinyosha.

Matisho ya Mungu.

¹⁴Lakini msiponisikia, msiyafanye maagizo haya yote,

¹⁵myakatae maongozi yangu, roho zenu zikichukiwa na maamuzi yangu, msiyafanye maagizo yangu yote na kulivunja Agano langu,

¹⁶ndipo, mimi nitakapowafanyizia haya: nitatuma kwenu mastusho na kifua kikuu na homa; magonjwa haya yatawapofusha macho yenu na kuzizimiza roho zenu. Mtakapopanda mbegu zenu, itakuwa ya bure, kwani adui zenu watazila.

¹⁷Nao uso wangu nitaugeuza, uwapingie, mpigwe mbele ya adui zenu, nao wachukivu wenu wawatwale; nanyi mtajikimbilia pasipo kuona aliyewakimbiza.

¹⁸Ijapo msinisikie napo hapo, nitaendelea kuwapatiliza mara saba kwa ajili ya ukosaji wenu,

¹⁹niyavunje majivuno yenu yaliyo na nguvu nikizifanya mbingu za kwenu kuwa kama chuma nayo nchi yenu kuwa kama shaba.[#5 Mose 11:17; 1 Fal. 17:1.]

²⁰Ndipo, kazi zenu zitakapokuwa za kusumbuka bure tu, kwani nchi yenu haitatoa mazao yake, wala miti ya hiyo nchi haitazaa matunda yao.

²¹Ijapo hapo napo mwendelee kupingana na mimi na kukataa kusikia, nitaendelea kuwapatia mapigo yaliyo makali mara saba kwa ajili ya ukosaji wenu.

²²Nitatuma kwenu nyama wa porini, wawaue watoto wenu, wawatoweshe nao nyama wenu wa kufuga, nanyi wenyewe watawapunguza, mwe wachache, nazo njia za kwenu ziwe pasipo watu.

²³Ijapo hapo napo msionyeke, mkaendelea kupingana na mimi,

²⁴basi, mimi nami nitaendelea kupingana nanyi mimi mwenyewe nikiwapiga tena mapigo yaliyo makali mara saba kwa ajili ya ukosaji wenu:[#2 Sam. 22:27.]

²⁵nitapeleka kwenu upanga utakaowalipiza kisasi kwa kulivunja Agano; tena mtakapokusanyika mijini mwenu nitatuma kwenu ugonjwa uuao upesi, kisha mtatiwa mikononi mwa adui zenu.[#Yes. 1:20.]

²⁶Kisha nitawanyang'anya nacho chakula kilichowaegemeza, wanawake kumi wawaokee mikate katika jiko moja, kisha watawarudishia mikate yenu na kuwapimia kwa mizani, mle pasipo kushiba.

²⁷Ijapo hapo napo msinisikie, mkaendelea kupingana na mimi,

²⁸nami nitaendelea kupingana nanyi kwa ukali nikiwachapua machapuo yaliyo makali zaidi mara saba kwa ajili ya ukosaji wenu,

²⁹mzile nyama za miili yao wana wenu wa kiume nazo nyama za wana wenu wa kike.[#2 Fal. 6:28.]

³⁰Napo penu pa kutambikia vilimani nitapabomoa, nayo mifano yenu ya jua nitaitowesha, nayo mizoga yenu nitaitupa juu ya vipande vya magogo yenu ya kutambikia, kwani Roho yangu itakuwa imechukizwa nanyi.

³¹Hata miji yenu nitaigeuza kuwa mabomoko tu, nazo nyumba zenu takatifu nitaziacha, ziwe peke yao tu, nisiusikie tena mnuko wenu ulionipendeza.

³²Hata nchi yenu nitaiacha, iwe peke yake tu, adui zenu wapate kuistukia watakapokaa huko.

³³Nanyi wenyewe nitawatawanya kwao wamizimu, kisha na mimi nitauchomoa upanga nyuma yenu; ndipo, nchi yenu itakapokuwa pori tupu, nayo miji yenu itakuwa mabomoko tu.

³⁴Ndipo, nchi yenu itakapopendezwa na kuipata miaka yake ya mapumziko siku zile zote, itakapokuwa pori tupu, ninyi mkikaa katika nchi ya adui zenu. Hapo ndipo, hiyo nchi itakapopumzika kweli na kuilipa miaka yake ya mapumziko.[#3 Mose 25:2; 2 Mambo 36:21.]

³⁵Siku hizo zote za kuwa pori tupu itapata kupumzika, kwa kuwa haikupumzika, ninyi mlipokaa huko na kuinyima miaka ya mapumziko.

³⁶Nao watakaosalia kwenu nitawalegeza mioyo yao, wakikaa katika nchi ya adui zao, shindo la jani kavu linalopeperushwa na upepo liwakimbize, wakimbie, kama watu wanavyokimbizwa na upanga, waanguke, pasipo kuona aliyewakimbiza.

³⁷Wataangukiana wenyewe kwa wenyewe, kama watu wanavyoangukiana kwa kukimbia upanga, lakini hatakuwako mwenye kuwakimbiza; nanyi hamtaweza kuwainukia adui zenu.

³⁸Kule kwa wamizimu ndiko, mtakakoangamia, nayo nchi ya adui zenu ndiyo itakayowala.

³⁹Nao watakaosalia watazimia na kuyeyuka katika nchi ya adui zenu kwa ajili ya manza zao, walizozikora, hata kwa ajili ya manza, baba zao walizozikora, watayeyuka na kuzimia pamoja nao.

Kwa kujuta kwao Mungu huwapokea tena.

⁴⁰Ndipo, watakapoungama, ya kuwa walikora manza, baba zao walizozikora nao, walipoyavunja maagano yangu kwa kuendelea kupingana na mimi.[#5 Mose 4:30; 30:2.]

⁴¹Kwa hiyo mimi nami naliendelea kupingana nao na kuwapeleka katika nchi ya adui zao; lakini hapo, mioyo yao iliyokuwa haikutahiriwa itakapojinyenyekeza kuitikia, ya kuwa walikora manza,[#Yer. 9:26; Luk. 23:41.]

⁴²ndipo, nami nitakapolikumbuka agano, nililolifanya na Yakobo, nalo agano, nililolifanya na Isaka, nalo agano, nililolifanya na Aburahamu, nayo nchi hiyo nitaikumbuka.[#2 Mose 2:24; 2 Fal. 13:23.]

⁴³Lakini kwanza sharti nchi itokwe nao, ipate kuifurahia miaka yake ya mapumziko ikiwa pori tupu kwa kuachwa nao; nao kwanza sharti waitikie, ya kuwa walikora manza walipoyatupa maamuzi yangu, roho zao zikayachukia maongozi yangu.

⁴⁴Lakini hapo napo, watakapokuwa katika nchi ya adui zao, mimi sitawatupa, wala sitawachukia, niwamalize kabisa na kulivunja Agano langu, nililolifanya nao, kwani mimi Bwana ni Mungu wao.

⁴⁵Ila kwa kuwatakia wokovu nitalikumbuka Agano, nililolifanya na baba zao wa kwanza nilipowatoa katika nchi ya Misri machoni pa wamizimu, niwe Mungu wao mimi Bwana.[#1 Mose 15:18; 2 Mose 12:33,51.]

⁴⁶Haya ndiyo maongozi na maamuzi na maonyo, Bwana aliyoyatoa kinywani mwa Mose mlimani kwa Sinai kuwa katikati yake yeye nao wana wa Isiraeli.