Mambo ya ng'ombe za tambiko za upozi.

¹Nayo haya ndiyo maongozi ya ng'ombe za tambiko za upozi: ni takatifu zenyewe.[#3 Mose 5:1-6; 3 Mose 1:3,5.]

²Mahali hapo, wanapozichinja ng'ombe za tambiko za kuteketezwa nzima, papo hapo na wazichinje nazo ng'ombe za tambiko za upozi, nazo damu zao na azinunyize pande zote juu ya meza ya kutambikia.

³Nayo mafuta yote ayatoe humo, ayapeleke: mkia na mafuta yanayoufunika utumbo,

⁴nayo mafigo yote mawili pamoja na mafuta yanayoshikamana nayo penye nyama za viuno na kipande cha ini kilicho pamoja na mafigo; basi, haya yote na ayaondoe.[#3 Mose 3:9-10.]

⁵Kisha mtambikaji na ayachome moto mezani pa kutambikia kuwa moto wa Bwana. Hii ndiyo ng'ombe ya tambiko ya upozi.

⁶Watambikaji wote walio wa kiume na wazile nyama zake; nazo ziliwe mahali patakatifu, maana nazo ni takatifu zenyewe.

⁷Mambo ya ng'ombe za tambiko za weuo yalivyo, ndivyo, nayo ya ng'ombe za tambiko za upozi yalivyo, maongozi yao ni yayo hayo: nyama zitakuwa zake mtambikaji yule aliyempatia upozi mwenye ng'ombe.

⁸Naye mtambikaji akipeleka ng'ombe ya tambiko ya mtu ya kuteketezwa nzima, ngozi ya hiyo ng'ombe ya tambiko ya kuteketezwa nzima itakuwa yake mtambikaji yule aliyeipeleka.[#3 Mose 1:6.]

⁹Navyo vilaji vyote vya tambiko vinavyookwa jikoni, navyo vyote vilivyotengenezwa chunguni au kangoni vitakuwa vyake mtambikaji yule aliyevipeleka.[#3 Mose 2:4-5,7.]

¹⁰Navyo vilaji vyote vya tambiko vilivyochanganywa na mafuta navyo vilivyo vikavu vitakuwa vyao wana wote wa Haroni, wavitumie kila mtu na ndugu yake.

Mambo ya ng'ombe za tambiko za shukrani.

¹¹Haya ndiyo maongozi ya ng'ombe za tambiko za shukrani, mtu atakazomtolea Bwana:[#3 Mose 3.]

¹²Mtu akiitoa kuwa ya sifa, na aitoe hiyo ng'ombe ya tambiko ya sifa pamoja na vikate visivyochachwa, vilivyochanganywa na mafuta, na unga mwembamba wa vitumbua wa kutengeneza vikate vilivyochanganywa na mafuta.[#3 Mose 22:29.]

¹³Hili toleo lake alipeleke pamoja na mikate ilivyochachwa na pamoja na ng'ombe yake ya tambiko ya shukrani, atakayoitoa kuwa ya sifa.

¹⁴Katika hayo matoleo yote na atoe moja la kumnyanyulia Bwana; nalo ni lake mtambikaji yule atakayeinyunyiza damu ya ng'ombe ya tambiko ya shukrani.

¹⁵Nazo nyama za hiyo ng'ombe ya tambiko ya shukrani iliyo ya sifa na ziliwe siku hiyo ya kutolewa kwake, wasiziweke mpaka kesho.[#3 Mose 19:6; 22:30.]

¹⁶Akiitoa hiyo ng'ombe yake ya tambiko kwa ajili ya kiapo au kwa mapenzi yake mwenyewe, nyama zake hiyo ng'ombe ya tambiko na ziliwe siku hiyo ya kutolewa kwake, hata kesho yake masao yake yatalika.

¹⁷Lakini nyama za hiyo ng'ombe ya tambiko zitakazosazwa mpaka siku ya tatu sharti ziteketezwe kwa moto.

¹⁸Kama nyama za ng'ombe yake ya tambiko ya shukrani zingeliwa siku ya tatu, mwenye kuitoa asingependeza, wala asingewaziwa kuwa mwenye kuitoa, ila zitakuwa machukizo tu, naye kila mtu atakayezila atakuwa amekora manza.

¹⁹Nazo nyama zilizogusana nacho cho chote kilicho kichafu zisiliwe, ila ziteketezwe kwa moto. Nyama nyingine za tambiko kila atakataye atazila hizo nyama.

²⁰Lakini kila mtu atakayekula nyama za ng'ombe ya tambiko ya shukrani zilizo zake Bwana, akiwa mwenye uchafu, basi, roho yake huyo mtu na ing'olewe, atoweke kwenye watu wa kabila lake.

²¹Tena mtu akigusa cho chote chenye uchafu, kama ni mtu aliye na uchafu wake au nyama chafu au tapisho lo lote linalochafua, naye akila nyama za ng'ombe ya tambiko ya shukrani zilizo zake Bwana, basi, roho yake huyo mtu na ing'olewe, atoweke kwenye watu wa kabila lake.

Mwiko wa mafuta na wa damu.

²²Bwana akamwambia Mose kwamba:

²³Waambie wana wa Isiraeli kwamba: Mafuta yote ya ng'ombe na ya kondoo na ya mbuzi msiyale![#3 Mose 3:17.]

²⁴Tena mafuta ya nyama aliyekufa kibudu nayo mafuta ya nyama aliyeraruliwa na nyama mwingine mtayatumia ya kazi yo yote, lakini kula msiyale![#2 Mose 22:31.]

²⁵Kwani kila atakayekula mafuta ya nyama, watu wanayomtolea Bwana kuchomwa motoni, basi, roho yake huyo mtu aliyeyala na ing'olewe, atoweke kwenye watu wa kabila lake.

²⁶Nazo damu zote pia msizile mahali po pote, mtakapokaa, wala za ndege wala za nyuma.[#3 Mose 3:17.]

²⁷Kila mtu atakayekula damu zo zote roho yake na ing'olewe, atoweke kwenye watu wa kabila lake.

Haki ya watambikaji wakitoa ng'ombe za tambiko za shukrani.

²⁸Bwana akamwambia Mose:

²⁹Waambie wana wa Isiraeli kwamba: Atakayemtolea Bwana ng'ombe yake ya tambiko ya shukrani sharti ampelekee Bwana toleo lake, alilolitoa katika hiyo ng'ombe yake ya tambiko ya shukrani.

³⁰Mikono yake mwenyewe na iyapeleke yatakayochomwa kwa moto wa Bwana, ni mafuta pamoja na kidari; akiyapeleka haya, kidari na wakipitishe motoni mbele ya Bwana, kiwe kipaji cha tambiko cha kupitishwa motoni.[#2 Mose 29:24.]

³¹Kisha mtambikaji na ayachome moto yale mafuta mezani pa kutambikia, lakini kidari kitakuwa chao Haroni na wanawe.

³²Nayo mapaja ya kuume ya ng'ombe zenu za tambiko za shukrani sharti mwape watambikaji kuwa vipaji vya tambiko vya kunyanyuliwa.[#3 Mose 9:21.]

³³Atakayetoa damu za ng'ombe za tambiko za shukrani pamoja na mafuta yao miongoni mwa wana wa Haroni, basi, lile paja la kuume ni fungu lake yeye, atakalolipata.

³⁴Kwani vidari vya kupitishwa motoni na mapaja ya kunyanyuliwa ninayachukua kwa wana wa Isiraeli katika ng'ombe zao za tambiko za shukrani, nimpe mtambikaji Haroni na wanawe kuwa haki yao ya kale na kale kwao wana wa Isiraeli.

³⁵Haya ndiyo, Haroni na wanawe watakayoyapata kwenye mioto ya Bwana kwa hivyo, walivyopakwa mafuta; Bwana aliwagawia haya siku ile, alipowatoa kuwa watambikaji wake.

³⁶Siku ile, Bwana alipowapaka mafuta, aliwaagiza wana wa Isiraeli, wawape haya, nayo ni haki ya kale na kale ya vizazi vyao.

³⁷Haya ndiyo malinganyo ya kutumia ng'ombe za tambiko za kuteketezwa nzima na vilaji vya tambiko na ng'ombe za tambiko za weuo na za upozi na za kujazwa gao nazo ng'ombe za tambiko za shukrani.[#3 Mose 6:20.]

³⁸Ndiyo, Bwana aliyomwagiza Mose mlimani kwa Sinai siku ile, alipowaagiza wana wa Isiraeli kumtolea Bwana matoleo yao katika nyika ya Sinai.