Matangulizi.

¹Wengi walijaribu kuandika masimulio ya mambo yale yaliyotimilika kwetu.

²Waliyafuatafuata yale waliyoambiwa na wenye kuyaona yote kwa macho yao, yalivyokuwa tangu mwanzo, kwani walikuwa wamelitumikia lile Neno.

³Sasa nami nimeyafuata na kuyachungua yote mpaka hapo, yalipoanzia, nikaona, inafaa, nikuandikie sawasawa, kama yalivyofuatana, mwenzangu Teofilo,[#Tume. 1:1.]

⁴upate kutambua, ya kuwa mambo yale uliyofundishwa ni ya kweli.

Zakaria na Elisabeti.

⁵Siku zile, Herode alipokuwa mfalme wa Wayuda, palikuwa na mtambikaji wa chama cha Abia, jina lake Zakaria, naye mkewe alikuwa na wana wa Haroni, jina lake Elisabeti.[#1 Mambo 24:10,19.]

⁶Wote wawili walikuwa waongofu machoni pa Mungu, wakaendelea na kuyashika maagizo na maongozi yote ya Bwana, watu wasione la kuwaonya.

⁷Lakini walikuwa hawana mtoto, kwani Elisabeti alikuwa mgumba, nayo miaka yao wote wawili ilikuwa mingi.

Zakaria Nyumbani mwa Mungu.

⁸Chama chake kilipofikiwa na zamu, akaenda kufanya kazi yake ya utambikaji mbele ya Mungu;

⁹kwa desturi yao ya utambikaji yeye akapata kuvukiza, akaingia katika Jumba la Bwana.[#2 Mose 30:7.]

¹⁰Nalo kundi lote la watu wengi lilikuwa nje, wakiombea saa ileile ya kuvukiza.

¹¹Malaika wa Bwana akamtokea akisimama mezani pa kuvukizia kuumeni kwake.

¹²Zakaria alipomwona akahangaika, woga ukamguia;

¹³lakini malaika akamwambia: Usiogope, Zakaria! Kwani ombo lako limesikiwa: mkeo Elisabeti atakuzalia mtoto mwanamume, nawe utamwita jina lake Yohana.

¹⁴Wewe utafurahi na kushangilia, hata wengine wengi watakufurahia kuzaliwa kwake.

¹⁵Kwani atakuwa mkubwa machoni pa Bwana; pombe na vileo vyo vyote hatakunywa, lakini atajazwa Roho takatifu papo hapo, atakapozaliwa na mama yake.[#4 Mose 6:3; Amu. 13:4-5.]

¹⁶Atageuza wana wa Isiraeli wengi, warudi kwa Bwana Mungu wao.

¹⁷Mwenyewe atamtangulia Bwana akiwa mwenye roho na nguvu za Elia, aigeuze mioyo ya baba, warudi kwa watoto, awageuze nao wabishi, waufuate ujuzi wa waongofu, amlinganyizie Bwana watu waliojitengeneza.[#Mal. 3:1; 4:5-6; Mat. 17:11-13.]

¹⁸Zakaria akamwambia malaika: Haya nitayatambuaje? Maana mimi ni mzee, nayo miaka ya mke wangu imekuwa mingi.[#1 Mose 18:11; Rom. 4:19.]

¹⁹Malaika akajibu, akamwambia: Mimi ni Gaburieli ninayesimama mbele ya Mungu; nimetumwa kusema na wewe, nikupigie mbiu hii njema.[#Dan. 8:16; Ebr. 1:14.]

²⁰Tazama, utakuwa bubu, usiweze kusema mpaka siku hiyo, hayo yatakapokuwapo, kwa sababu hukuyaitikia maneno yangu; nayo yatatimia, siku zao zitakapofika.

²¹Wale watu waliokuwa wakimngoja Zakaria, wakastaajabu kukawia kwake katika Jumba la Mungu.

²²Alipotoka hakuweza kusema nao; ndipo, walipotambua, ya kuwa yako mambo, aliyoyaona katika Jumba la Mungu. Naye akawapungia kwa mkono, akakaa kuwa bubu.

²³Ikawa, siku za utambikaji wake zilipomalizika, akaondoka, akaenda nyumbani mwake.

²⁴Lakini baada ya siku zile mkewe Elisabeti akapata mimba, akajificha miezi mitano, akasema:

²⁵Ndivyo, alivyonitendea Bwana siku hizi akinitazama, aiondoe soni, niliyokuwa nayo kwa watu.[#1 Mose 30:23.]

²⁶Mwezi wa sita malaika Gaburieli akatumwa na Mungu kwenda katika mji wa Galilea, jina lake Nasareti,

²⁷amfikie mwanamwali aliyeposwa na mume, jina lake Yosefu, wa mlango wa Dawidi; yule mwanamwali jina lake Maria.[#Luk. 2:5; Mat. 1:16,18.]

²⁸Alipoingia mwake akasema: Salamu kwako, kwani yako uliyogawiwa! Bwana yuko pamoja na wewe uliye mwenye kipaji kinachovipita vya wanawake wengine.

²⁹Alipohangaika kwa neno hili akifikiri kwamba: Huyu ananiamkia kwa namna gani?

³⁰malaika akamwambia: Usiogope, Maria! Kwani umepata gawio jema kwa Mungu.

³¹Tazama, utapata mimba, utazaa mtoto mwana mume, nalo jina lake utamwita YESU.[#Yes. 7:14; Mat. 1:21-23.]

³²Ndiye atakayekuwa mkuu, ataitwa Mwana wake Alioko huko juu, naye Bwana Mungu atampa kiti cha kifalme cha baba yake Dawidi,[#2 Sam. 7:12-13,16.]

³³atautawala mlango wa Yakobo kale na kale, ufalme wake usiwe na mwisho.

³⁴Maria akamwambia malaika: Hili litakuwaje? kwani sijajua mume.

³⁵Malaika akajibu akimwambia: Roho Mtakatifu atakujia, nguvu zake Alioko huko juu zitakufunika kama wingu; kwa hiyo hata mtakatifu atakayezaliwa ataitwa Mwana wake Mungu.[#Mat. 1:18,20; Yoh. 8:23.]

³⁶Tazama, naye ndugu yako Elisabeti ana mimba ya mtoto mume katika uzee wake, mwezi huu ni wake wa sita, tena alikuwa ameitwa mgumba;

³⁷kwani hakuna jambo lisilowezekana kwa Mungu.[#1 Mose 18:14.]

³⁸Maria akasema: Tazama, mimi ni kijakazi wa Bwana! Yaniwie, kama ulivyosema! Kisha malaika akaondoka kwake.

³⁹Siku hizo Maria akainuka, akaenda upesi milimani kufika katika mji wa Yuda.

⁴⁰Akaingia nyumbani mwa Zakaria, akamwamkia Elisabeti.

⁴¹Ikawa, Elisabeti aliposikia, Maria anavyomwamkia, kitoto kikarukaruka tumboni mwake, kisha Elisabeti akajazwa Roho takatifu,[#Luk. 1:15.]

⁴²akapaza sauti kwa nguvu akisema: Wewe umebarikiwa kuliko wanawake wengine, naye mzao wa tumbo lako amebarikiwa.[#Luk. 1:28; 11:27-28.]

⁴³Tena ni kwa sababu gani, mama yake Bwana wangu akinijia?

⁴⁴Kwani sauti yako ya kuniamkia iliponiingia masikioni, mara kitoto tumboni mwangu kilirukaruka kwa kushangilia.

⁴⁵Wewe uliyemtegemea Mungu utakuwa mwenye shangwe, kwani yatatimizwa hayo, uliyoambiwa na Bwana.[#Luk. 11:28.]

Wimbo wa Maria.

⁴⁶Maria akasema:

Bwana ndiye, moyo wangu unayemkuza,

⁴⁷roho yangu humshangilia Mungu, mwokozi wangu.

⁴⁸Maana ameutazama unyenyekevu wa kijakazi wake;

kwani tokea sasa itakuwa, wao wa vizazi vyote wanishangilie.

⁴⁹Amenifanyia makuu kwa kuwa mnguvu, Jina lake ni

takatifu.

⁵⁰Huruma yake huwajia vizazi kwa vizazi wamwogopao.[#Sh. 103:13,17.]

⁵¹Hufanya ya nguvu kwa mkono wake

akiwatawanya waliojikweza katika mawazo ya mioyo yao.

⁵²Huangusha wenye nguvu katika viti vya kifalme,

lakini wao walio wanyenyekevu huwapandisha.

⁵³Walio wenye njaa huwashibisha mema,

lakini wenye mali huwaacha, wajiendee mikono mitupu.

⁵⁴Alipokumbuka huruma, akamsaidia mtoto wake Isiraeli,

⁵⁵kama alivyowaambia baba zetu, akina Aburahamu

nao walio uzao wake kwamba: Wawe wa kale na kale!

⁵⁶Maria akakaa kwake, yapata miezi mitatu, kisha akarudi nyumbani kwake.

Kuzaliwa kwake Yohana.

⁵⁷Elisabeti siku zake za kuzaa zilipotimia, akazaa mtoto mume.

⁵⁸Majirani zake na ndugu zake waliposikia, ya kuwa Bwana amemwonea huruma nyingi, wakafurahi pamoja naye.

⁵⁹Ilipokuwa siku ya nane, wakaja kumtahiri mtoto, wakamwita jina la baba yake: Zakaria.[#1 Mose 17:12.]

⁶⁰Lakini mama yake akakataa akisema: Sivyo, sharti aitwe Yohana![#Luk. 1:13.]

⁶¹Wakamwambia: Hakuna mtu katika ndugu zako aitwaye jina hili.

⁶²Walipompungia baba yake na kumwuliza jina, alilolitaka, mtoto aitwe,

⁶³akataka kibao, akaandika na kusema: Yohana ndilo jina lake. Wakastaajabu wote.

⁶⁴Mara hiyo akafunguka kinywa chake na ulimi wake, akasema na kumtukuza Mungu.

⁶⁵Ndipo, woga ulipowashika wote waliokaa kando kando yao; mambo hayo yote yakasimuliwa milimani po pote pa Yudea.

⁶⁶Wote walioyasikia wakayaweka mioyoni mwao, wakasema: Basi, huyu mtoto atakuwa wa namna gani? Kwani mkono wa Bwana ulikuwa pamoja naye.

Wimbo wa Zakaria.

⁶⁷Baba yake Zakaria akajazwa Roho takatifu, akafumbua yatakayokuwa akisema:

⁶⁸*Atukuzwe Bwana Mungu wa Isiraeli! kwani amewakagua wao wa ukoo wake na kuwapatia ukombozi.[#Luk. 7:16.]

⁶⁹Ametusimikia pembe ya wokovu katika mlango wa mtoto wake Dawidi,[#1 Sam. 2:10; Sh. 132:17.]

⁷⁰kama alivyosema kale kwa vinywa vya wafumbuaji wake watakatifu.

⁷¹Akatupatia wokovu kwao walio adui zetu namo mikononi mwao wote wanaotuchukia.

⁷²Aliwahurumia baba zetu, akalikumbuka Agano lake takatifu[#1 Mose 17:7; 3 Mose 26:42.]

⁷³nacho kiapo chake, alichomwapia baba yetu Aburahamu kwamba:[#1 Mose 22:16-17; Mika 7:20.]

⁷⁴Tupate kukombolewa mikononi mwa adui zetu, tukae pasipo woga na kumtumikia siku zetu zote[#Tit. 2:12,14.]

⁷⁵tukiwa mbele yake wenye utakaso na wongofu.

⁷⁶Nawe kitoto, utaitwa mfumbuaji wake Alioko huko juu, utatangulia mbele ya Bwana, uzitengeneze njia zake[#Mal. 3:1; Mat. 3:3.]

⁷⁷na kuwatambulisha wao wa ukoo wake wokovu wao, ya kuwa uko katika kuondolewa makosa yao.[#Yer. 31:34.]

⁷⁸Tukivipata hivi, ni kwa huruma zilizomo moyoni mwake Mungu wetu; kwa hiyo umetukagua mwanga unaotoka juu,[#4 Mose 24:17; Yes. 60:1-2; Mal. 4:2.]

⁷⁹uwaangaze wanaokaa gizani kwenye kivuli kuuacho, uelekeze miguu yetu, ishike njia ya utengemano.[#Yes. 9:1-2.]

⁸⁰Yule mtoto alipokua akapata nguvu Rohoni, akakaa nyikani mpaka siku, alipowatokea Waisiraeli.*[#Mat. 3:1.]