Kuzaliwa kwake Yesu.

¹*Ikawa siku zile, amri ikitoka kwa Kaisari Augusto, walimwengu wote waandikiwe kodi;

²huko kuandikwa kulikuwa kwa kwanza, kukawa siku zile, Kirenio alipotawala Ushami.

³Ndipo, watu wote waliposhika njia za kwenda kuandikiwa kodi, kila mtu akaenda mjini kwao.

⁴Yosefu naye akaondoka Galilea katika mji wa Nasareti kwenda Yudea katika mji wa Dawidi unaoitwa Beti-Lehemu, kwa kuwa yeye alikuwa wa mlango na wa udugu wa Dawidi.

⁵Akaenda pamoja na mkewe Maria aliyeposwa naye, waandikiwe kodi; naye alikuwa ana mimba.[#Luk. 1:27.]

⁶Ikawa, walipokaa huko, siku zake za kuzaa zikatimia.

⁷Akamzaa mwana wake wa kwanza, ni wa kiume, akamvika nguo za kitoto, akamlaza waliamo ng'ombe, kwani hawakupata pengine nyumbani mwa wageni.[#Mat. 1:25.]

⁸Kulikuwa na wachungaji katika nchi ileile, walilala malishoni na kulilinda kundi lao kwa zamu ya usiku.

⁹Ndiko, malaika wa Bwana alikowatokea, nao utukufu wa Bwana ukawamulikia po pote, wakashikwa na woga mwingi.

¹⁰Lakini malaika akawaambia: Msiogope! kwani tazameni, ninawapigia mbiu njema yenye furaha kuu itakayowajia watu wote.

¹¹Kwani mmezaliwa leo mwokozi wenu katika mji wa Dawidi, ndiye Bwana Kristo.

¹²Nacho kielekezo chenu ni hiki: mtaona kitoto kichanga, kimevikwa nguo za kitoto, kimelazwa waliamo ng'ombe.

¹³Mara wakawa pamoja na yule malaika wingi wa vikosi vya mbinguni, wakamsifu Mungu wakiimba:[#Dan. 7:10.]

¹⁴Utukufu ni wa Mungu mbinguni juu,

nchini uko utengemani kwa watu wampendezao.

¹⁵*Ikawa, malaika walipoondoka kwao kwenda mbinguni, wachungaji wakasemezana wao kwa wao: Haya! Twende, tufike hata Beti-Lehemu, tulitazame jambo hilo lililokuwapo, Bwana alilotutambulisha!

¹⁶Wakaenda mbio, wakawakuta, akina Maria na Yosefu na kitoto kichanga, kimelazwa waliamo ng'ombe.

¹⁷Walipokwisha kumwona wakalitambulisha lile neno, waliloambiwa na kitoto hiki.[#Luk. 2:10-12.]

¹⁸Ndipo, wote walioyasikia walipoyastaajabu, waliyoambiwa na wachungaji.

¹⁹Lakini Maria akayashika maneno hayo yote, akayaweka moyoni mwake na kuyawaza.[#Luk. 2:51.]

²⁰Kisha wachungaji wakarudi wakimtukuza Mungu na kumsifu kwa yote, waliyoyasikia, kwani waliona, ni vivyo, kama walivyoambiwa.*

Kutahiriwa.

²¹*Siku nane za kumtahiri zilipotimia, akaitwa jina lake YESU, lililotajwa na malaika, mama yake alipokuwa hajapata mimba yake.*[#Luk. 1:31,59; 1 Mose 17:12.]

Simeoni.

²²*Siku zao zilipotimia za weuo, aliouagiza Mose, wakampeleka Yerusalemu, wamtokeze kwake Bwana.[#3 Mose 12.]

²³Ndivyo, ilivyoandikwa katika Maonyo ya Bwana:

Kila mtoto mume atakayezaliwa wa kwanza na mama yake

aitwe mtakatifu wa Bwana!

²⁴Wakatoa vipaji vya kumkomboa, kama ilivyoagizwa katika Maonyo ya Bwana, hua wawili au makinda mawili ya njiwa manga.[#3 Mose 12:8.]

²⁵*Huko Yerusalemu kulikuwa na mtu, jina lake Simeoni. Mtu huyo alikuwa mwongofu mwenye kumcha Mungu, akaungoja utulivu wa Isiraeli; nayo Roho takatifu ilikuwa naye.[#Yes. 40:1; 49:13.]

²⁶Huyo alikuwa amefumbuliwa na Roho Mtakatifu kwamba: Hutaona kufa usipomwona kwanza Kristo wa Bwana.

²⁷Basi, akaja Patakatifu kwa kuongozwa na Roho. Wazazi walipoingia na mtoto Yesu, wamfanyie, kama walivyozoezwa na Maonyo,

²⁸mwenyewe akampokea mikononi pake, akamtukuza Mungu akisema:

²⁹Bwana, sasa unampa mtumwa wako ruhusa,

aende zake na kutulia, kama ulivyosema.

³⁰Kwani macho yangu yameuona wokovu wako,

³¹ulioutengeneza machoni pa makabila yote:

³²ni mwanga wa kuwamulikia wamizimu,

ukoo wako wa Isiraeli utukuzwe.*

³³Baba yake na mama yake walipokuwa wakiyastaajabu aliyosemewa,[#Yes. 8:14; Mat. 21:42; Tume. 28:22; 1 Kor. 1:23.]

³⁴Simeoni akawabariki, akamwambia Maria, mama yake: Tazama, huyu ndiye aliyewekewa, wengi walio Waisiraeli waangushwe naye, nao wengine wengi wainuliwe naye; tena amewekewa kuwa kielekezo kinachobishiwa.

³⁵Nawe wewe upanga utakuchoma moyoni, kusudi mawazo yao wengi yaliyomo mioyoni mwao yafunuke.

Ana.

³⁶Kukawa na mfumbuaji wa kike, jina lake Ana, binti Fanueli, wa shina la Aseri. Huyo miaka yake ilikuwa mingi sana; alikuwa amekaa pamoja na mumewe miaka saba baada ya kuwa manamwali.

³⁷Tena siku hizo alikuwa mjane mwenye miaka 84, lakini hakuondoka Patakatifu akimtumikia Mungu usiku na mchana kwa kufunga na kuombea watu.[#Tume. 26:7; 1 Tim. 5:5.]

³⁸Naye akawajia saa ileile, akamshukuru Mungu waziwazi, akawaambia mambo ya huyo mtoto wote walioungoja ukombozi wa Yerusalemu.[#Yes. 52:9.]

³⁹Walipokwisha kuyamaliza yote yaliyoagizwa na Maonyo ya Bwana wakarudi Galilea mjini kwao Nasareti.

⁴⁰Lakini yule mtoto akakua, akapata nguvu ya Roho na werevu wote wa kweli, naye Mungu akamgawia mema yake.*[#Luk. 1:80; 2:52.]

Yesu mwenye miaka 12 Nyumbani mwa Mungu.

⁴¹*Wazazi wake huenda Yerusalemu kila mwaka kula sikukuu ya Pasaka.[#2 Mose 23:14-17.]

⁴²Naye alipopata miaka 12, wakakwea naye, kama walivyozoea kwenye hiyo sikukuu.

⁴³Zile siku zilipomalizika, wakarudi, lakini mtoto wao Yesu akasalia Yerusalemu, wazazi wake wasijue.[#2 Mose 12:18.]

⁴⁴Wakadhani, yumo katika wenzake wa njiani. Wakaenda mwendo wa siku moja, kisha wakamtafuta kwa ndugu zao na kwa wenzi wao.

⁴⁵Wasipomwona wakarudi Yerusalemu wakimtafuta.

⁴⁶Siku tatu zilipopita, wakamwona Patakatifu, amekaa katikati ya wafunzi akiwasikiliza na kuulizana nao,

⁴⁷nao wote waliomsikia wakaustukia sana ujuzi wake wa kujibu.

⁴⁸Walipomwona wakashangaa, mama yake akamwmbia: Mwanangu, mbona umetufanyia hivyo? Tazama, baba yako na mimi tumekutafuta kwa uchungu.

⁴⁹Akawaambia: Mwanitafutiani? Hamkujua, ya kuwa imenipasa kuwa mwake Baba yangu?[#Yoh. 2:16.]

⁵⁰Wao hawakulijua maana neno hili, alilowaambia.

⁵¹Kisha akatelemka pamoja nao, akafika Nasareti, akakaa na kuwatii. Naye mama yake akayashika maneno hayo yote moyoni mwake.[#Luk. 2:19.]

⁵²Yesu akakua na kuongezeka werevu wa kweli, mpaka akiwa mtu mzima, tena akawa akimpendeza Mungu na watu.*[#1 Sam. 2:26; Fano. 3:4.]