Kukonyoa masuke.

¹Akawa akipita katika mashamba siku ya mapumziko; l nao wanafunzi wake wakakonyoa masuke, wakayafikicha kwa mikono, wakala.

²Lakini walikuwako Mafariseo waliosema: Mbona mnafanya yaliyo mwiko siku ya mapumziko?

³Yesu akawajibu akisema: Hamkuvisoma hata hivyo, Dawidi alivyovifanya, walipoona njaa yeye nao wenziwe waliokuwa pamoja naye?[#1 Sam. 21:6.]

⁴Hapo aliingia Nyumbani mwa Mungu, akaitwaa mikate aliyowekewa Bwana, akaila, akawapa nao wenziwe. Nayo kuila ni mwiko, huliwa na watambikaji peke yao.[#3 Mose 24:9.]

⁵Akawaambia: Mwana wa mtu ni bwana wa siku ya mapumziko.

Mkono wa kupooza.

⁶Ikawa siku nyingine ya mapumziko, akaingia nyumbani mwa kuombea, akafundisha. Mle mlikuwa na mtu, ambaye mkono wake wa kuume ulikuwa umekaukiana.[#Luk. 13:10-17.]

⁷Waandishi na Mafariseo wakamtunduia, kama atamponya siku ya mapumziko, waone neno la kumsuta.[#Luk. 14:1-6.]

⁸Naye akayajua mawazo yao, akamwambia yule mwenye mkono uliokaukiana: Inuka, usimame hapa katikati! Akainuka, akasimama hapo.

⁹Kisha Yesu akawaambia: Nawauliza ninyi: Iko ruhusa siku ya mapumziko kufanya mema au kufanya maovu? kuponya roho ya mtu au kuiangamiza?

¹⁰Akawatazama wote waliokuwako, akamwambia: Unyoshe mkono wako! Alipovifanya, huo mkono wake ukageuka kuwa mzima.

¹¹Wale wakawa kama wenye wazimu, wasijue kitu, wakasemezana wao kwa wao, watakayomtendea Yesu.

Kuwachagua Mitume 12.

¹²Ikawa siku zile, akatoka kwenda mlimani kuomba; akakesha kucha katika kumwomba Mungu.

¹³Kulipokucha, akawaita wanafunzi wake, akachagua miongoni mwao kumi na wawili; ndio aliowapa jina la Mitume.[#Mat. 10:2-4; Tume. 1:13.]

¹⁴Ni Simoni, aliyempa jina la Petero, na Anderea nduguye, na Yakobo na Yohana na Filipo na Bartolomeo

¹⁵na Mateo na Toma na Yakobo wa Alfeo na Simoni aliyeitwa Zelote

¹⁶na Yuda wa Yakobo na Yuda Iskariota, ndiye aliyekuwa mchongezi.

¹⁷Akashuka pamoja nao, akasimama mahali penye uwanda; hapo palikuwa na kundi zima la wanafunzi wake wengi na watu wengine wengi sana waliotoka Yudea po pote na Yerusalemu na pwani pa Tiro na Sidoni;

¹⁸ndio waliokuja, wamsikilize yeye, waponywe magonjwa yao. Nao waliosumbuliwa na pepo wachafu wakaponywa.

¹⁹Wale watu wote wakatafuta kumgusa tu, kwani nguvu zilizotoka kwake ziliwaponya wote.

Watu wenye kubarikiwa nao wenye kuapizwa.

²⁰Kisha akainua macho, akawatazama wanafunzi wake, akasema: Wenye shangwe ni ninyi mlio maskini, maana ufalme wa Mungu ni wenu.[#Yak. 2:5.]

²¹Wenye shangwe ni ninyi mnaoona njaa sasa, maana mtashibishwa.[#Sh. 126:5-6; Yes. 61:3; Ufu. 7:16-17.]

²²Wenye shangwe ni ninyi, watu watakapowachukia na kuwatenga kwao na kuwatukana na kuyakataa majina yenu kwa kuwa mabaya kwa ajili ya Mwana wa mtu.[#Yoh. 15:18.]

²³Furahini siku ile na kurukaruka! Kwani tazameni, mshahara wenu ni mwingi mbinguni! Kwani hivyo ndivyo, baba zao walivyowafanyia wafumbuaji.

²⁴Lakini yatawapata ninyi wenye mali, kwani mmekwisha upata utulivu wenu.[#Mat. 19:23; Yak. 5:1.]

²⁵Yatawapata nanyi mnaoshiba sasa, kwani mtaona njaa. Yatawapata ninyi mnaocheka sasa, kwani mtasikitika na kulia.[#Yes. 5:22.]

²⁶Yatawapata ninyi, watu wote wanapowaendea kwa maneno mazuri, kwani hivyo ndivyo, baba zao walivyowafanyia wafumbuaji wa uwongo.[#Mika 2:11; Yak. 4:4.]

Kupenda na kugawia.

²⁷Lakini nawaambia ninyi mnaonisikia: Wapendeni adui zenu! Wafanyieni mazuri wanaowachukia![#1 Kor. 4:12.]

²⁸Wabarikini wanaowaapiza! Waombeeni wanaowabeza!

²⁹Mtu akikupiga kofi shavu moja, umgeuzie la pili, alipige nalo! Mtu anayekunyang'anya kanzu yako, usimkataze kuichukua hata shuka!

³⁰Kila anayekuomba umpe, naye akunyang'anyaye mali zako, usizitake tena kwake!

³¹Kama mnavyotaka, watu wawafanyie ninyi, nanyi mwafanyie vivyo hivyo![#Mat. 7:12.]

³²Maana mkiwapenda wanaowapendani mnawagawia nini? Kwani nao wakosaji huwapenda wawapendao.

³³Nanyi mnapowafanyia mema wanaowafanyia mema ninyi mnawagawia nini? Nao wakosaji hufanya hivyo hivyo.

³⁴Nanyi mnapokopesha watu, mnaowangojea kurudishiwa nao, mnawagawia nini? Nao wakosaji huwakopesha wakosaji wenzao, warudishiwe yaleyale.[#3 Mose 25:35-36.]

³⁵Lakini wapendeni wachukivu wenu! Wafanyieni mema na kuwakopesha, msiowangojea kurudishiwa cho chote! Hivyo mshahara wenu utakuwa mwingi, nanyi mtakuwa wana wake Alioko huko juu. Kwani yeye huwagawia nao wenye majivuno nao wenye ubaya.

³⁶*Mgeuke kuwa wenye huruma, kama Baba yenu alivyo mwenye huruma!

³⁷Msiumbue watu, nanyi msije mkaumbuliwa! Msionee watu, nanyi msije mkaonewa! Wafungueni watu, nanyi mje mkafunguliwa![#Mat. 6:14.]

³⁸Wapeni watu, nanyi mje mkapewa! Kipimo kizuri kilichoshindiliwa na kutingishwa na kumwagika mtapewa, mfutikie katika nguo zenu. Kwani kipimo, mnachokipimia wengine, ndicho, mtakachopimiwa nanyi tena.[#Mar. 4:24.]

Kibanzi cha jichoni.

³⁹Akawaambia mfano: Je? Kipofu aweza kumwongoza kipofu mwenziwe? Hawatatumbukia wote wawili shimoni?[#Mat. 15:14.]

⁴⁰Mwanafunzi hampiti mfunzi wake, lakini kila aliyekwisha fundishwa atakuwa, kama mfunzi wake alivyo.[#Mat. 10:24-25; Yoh. 15:20.]

⁴¹Nawe unakitazamiani kibanzi kilichomo jichoni mwa ndugu yako, lakini gogo lililomo jichoni mwako wewe mwenyewe hulioni?

⁴²Unawezaje kumwambia ndugu yako: Ngoja, ndugu yangu, nikitoe kibanzi kilichomo jichoni mwako? Nalo gogo lililomo jichoni mwako mwenyewe hulioni? Mjanja, kwanza litoe gogo katika jicho lako! Kisha utazame vema, ndivyo upate kukitoa kibanzi kilichomo jichoni mwa ndugu yako!*

⁴³Kwani hakuna mti mzuri unaozaa matunda maovu; tena hakuna mti mwovu unaozaa matunda mazuri.[#Mat. 7:17-18.]

⁴⁴Kwani kila mti hutambulikana kwa matunda yake mwenyewe. Kwani hawachumi kuyu miibani, wala hawachumi zabibu katika mikunju.

⁴⁵Mtu mwema hutoa mema katika kilimbiko chake chema cha moyo, lakini naye mbaya hutoa mabaya katika mabaya yake. Kwani moyo unayoyajaa ndiyo, kinywa cha mtu kinayoyasema.[#Mat. 12:34-35.]

⁴⁶Tena mnaniitiani: Bwana! Bwana! msipoyafanya, ninayoyasema?[#Mal. 1:6.]

Nyumba juu ya mwamba.

⁴⁷Kila anayekuja kwangu na kuyasikia maneno yangu na kuyafanyiza, nitawaonyesha, anavyofanana navyo.

⁴⁸Amefanana na mtu aliyejenga nyumba, akiichimbia chini vizuri na kuweka msingi mwambani. Maji yalipojaa yakatoka mto, ukapasua penye ile nyumba, lakini haukuweza kuitingisha, kwa kuwa ilikuwa imejengwa vizuri.

⁴⁹Lakini anayeyasikia asipoyafanyiza amefanana na mtu aliyejenga nyumba mchangani pasipo msingi. Basi, mto ulipotokea na kupasua hapo, ilianguka papo hapo, kupasuka kwake ile nyumba kukawa kukubwa.