Mkubwa wa Kapernaumu.

¹Alipokwisha kuyasema maneno yake yote, watu wakimsikiliza, akaenda, akaingia Kapernaumu.

²Kukawako mkubwa wa askari mwenye mtumwa, ambaye alipendezwa sana naye; huyu alikuwa mgonjwa wa kufa.

³Bwana wake aliposikia mambo ya Yesu akatuma kwake wazee wa Wayuda, wamwombe, aje, amponye mtumwa wake.

⁴Walipomfikia Yesu wakakaza kumbembeleza wakisema: Amepaswa, umfanyie hivyo;

⁵kwani anatupenda sisi taifa letu, hata nyumba ya kuombea ametujengea mwenyewe.

⁶Yesu akaenda pamoja nao; alipokuwa mbali kidogo kuifikia ile nyumba, yule mkubwa wa askari akatuma rafiki zake kumwambia: Bwana, usijisumbue! Kwani hainipasi, uingie kijumbani mwangu.

⁷Kwa hiyo nami sikujipa moyo wa kukujia mwenyewe. Ila sema neno tu! ndipo, mtoto wangu atakapopona!

⁸Kwani nami ni mtu mwenye kuitii serikali, ninao askari chini yangu. Nami nikimwambia huyu: Nenda! basi, huenda; na mwingine: Njoo! huja; nikimwagiza mtumishi wangu: Vifanye hivi! huvifanya.

⁹Yesu alipoyasikia hayo akamstaajabu, akaligeukia kundi la watu lililomfuata, akasema: Nawaambiani, hata kwa Waisiraeli sijaona bado mwenye kunitegemea kama huyu.

¹⁰Wale waliotumwa waliporudi nyumbani, wakamkuta yule mtumwa, yuko amepona.

Kijana wa Naini.

¹¹*Kisha punde kidogo akashika njia kwenda katika mji, jina lake Naini. Wakafuatana naye wanafunzi wake na kundi la watu wengi.

¹²Alipolikaribia lango la mji, panatolewa mfu; huyu alikuwa mwana wa pekee wa mama yake, naye alikuwa mjane. Kwa hiyo watu wengi wa mji ule walikwenda pamoja naye.[#1 Fal. 17:17.]

¹³Bwana alipomwona akamwonea uchungu, akamwambia: Usilie!

¹⁴Alipofika karibu, alishike jeneza, wachukuzi wakasimama. Akasema: Kijana, nakuambia: Inuka!

¹⁵Ndipo, yule mfu alipoinuka, akaanza kusema; kisha akampa mama yake.[#1 Fal. 17:23; 2 Fal. 4:36.]

¹⁶Woga ukawashika wote, wakamtukuza Mungu wakisema: Mfumbuaji mkuu ametutokea, naye Mungu amewakagua wao wa ukoo wake.[#Luk. 1:68.]

¹⁷Hili neno lake, alilolifanya, likaja kuenea Uyuda wote na nchi zote zilizoko pembenipembeni.*

Wajumbe wa Yohana.

¹⁸Wanafunzi wake walipomsimulia Yohana hayo yote, akaita wanafunzi wake wawili,

¹⁹akawatuma kwa Bwana, wamwulize: Wewe ndiwe mwenye kuja, au tungoje mwingine?

²⁰Waume hao walipofika kwake wakasema: Yohana Mbatizaji ametutuma kwako, tuulize: Wewe ndiwe mwenye kuja, au tungoje mwingine?

²¹Saa ileile alikuwa akiponya wengi wenye magonjwa na maumivu na pepo wabaya; nao vipofu wengi akawapa kuona.

²²Akajibu akiwaambia: Rudini, mmsimulie Yohana, mliyoyaona nayo mliyoyasikia: vipofu wanaona, viwete wanakwenda, wenye ukoma wanatakaswa, viziwi wanasikia, wafu wanafufuliwa, maskini wanapigiwa mbiu njema.

²³Tena mwenye shangwe ndiye asiyejikwaa kwangu.

Ufumbuaji wa Yohana.

²⁴Wajumbe wa Yohana walipokwisha kwenda zao, akaanza kusema na yale makundi ya watu mambo ya Yohana: Mlipotoka kwenda nyikani mlikwenda kutazama nini? Mlikwenda kutazama utete unaotikiswa na upepo?

²⁵Au mlitoka kutazama nini? Mlikwenda kutazama mtu aliyevaa mavazi mororo? Tazameni, wanaovaa mavazi yenye utukufu na kula vya mali wamo nyumbani mwa wafalme.

²⁶Au mlitoka kutazama nini? Mlitaka kuona mfumbuaji? Kweli, nawaambiani: Ni mkuu kuliko mfumbuaji.[#Luk. 1:76.]

²⁷Huyo ndiye aliyeandikiwa:

Utaniona, nikimtuma mjumbe wangu,

akutangulie, aitengeneze njia yako mbele yako.

²⁸Nawaambiani: Miongoni mwao wote waliozaliwa na wanawake hakuna mkuu kuliko Yohana. Lakini aliye mdogo katika ufalme wa Mungu ni mkuu kuliko yeye.

²⁹Watu wote waliomsikia, hata watoza kodi wakauitikia wongofu wake Mungu, wakabatizwa ubatizo wa Yohana.[#Luk. 3:7,12; Mat. 21:32.]

³⁰Lakini Mafariseo na wajuzi wa Maonyo waliyatengua, Mungu aliyoyataka, wayafanye, wasibatizwe naye.[#Tume. 13:46.]

³¹Basi, wao wa kizazi hiki niwafananishe na nini? Au wamefanana na mtu gani?

³²Wamefanana na watoto wanaokaa sokoni na kuitana wao kwa wao wakisema: Tumewapigia filimbi, nanyi hamkucheza; tena tumewaombolezea, nanyi hamkulia.

³³Kwani Yohana Mbatizaji alikuja, hakula mkate, wala hakunywa mvinyo, nanyi mkasema: Ana pepo.

³⁴Mwana wa mtu amekuja, akala, akanywa, nanyi mkasema: Tazameni mtu huyu mlaji na mnywaji wa mvinyo, mpenda watoza kodi na wakosaji![#Luk. 15:2.]

³⁵Lakini werevu hutokezwa na watoto wake wote kuwa wa kweli.

Mwanamke mkosaji.

³⁶*Fariseo mmoja alipomwalika, ale pamoja naye, akaingia nyumbani mwa yule Fariseo, akakaa chakulani.[#Luk. 11:37.]

³⁷Mjini mle mlikuwa na mwanamke mkosaji. Naye alipotambua, ya kuwa yumo mwa yule Fariseo, amekaa chakulani, akaja na kichupa cha manukato,

³⁸akamsimamia nyuma miguuni pake mwenye machozi, akaanza kuyadondosha miguuni pake, akayasugua kwa nywele za kichwani pake, akainonea miguu yake, kisha akaipaka manukato.[#Mat. 26:7-13; Yoh. 12:3-8.]

³⁹Yule Fariseo aliyemwalika alipoviona akasema moyoni mwake: Huyu kama angekuwa mfumbuaji, angemtambua mwanamke huyu anayemgusa, kama ni nani, kama ni wa namna gani, kwamba ni mkosaji.

⁴⁰Yesu akajibu akimwambia: Simoni, ninalo la kukuambia. Naye alipomwambia: Mfunzi, sema! akasema:

⁴¹Mkopeshaji alikuwa na wadeni wawili. Wa kwanza deni lake ni shilingi 500, mwenzake 50.

⁴²Walipokosa vya kulipa, akawaachilia wote wawili, wasilipe. Katika hao atakayempenda kumpita mwenziwe ni yupi?

⁴³Simoni akajibu akisema: Nadhani, ni yule aliyeachiliwa nyingi. Naye akamwambia: Ulivyolikata shauri hili, ndivyo kweli.

⁴⁴Kisha akamgeukia yule mwanamke, akamwambia Simoni: Unamtazama mwanamke huyu? Nilipoingia nyumbani mwako, hukunipa maji ya kunawa miguu; lakini huyu alinidondoshea machozi miguuni pangu, akayasugua kwa nywele za kichwani pake.[#1 Mose 18:4.]

⁴⁵Hukuninonea, lakini huyu, tangu nilipoingia, hakuacha kuinonea miguu yangu.[#Rom. 16:16.]

⁴⁶Wewe hukunipaka mafuta kichwani, lakini huyu ameipaka miguu yangu manukato.

⁴⁷Kwa hiyo nakuambia: Ameondolewa makosa yake yaliyo mengi, kwani mapendo yake ni mengi. Lakini anayeondolewa machache tu, naye mapendo yake ni machache.

⁴⁸Kisha akamwambia yule mwanamke: Wewe umeondolewa makosa yako.[#Luk. 5:20-21.]

⁴⁹Ndipo, wale waliokaa chakulani pamoja naye walipoanza kusema mioyoni mwao: Huyu ni nani akiondoa hata makosa?

⁵⁰Naye akamwambia yule mwanamke: Kunitegemea kwako kumekuokoa; nenda na kutengemana!*[#Luk. 8:48; 17:19; 18:42.]