Kuwatuma mitume.

¹Akawaita wale kumi na wawili, wakusanyike, akawapa uwezo na nguvu za kufukuza pepo wote na za kuponya magonjwa.

²Akawatuma, wautangaze ufalme wa Mungu na kuponya wagonjwa.

³Akawaambia: Msichukue kitu cha njiani, wala fimbo wala mkoba wala chakula wala shilingi, tena mtu asiwe na nguo mbili!

⁴Nyumbani mo mote mtakamoingia, kaeni humo! Namo ndimo, mtakamotoka tena![#Luk. 10:5-7.]

⁵Nao wote wasiowapokea, basi, utokeni mji wao na kuyakung'uta mavumbi yaliyoishika miguu yenu, yaje yanishuhudie kwao![#Luk. 10:11.]

⁶Wakatoka, wakapita vijijini wakiipiga hiyo mbiu njema na kuponya wagonjwa po pote.

Herode amtafuta Yesu.

⁷Mfalme Herode alipoyasikia mambo yote yaliyokuwapo, akahangaika, maana wengine walisema: Yohana amefufuka katika wafu,

⁸wengine: Elia ametokea, wengine: Mmoja wao wafumbuaji wa kale amefufuka.

⁹Lakini Herode akasema: Yohana mimi nimemkata kichwa. Lakini huyo ni nani, ninayemsikia mambo kama hayo? Akatafuta kumwona.

Kulisha watu 5000.

¹⁰Mitume waliporudi, wakamsimulia mambo yote, waliyoyafanya. Kisha akawachukua, akaondoka kwenda nao peke yao, wakaingia mji, jina lake Beti-Saida.

¹¹Makundi ya watu walipovitambua wakamfuata, naye akawapokea, akasema nao mambo ya ufalme wa Mungu, akawaponya waliopaswa na kuponywa.

¹²Jua lilipotaka kuchwa, wale kumi na wawili wakamjia, wakamwambia: Uliage kundi la watu, waende zao vijijini na mashambani huko pembenipembeni, waone ulalo na vyakula, kwani hapa tulipo ni nyika.

¹³Akawaambia: Wapeni ninyi vyakula! Wakasema: Sisi hatuna kitu hapa kuliko mikate mitano na visamaki viwili; au twende sisi kuwanunulia watu hawa wote vyakula?

¹⁴Kwani waume tu waliokuwako walipata 5000. Akawaambia wanafunzi wake: Mwaagize, wakae mafungumafungu kama hamsinihamsini!

¹⁵Wakafanya hivyo, wakawakalisha wote.

¹⁶Akaitwaa ile mikate mitano na vile visamaki viwili, akatazama juu mbinguni, akaviombea, akawamegeamegea, akawapa wanafuanzi, wawapangie hao watu wengi.

¹⁷Wakala, wakashiba wote, pakaokotwa makombo yaliyowasalia vikapu kumi na viwili.

Kuungama kwa Petero.

¹⁸*Ikawa, alipokuwa akiomba peke yake, wakawapo pamoja naye wanafunzi wake, akawauliza akisema: Makundi ya watu hunisema kuwa ni nani?

¹⁹Nao wakajibu wakisema: Wanakusema kuwa u Yohana Mbatizaji, wengine: Elia, wengine husema: Amefufuka mmoja wao wafumbuaji wa kale.

²⁰Kisha akawauliza: Lakini ninyi mnanisema kuwa ni nani? Petero akajibu akisema: Kristo wa Mungu.

²¹Ndipo, alipowatisha na kuwakataza, wasimwambie mtu neno hilo.

Ufunuo wa Mateso.

²²Akawaambia: Imempasa Mwana wa mtu kutwa mengi na kukataliwa nao wazee na watambikaji wakuu na waandishi, mpaka auawe, kisha afufuliwe siku ya tatu.[#Luk. 9:44; 18:32-33.]

Kujiokoa.

²³Akawaambia wote: Mtu akitaka kunifuata mimi ajikataze mapenzi yake, ajitwishe kila siku nao msalaba wake, kisha anifuate![#Luk. 14:26-27.]

²⁴Maana mtu anayetaka kuiokoa roho yake ataiangamiza. Lakini mtu atakayeiangamiza roho yake kwa ajili yangu mimi, huyo ataiokoa.[#Luk. 17:33; Mat. 10:39; Yoh. 12:25.]

²⁵Kwani mtu vinamfaa nini, avichume vya ulimwengu wote, akijiangamiza mwenyewe, au akiponzwa navyo?

²⁶Kwani mtu atakayenionea soni mimi na maneno yangu, basi, naye Mwana wa mtu atamwonea soni huyo atakapokuja mwenye utukufu wake yeye na wa Baba yake na wa malaika watakatifu.*[#Mat. 10:33.]

²⁷Lakini nawaambiani lililo kweli: Miongoni mwao wanaosimama hapa wamo wengine, ambao hawatakuonja kufa, mpaka watakapouona ufalme wa Mungu.

Yesu anageuzwa sura.

²⁸Ikawa, walipokwisha kuyasema hayo, zikipita kama siku nane, akamchukua Petero na Yohana na Yakobo, wakapanda mlimani kuomba

²⁹Alipokuwa akiomba, sura ya uso wake ikawa nyingine, nazo nguo zake zikawa nyeupe na kumerimeta.

³⁰Walipotazama, wakawako waume wawili wakiongea naye, nao walikuwa Mose na Elia.

³¹Wakawatokea wenye utukufu, wakasema naye, ndivyo aende kuyatimiza mambo ya kufa kwake kule Yerusalemu.[#Luk. 9:22.]

³²Lakini Petero na wenziwe walikuwa wamelemewa na usingizi. Walipoamka wakauona utukufu wake na wale waume wawili waliosimama naye.

³³Ikawa, walipotengwa naye, Petero akamwambia Yesu: Bwana, hapa ni pazuri kuwapo sisi, na tujenge vibanda vitatu, kimoja chako, na kimoja cha Mose, na kimoja cha Elia! kwani hakujua, alilolisema.

³⁴Angali akiyasema haya, pakawa na wingu, likawatia kivuli, wakashikwa na woga walipoingiwa na wingu lile.

³⁵Sauti ikatoka winguni, ikasema: Huyu ndiye mwanangu, niliyemchagua, msikilizeni yeye![#Luk. 3:22.]

³⁶Sauti hiyo iliposikilika, Yesu akaonekana, yuko peke yake. Siku zile wakanyamaza, wasimsimulie mtu hata moja lao hayo waliyoyaona.

Kijana mwenye pepo.

³⁷Ikawa siku ya kesho, waliposhuka mlimani wakakutana na kundi la watu wengi.

³⁸Mle kundini mkawamo mwanamume, akapaza sauti akisema: Mfunzi, nakuomba, umtazame huyu mwanangu, kwani ni wangu wa pekee!

³⁹Tazama, pepo humpagaa, naye mara moja hulia kwa kukumbwa, mpaka akitoka pofu; akiisha kumlegeza hukawia kumwondokea.

⁴⁰Nikawaomba wanafunzi wako, wamfukuze, lakini hawakuweza.

⁴¹Yesu akajibu akisema: Enyi wa kizazi kisichomtegemea Mungu kwa kupotoka! Nitakuwapo nanyi na kuwavumilia mpaka lini? Umlete mwana wako, aje hapa!

⁴²Alipokuwa akija, pepo akamkamata kwa nguvu, akamkumba. Lakini Yesu akamkaripia huyo pepo mchafu, akamponya mtoto, akamrudishia baba yake.[#Luk. 7:15.]

⁴³Ndipo, wote walipoingiwa na kituko kwa ajili ya ukubwa wa nguvu yake Mungu.

Ufunuo wa pili wa mateso.

Wao wote walipoyastaajabu yote, aliyoyafanyiza, akawaambia wanafunzi wake:

⁴⁴Myaweke vema maneno haya masikioni mwenu! Maana Mwana wa mtu atatiwa mikononi mwa watu.[#Luk. 9:22.]

⁴⁵Lakini hawakulitambua neno hili, likawa limefichiwa wao, wasilione maana. Nao wakaogopa kumwuliza tena neno hilo.[#Luk. 18:34.]

Mkubwa ni nani?

⁴⁶Wakawa wakiwaza mioyoni mwao kwamba: Aliye mkuu kwetu ni nani?

⁴⁷Lakini Yesu akayajua, waliyoyawaza mioyoni mwao, akatwaa kitoto, akamsimamisha kando yake,

⁴⁸akawaambia: Mtu atakayempokea kitoto huyu kwa Jina langu hunipokea mimi. Tena akinipokea mimi humpokea yule aliyenituma mimi. Kwani aliye mdogo kwenu ninyi wote, huyo ndiye mkuu.[#Mat. 10:40.]

⁴⁹Yohana akajibu akisema: Bwana, tuliona mtu anayefukuza pepo kwa Jina lako; tukamzuia, kwani hafuatani nasi.

⁵⁰Yesu akamwambia: Msimzuie! Kwani asiyewakataa yuko upande wenu.[#Luk. 11:23; Mat. 12:30; Fil. 1:18.]

Wasamaria wanamkataa Yesu.

⁵¹*Ikawa, zilipotimia siku zake za kuchukuliwa mbinguni, mwenyewe akauelekeza uso kwenda Yerusalemu,

⁵²akatanguliza wajumbe mbele yake. Hao walipokwenda, kuingia kijiji cha Wasamaria, wamtengenezee mahali,

⁵³hawakumpokea, kwani uso wake ulikuwa umeelekea kwenda Yerusalemu.

⁵⁴Wanafunzi akina Yakobo na Yohana walipoviona wakasema: Bwana, wataka, tuseme, moto ushuke toka mbinguni, uwamalize, kama Elia naye alivyofanya?

⁵⁵Lakini akapinduka, akawatisha akiwaambia: Hamjui, kama m wenye Roho gani?

⁵⁶Mwana wa mtu hakujia kuangamiza roho za watu, ila kuziokoa. Kisha wakaenda zao, wakafikia kijiji kingine.*

Kumfuata Yesu.

⁵⁷Walipokuwa wakienda njiani, palikuwapo aliyemwambia: Nitakufuata po pote, utakapokwenda.

⁵⁸Yesu akamwambia: Mbweha wanayo mapango, nao ndege wa angani wanavyo vituo, lakini Mwana wa mtu hana pa kukilazia kichwa chake.

⁵⁹Alipomwambia mtu mwingine akasema: Nifuate! huyo akasema: Nipe ruhusa, kwanza niende nimzike baba yangu!

⁶⁰Naye akamwambia: Waache wafu, wazike wao kwa wao! Lakini wewe nenda, uutangaze ufalme wa Mungu!

⁶¹Mtu mwingine akasema: Nitakufuata, Bwana, lakini kwanza nipe ruhusa, niwaage waliomo nyumbani mwangu!

⁶²Yesu akamwambia: Mtu ashikaye jembe mkononi na kuvitazama vya nyumba, huyo hatauweza ufalme wa Mungu.*