Kuwatuma mitume.

¹Akawaita wanafunzi wake kumi na wawili, akawapa nguvu za kufukuza pepo wachafu na za kuponya wagonjwa wo wote na wanyonge wo wote.

Majina yao.

²Majina yao wale mitume kumi na wawili ndiyo haya: Wa kwanza Simoni anayeitwa Petero na Anderea nduguye, Yakobo wa Zebedeo na Yohana nduguye,[#Mar. 3:14-19; Luk. 6:13-16; Yoh. 1:40-49.]

³Filipo na Bartolomeo, Toma na Mateo, mtoza kodi, Yakobo wa Alfeo na Tadeo,

⁴Simoni wa Kana na Yuda Iskariota aliye mchongea halafu.

Maagizo ya mitume.

⁵Hao kumi na wawili Yesu aliwatuma na kuwaagiza akisema: Msiende katika njia za wamizimu, wala mji wowote wa Wasamaria msiuingie![#Mat. 15:24; Tume. 13:46.]

⁶Lakini mwende kwa kondoo waliopotea wa mlango wa Isiraeli!

⁷Tena mnapokwenda pigeni mbiu mkisema: Ufalme wa mbingu umekaribia![#Mat. 4:17; Luk. 10:9.]

⁸Walio wagonjwa waponyeni, waliokufa wafufueni, wenye ukoma watakaseni, nazo pepo zifukuzeni! Bure mmeyapata, tena yatoeni bure![#Tume. 20:33.]

⁹Msichukue mishipini mwenu dhahabu wala shilingi wala senti!

¹⁰Msichukue mkoba wa njiani wala nguo mbili wala viatu wala fimbo! Kwani mtenda kazi hupaswa na kupewa chakula chake.[#4 Mose 18:31; Luk. 10:4; 1 Kor. 9:7-11; 1 Tim. 5:18.]

¹¹Lakini mji au kijiji mtakamoingia ulizeni, kama yumo mtu anayepaswa na kuwapokea! Kaeni mwake, mpaka mtakapotoka tena!

¹²Tena mkiingia nyumbani wapeni salamu![#Luk. 10:5-6.]

¹³Ikiwa wamepaswa nao, utengemano wenu utakaa humo. Lakini ikiwa hawakupaswa nao, utengemano wenu utawarudia ninyi.

¹⁴Tena mtu asipowapokea wala asipoyasikia maneno yenu, basi, kama ni nyumba au mji, mtokeni na kuyakung'uta mavumbi ya miguuni penu![#Luk. 10:10-12; Tume. 13:51; 18:6.]

¹⁵Kweli nawaambiani: Siku ya hukumu nchi ya Sodomu na Gomora itapata mepesi kuliko mji ule.[#Mat. 11:24; Luk. 20:47.]

Kusumbuliwa

¹⁶Tazameni, mimi nawatuma, mwe kama kondoo walio katikati ya mbwa wa mwitu. Kwa hiyo mwe wenye mizungu kama nyoka, tena mwe wakweli, kama njiwa walivyo! Jilindeni kwa ajili ya watu![#Luk. 10:3; Rom. 16:19; Ef. 5:15.]

¹⁷Kwani watawapeleka barazani kwao wakuu na kuwapiga katika nyumba zao za kuombea.[#Mat. 24:9; Tume. 5:40.]

¹⁸Kwa ajili yangu watawavuta kwa mabwana wakubwa na kwa wafalme, mje mnishuhudie kwao na kwa wamizimu.[#Mat. 24:14; Tume. 25:23; 27:24.]

¹⁹Lakini hapo watakapowatoa, msihangaikie wala mizungu wala maneno ya kuwajibu! Kwani saa ileile mtapewa maneno, mtakayoyasema.[#Luk. 12:11-12; Tume. 4:8.]

²⁰Kwani si ninyi mnaosema, ila ni Roho wa Baba yenu; ndiye anayesema vinywani mwenu.[#1 Kor. 2:4.]

²¹Ndugu na ndugu watatoana, wauawe, hata baba watawatoa watoto wao, hata watoto watawainukia wazazi wao, wawaue.[#Mat. 10:35; Mika 7:6.]

²²Nanyi mtakuwa mmechukiwa na watu wote kwa ajili ya Jina langu. Lakini atakayevumilia mpaka mwisho ndiye atakayeokoka.[#Mat. 24:9-13.]

²³Lakini watakapowafukuza mjini humu kimbilieni mwingine! Kwani nawaambiani iliyo kweli: Hamtaimaliza miji ya Isiraeli, mpaka Mwana wa mtu atakapokuja.[#Mat. 16:28.]

Mategemeo.

²⁴*Mwanafunzi hampiti Mfunzi wake, wala mtumwa hampiti bwana wake.[#Luk. 6:40; Yoh. 13:16; 15:20.]

²⁵Inamtosha mwanafunzi kuwa, kama mfunzi wake alivyo, vilevile mtumwa inamtosha kuwa, kama bwana wake alivyo. Kama Mwenye nyumba walimwita Belzebuli (Mkuu wa pepo), hawatazidi kuwaita hivyo waliomo nyumbani mwake?[#Mat. 12:24.]

²⁶Msiwaogope! Kwani hakuna lililofunikwa lisilofunuliwa halafu, wala hakuna lililofichwa lisilotambulikana halafu.[#Mar. 4:22; Luk. 8:17.]

²⁷Ninalowaambia gizani lisemeni mwangani! Tena ninalowanong'oneza masikioni, litangazeni barazani!

²⁸Tena msiwaogope wanaoweza kuiua miili tu, wasiweze kuziua nazo roho! Lakini mfulize kumwogopa anayeweza kuziangamiza roho pamoja na miili shimoni mwa moto![#Yak. 4:12.]

²⁹Je? Videge viwili haviuzwi kwa senti moja? Lakini hata mmoja wao haanguki chini, Baba yenu asipojua.

³⁰Lakini kwenu ninyi hata nywele za vichwani zimehesabiwa zote.[#Tume. 27:34.]

³¹Kwa hiyo msiogope ninyi mnapita videge vingi![#Ufu. 3:5.]

³²Kila atakayeungama mbele ya watu, kwamba ni mtu wangu, nami nitaungama mbele ya Baba yangu wa mbinguni, kwamba ni mtu wangu.

³³Lakini atakayenikana mbele ya watu, nami nitamkana mbele ya Baba yangu wa mbinguni.*[#Luk. 9:26.]

Magombano na Malipizano.

³⁴Msidhani, ya kuwa nimejia kuiletea nchi utengemano! Sikujia kuleta utengemano, ila upanga.

³⁵Kwani nimejia kutenga watu, wagombane mtu na baba yake, mwana wa kike na mama yake, vilevile mkwe na mkwewe,[#Mika 7:6.]

³⁶nao watakaomchukia mtu ndio waliomo mwake.[#5 Mose 33:9; Luk. 14:26-27.]

³⁷Anayempenda baba yake au mama yake kuliko mimi hanipasi; anayempenda mwanawe wa kiume au wa kike kuliko mimi hanipasi.

³⁸Tena asiyejitwisha msalaba wake na kunifuata nyuma yangu hanipasi.[#Mat. 16:24-25.]

³⁹Mwenye kuiponya roho yake ataiangamiza; mwenye kuiangamiza roho yake kwa ajili yangu ataiponya.[#Luk. 17:33; Yoh. 12:25.]

⁴⁰Anayewapokea ninyi hunipokea mimi; naye anayenipokea mimi humpokea aliyenituma.[#Mat. 18:5; Luk. 10:16; Yoh. 13:20.]

⁴¹Anayepokea mfumbuaji, kwa kuwa ni mfumbuaji, atapata mshahara kama wa mfumbuaji; naye anayepokea mwongofu, kwa kuwa ni mwongofu, atapata mshahara kama wa mwongofu.[#1 Fal. 17.]

⁴²Tena mtu akinywesha mmoja wao walio wadogo kinyweo cha maji mazizima tu, kwa kuwa ni mwanafunzi, kweli nawaambiani: Mshahara wake hautampotea kamwe.[#Mat. 25:40; Mar. 9:41.]