Mwenye kumiaga mbegu.

¹Siku ile Yesu alitoka nyumbani, akaenda kukaa kandokando ya bahari.

²Wakamkutanyikia makundi mengi ya watu, kwa hiyo akaingia chomboni, akakaa humo, watu wote wakisimama pwani.

³Akawaambia maneno mengi kwa mifano akisema: Tazameni, mpanzi alitoka kumiaga mbegu.

⁴Ikawa alipozimiaga, nyingine zikaangukia njiani; ndege wakaja, wakazila.

⁵Nyingine zikaangukia penye miamba pasipo na udongo mwingi. Kuota zikaota upesi kwa kuwa na udongo kidogo;

⁶lakini jua lilipokuwa kali, zikanyauka, kwa kuwa hazina mizizi.

⁷Nyingine zikaangukia penye miiba; nayo miiba ilipoota ikazisonga.

⁸Lakini nyingine zikaangukia penye mchanga mzuri, zikazaa, nyingine punje mia, nyingine sitini, nyingine thelathini.

⁹Mwenye masikio yanayosikia na asikie!

Sababu ya kusema kwa mifano.

¹⁰Wanafunzi wake wakamjia, wakamwambia: Sababu gani unasema nao kwa mifano?

¹¹Naye akajibu akisema: Ninyi mmepewa kuyatambua mafumbo ya ufalme wa mbingu,[#1 Kor. 2:10.]

¹²lakini wale hawakupewa. Kwani ye yote aliye na mali atapewa, ziwe nyingi zaidi; lakini asiye na kitu atachukuliwa hata kile, alicho nacho.[#Mat. 25:14-30; Mar. 4:25; Luk. 8:18.]

¹³Kwa sababu hii nasema nao kwa mifano, kwamba wakitazama wasione, wakisikiliza wasisikie na kujua maana.[#5 Mose 29:4; Yoh. 16:25.]

¹⁴Hivyo ufumbuo wa Yesaya unatimizwa kwao unaosema:

Kusikia mtasikia, lakini hamtajua maana;

kutazama mtatazama, lakini hamtaona.

¹⁵Kwani mioyo yao walio ukoo huu imeshupazwa,

hata kwa masikio yao yaliyo mazito hawasikii;

nayo macho yao wameyasinziza,

wasije wakaona kwa macho,

au wakasikia kwa masikio,

au wakajua maana kwa mioyo,

wakanigeukia, nikawaponya.

¹⁶Lakini yenye shangwe ni macho yenu, kwani huona, nayo masikio yenu, kwani husikia.[#Mat. 16:16-17; Luk. 10:23-24.]

¹⁷Kweli nawaambiani: Wengi waliokuwa wafumbuaji na waongofu waliyatunukia, wayaone, mnayoyaona ninyi, lakini hawakuyaona; waliyatunukia wayasikie, mnayoyasikia ninyi, lakini hawakuyasikia.

¹⁸Basi, ninyi usikieni mfano wa mpanzi!

¹⁹Kila anayelisikia Neno la ufalme asipolijua maana, huja yule Mbaya na kulinyakua lililomiagwa moyoni mwake. Hizo ndizo zilizomiagwa njiani.

²⁰Lakini zilizomiagwa penye miamba ni kama mtu anayelisikia Neno na kulipokea papo hapo kwa furaha.

²¹Lakini hana mizizi moyoni mwake, ila analishika kwa kitambo kidogo tu. Yanapotukia maumivu au mafukuzo kwa ajili ya Neno, mara hujikwaa.

²²Lakini zilizomiagwa penye miiba ni kama mtu anayelisikia Neno, lakini masumbuko ya dunia hii na udanganyifu wa mali hulisonga Neno, lisizae matunda.[#Mat. 6:19-34; 1 Tim. 6:9-10.]

²³Lakini zilizomiagwa penye mchanga mzuri ni kama mtu anayelisikia Neno na kulijua maana. Ndiye mwenye kuzaa, mwingine huleta punje mia, mwingine sitini, mwingine thelathini.

Nyasi katikati ya ngano.

²⁴*Akawatolea mfano mwingine akisema: Ufalme wa mbingu umefanana na mtu aliyemiaga mbegu nzuri katika shamba lake.[#Mat. 13:36-43.]

²⁵Lakini watu walipolala, akaja mchukivu wake, akamiaga mbegu za nyasi katikati ya ngano, akaenda zake.

²⁶Halafu majani ya ngano yalipoota na kuchanua, zikaonekana nazo nyasi.

²⁷Watumwa wa mwenye shamba wakaja wakamwuliza: Bwana, hukumiaga mbegu nzuri katika shamba lako? Basi, nyasi limezipata wapi?

²⁸Alipowaambia: Mtu aliye mchukivu amevifanya hivyo, watumwa wakamwambia: Unataka, twende, tuzing'oe na kuzikusanya?

²⁹Akasema: Hapana, msije, mkazing'oa nazo ngano mkiwa mnakusanya nyasi.

³⁰Acheni, zikue zote mbili pamoja, mpaka mavuno yatakapokuwa! Siku za kuvuna nitawaambia wavunaji: Kusanyeni kwanza nyasi, mzifunge matitatita, mziteketeze! Lakini ngano zitieni chanjani kwangu!*[#Mat. 3:12; Ufu. 14:15.]

Kipunje cha haradali.

³¹*Akawatolea mfano mwingine akisema: Ufalme wa mbingu umefanana na kipunje cha haradali, alichokitwaa mtu na kukipanda katika shamba lake.

³²Nacho ni kidogo kuliko mbegu zote. Lakini kinapokua ni mkubwa kuliko miboga yote inayopandwa, huwa mti mzima, hata ndege wa angani huja na kutua katika matawi yake.

Chachu.

³³Akawaambia mfano mwingine: Ufalme wa mbingu umefanana na chachu, mwanamke akiitwaa akaichanganya na pishi tatu za unga, mpaka ukachachwa wote.[#Luk. 13:20-21.]

³⁴Haya yote aliwaambia makundi ya watu kwa mifano, pasipo mfano hakuwaambia neno,[#Mar. 4:33-34.]

³⁵kusudi litimie lililosemwa na mfumbuaji, akisema:

Nitakifumbua kinywa changu, kiseme mifano.

Nitatangaza mambo yaliyofichika

tangu hapo, ulimwengu ulipoumbwa.*

³⁶Kisha Yesu akawaaga makundi ya watu, akaingia nyumbani. Ndipo, wanafunzi wake walipomjia wakisema: Tuelezee mfano wa nyasi za shambani![#Mat. 13:24-30.]

³⁷Akajibu akisema: Mwenye kumiaga mbegu nzuri ni Mwana wa mtu.

³⁸Nalo shamba ndio ulimwengu. Nazo mbegu nzuri ndio wana wa ufalme. Lakini nyasi ndio wana wa yule Mbaya.[#1 Kor. 3:9.]

³⁹Naye mchukivu aliyezimiaga ndiye Msengenyaji. Nayo mavuno ndio mwisho wa dunia. Nao wavunaji ndio malaika.

⁴⁰Kama nyasi zinavyokusanywa na kuteketezwa motoni, ndivyo, itakavyokuwa katika mwisho wa dunia hii:

⁴¹Mwana wa mtu atawatuma malaika zake, nao watakusanya na kuyatoa katika ufalme wake makwazo yote nao waliofanya maovu,[#Mat. 7:23; 25:31-46; Sef. 1:3.]

⁴²wawatupe shimoni mwa moto; ndiko, kitakakokuwa kilio na kukereza meno.[#Mat. 8:12.]

⁴³Ndipo, waongofu watakapoangaza kama jua katika ufalme wa Baba yao. Mwenye masikio yanayosikia na asikie![#Dan. 12:3.]

Fedha katika shamba.

⁴⁴*Ufalme wa mbingu umefanana na fedha zilizofukiwa shambani. Mtu alipoziona akazifukia, akaenda kwa furaha yake, akaviuza vyote, alivyokuwa navyo, akalinunua shamba lile.[#Mat. 19:29; Luk. 14:33; Fil. 3:7.]

⁴⁵Tena ufalme wa mbingu umefanana na mchuuzi aliyetafuta ushanga wa lulu nzuri.

⁴⁶Naye alipoona lulu moja yenye bei kubwa akaenda, akaviuza vyote alivyokuwa navyo, akainunua.*[#Fano. 8:10-11; Fil. 3:7-8.]

Wavu wa kuvulia samaki.

⁴⁷Tena ufalme wa mbingu umefanana na wavu uliotupwa baharini, ukakusanya samaki wa kila mtindo.[#Mat. 22:9-10.]

⁴⁸Hata ulipojaa, wakauvuta pwani, wakakaa, wakawachagua samaki, walio wazuri wakawaweka vyomboni, lakini walio wabaya wakawatupa.

⁴⁹Hivyo ndivyo, itakavyokuwa katika mwisho wa dunia hii: Malaika watatokea, watawatenga wabaya kati ya waongofu,[#Mat. 25:32.]

⁵⁰wawatupe shimoni mwa moto. Ndiko, kitakakokuwa kilio na kukereza meno.

⁵¹Mmeijua maana ya hayo yote? Walipomwambia: Ndio,

⁵²akawaambia: Kwa sababu hii kila mwandishi aliyefundishiwa ufalme wa mbingu amefanana na mtu mwenye nyumba anayetoa mawekoni mwake mambo mapya na ya kale.

Yesu mjini mwa Nasareti.

⁵³Ikawa, Yesu alipokwisha kuisema mifano hiyo akatoka, akaenda zake.

⁵⁴Alipofika kwao, alikokulia, akawafundisha katika nyumba yao ya kuombea, nao wakashangaa wakisema: Huyu amepata wapi werevu huu ulio wa kweli na nguvu hizi?

⁵⁵Huyu si mwana wa seremala? Mama yake si yeye anayeitwa Maria? Nao ndugu zake sio akina Yakobo na Yosefu na Simoni na Yuda?

⁵⁶Nao maumbu zake hawako wote kwetu? Basi, huyu amepata wapi haya yote? Wakajikwaa kwake.[#Yoh. 7:15,52.]

⁵⁷Yesu akawaambia: Mfumbuaji habezwi, isipokuwa kwao, alikokulia, namo nyumbani mwake.[#Yoh. 4:44.]

⁵⁸Kwa hiyo hakufanya kule ya nguvu mengi, kwa sababu walikataa kumtegemea.