Kutaka kielekezo.

¹Wakaja Mafariseo na Masadukeo, wakamjaribu wakitaka, awaonyeshe kielekezo kitokacho mbinguni.[#Mat. 12:38.]

²Naye akajibu akiwaambia: Kukichwa mnasema: Kutakucha na kianga, kwani mbingu ni nyekundu.[#Luk. 12:54-56.]

³Tena kukicha mnasema: Leo itakunya mvua, kwani mbingu ni nyekundu, tena kumetanda mawinguwingu. Enyi wajanja! Mnayoyaona ya mbinguni, mnajua kuyatambua, lakini vielekezo vya siku hizi vinawashindani?[#Mat. 11:4.]

⁴Wao wa ukoo huu mbaya wenye ugoni wanataka kielekezo, lakini hawatapata kielekezo, ila kielekezo cha mfumbuaji Yona. Kisha akawaacha, akaenda zake.*[#Mat. 12:39-40.]

Chachu ya Mafariseo.

⁵Wanafunzi walipofika ng'ambo walikuwa wamesahau kuchukua mikate.

⁶Yesu akawaambia: Tazameni, jilindeni kwa ajili ya chachu yao Mafariseo na Msadukeo![#Luk. 12:1.]

⁷Ndipo, walipoyafikiri na kusemeza wao kwa wao: Ni kwa sababu hatukuchukua mikate;

⁸Lakini Yesu akawatambua, akawaambia: Enyi mnaonitegemea kidogo tu, mbona mnafikiri hivyo mioyoni mwenu ya kuwa hamnayo mikate?[#Mat. 6:30.]

⁹Hamjaerevuka bado? Wala hamwikumbuki mikate ile mitano ya wale 5000 na makapu, mliyoyachukua, kama ni mangapi?[#Mat. 14:17-21.]

¹⁰Wala hamwikumbuki ile mikate saba ya wale 4000 na makanda, mliyoyachukua, kama ni mangapi?[#Mat. 15:34-38.]

¹¹Kwa sababu gani hamtambui, ya kuwa sikuwaambia kwa ajili ya mikate niliposema: Jilindeni kwa ajili ya chachu yao Mafariseo na Masadukeo?

¹²Ndipo, walipotambua, ya kuwa hakusema, wajilinde kwa ajili ya chachu ya mikate, ila wajilinde kwa ajili ya ufundisho wao Mafariseo na Masadukeo.

Kuungama kwa Petero.

¹³Yesu akaenda pande za mji wa Kesaria-Filipi, akawauliza wanafunzi wake akisema: Watu humsema Mwana wa mtu kuwa ni nani?

¹⁴Nao wakajibu: Wengine husema kuwa u Yohana Mbatizaji, wengine: Elia, wengine: Yeremia au mmoja wao wafumbuaji.[#Mat. 14:2; 17:10; Luk. 7:16.]

¹⁵Yesu akawauliza: Lakini ninyi mnanisema kuwa ni nani?

¹⁶Simoni Petero akajibu akisema wewe ndiwe Kristo, Mwana wake Mungu Mwenye uzima.[#Yoh. 6:69.]

¹⁷Yesu akajibu akimwambia: U mwenye shangwe, Simoni wa Yona, kwani mwenye mwili na damu hakukufunulia hili, ila Baba yangu alioko mbinguni.[#Mat. 11:27; Gal. 1:15-16.]

¹⁸Nami nakuambia: Wewe ndiwe Petero, juu ya mwamba huu nitalijenga kundi la wateule wangu, nayo malango ya kuzimu hayatawashinda.[#Yoh. 1:42; Ef. 2:20.]

¹⁹Nitakupa funguo za ufalme wa mbingu: lo lote, utakalolifunga nchini, litakuwa limefungwa hata mbinguni; nalo lo lote, utakalolifungua nchini, litakuwa limefunguliwa hata mbinguni.[#Mat. 18:18.]

²⁰Ndipo, alipowatisha wanafunzi, wasimwambie mtu ya kuwa yeye ndiye Kristo.[#Mat. 17:9.]

Ufunuo wa mateso.

²¹*Tokea hapo Yesu Kristo akaanza kuwaonyesha wanafunzi wake, ya kuwa imempasa kwenda Yerusalemu ateswe mengi nao wazee na watambikaji wakuu na waandishi, mpaka auawe, kisha afufuliwe siku ya tatu.[#Mat. 12:40; Yoh. 2:19.]

²²Ndipo, Petero alipomchukua pembeni, akaanza kumtisha akisema: Jionee uchungu, wewe Bwana, haya yasikupate!

²³Naye akageuka, akamwambia Petero: Niondokea hapa nyuma yangu, wewe Satani! Wewe wataka kunikwaza, kwani wewe huyawazi mambo ya Kimungu, ila unayawaza ya kiwatu tu.

Kujiokoa.

²⁴Ndipo, Yesu alipowaambia wanafunzi wake: Mtu akitaka kunifuata mimi ajikataze mapenzi yake, ajitwishe nao msalaba wake, kisha anifuate![#Mat. 10:38-39; 1 Petr. 2:21.]

²⁵Maana mtu anayetaka kuikoa roho yake ataiangamiza. Lakini mtu atakayeiangamiza roho yake kwa ajili yangu mimi ataiponya.

²⁶Kwani mtu vitamfaa nini, hata avichume vya ulimwengu wote, roho yake ikiponwa navyo? Au mtu atatoa nini, aikomboe roho yake?*

²⁷Kwani Mwana wa mtu atakapokuja mwenye utukufu wa Baba yake pamoja na malaika zake, ndipo, atakapomlipa kila mtu, kama matendo yake yalivyo.[#Mat. 26:64; Rom. 2:6,16.]

²⁸Kweli nawaambiani: Miongoni mwao wanaosimama hapa wamo wengine, ambao hawatakuonja kufa, mpaka watakapomwona Mwana wa mtu, akija mwenye ufalme wake.[#Mat. 10:23.]