Cheti cha kuachana.

¹Ikawa, Yesu alipoyamaliza maneno hayo, akaondoka Galilea, akaja mipakani kwa Yudea ng'ambo ya Yordani.

²Wakamfuata makundi mengi ya watu akawaponya huko.

³Nao Mafariseo wakamjia, wakamjaribu wakimwuliza: Iko ruhusa, mtu amwache mkewe kwa sababu yo yote?[#Mat. 5:31-32.]

⁴Naye akajibu akisema: Hamkusoma, ya kuwa Muumbaji hapo mwanzo aliwaumba mume na mke, akasema:[#1 Mose 1:27.]

⁵Kwa sababu hii mtu atamwacha baba yake na mama yake,

agandamiane na mkewe, nao hao wawili watakuwa mwili

mmoja?

⁶Kwa hiyo sio wawili tena, ila wamekuwa mwili mmoja tu. Basi, Mungu alichokiunga, mtu asikiungue![#1 Kor. 7:10-11.]

⁷Wakawambia: Mose aliagiziaje tena kuwapa watu cheti cha kuachana, kisha kuwaacha?[#5 Mose 24:1.]

⁸Akawaambia: kwa ajili ya ugumu wa mioyo yenu Mose aliwapa ruhusa ya kuwaacha wake zenu. Lakini tokea hapo mwanzo havikuwapo hivyo.

⁹Nami nawaambiani: Mtu akimwacha mkewe, isipokuwa kwa ajili ya ugoni, akaoa mwingine, anazini; naye anayeoa mke aliyeachwa anazini.[#Mat. 14:4; Luk. 16:18.]

¹⁰Wanafunzi wakamwambia: Mambo ya mtu na mkewe yakiwa hivyo, haifai kuoa.

¹¹Naye akawaambia: Sio wote wanaoweza kuitambua maana yake neno hili, ni wale tu waliofunuliwa.[#1 Kor. 7:7,11.]

¹²Kwani katika watu wasiozaa, wako waliozaliwa hivyo tangu tumboni mwa mama zao. Tena wako wengine waliokomeshwa na watu, wasizae. Tena wako wengine waliojikomesha wenyewe, wasizae kwa ajili ya ufalme wa mbingu. Anayeweza kuitambua maana na aitambue!

Kuwabariki watoto.

¹³Hapo ndipo, alipoletewa vitoto, awabandikie mikono na kuwaombea. Lakini wanafunzi waliwatisha.

¹⁴Ndipo, Yesu aliposema: Waacheni vitoto, msiwazuie kuja kwangu! Kwani walio hivyo ufalme wa mbingu ni wao[#Mat. 18:2-3.]

¹⁵Akawabandikia mikono; kisha akaondoka pale, akaenda zake.

Mwenye mali nyingi.

¹⁶Hapo ndipo mmoja alipomjia na kusema: Mfunzi mwema, nifanye jambo jema gani, niupate uzima wa kale na kale?

¹⁷Naye akamwambia: Unaniulizaje jambo lililo jema? Aliye mwema ni mmoja. Lakini ukitaka kuingia uzimani yashike maagizo![#Luk. 10:26-28.]

¹⁸Alipomwuliza: Yapi? Yesu akasema: Ni haya: Usiue! Usizini! Usiibe! Usisingizie![#2 Mose 20:12-16; 5 Mose 5:17-20.]

¹⁹Mheshimu baba na mama! nalo hilo: Umpende mwenzio, kama unavyojipenda mwenyewe![#2 Mose 20:12; 3 Mose 19:18; 5 Mose 5:16.]

²⁰Yule kijana akamwambia: Hayo yote nimeyashika; ninalolisaza la kulifanya ni nini tena?

²¹Yesu akamwambia: Ukitaka kuyatimiza yote nenda, uviuze, ulivyo navyo, uvigawie maskini! Hivyo utakuwa na kilimbiko mbinguni. Kisha uje, unifuate![#Mat. 6:20; Luk. 12:33.]

²²Lakini yule kijana alipolisikia neno hili akaenda zake na kusikitika, kwani alikuwa mwenye mali nyingi.[#Sh. 62:11.]

²³Kisha Yesu akawaambia wanafunzi wake: Kweli nawaambiani: Ni vigumu, mwenye mali aingie katika ufalme wa mbingu.

²⁴Tena nawaambiani: Masumbuko ya ngamia ya kupenya tunduni mwa sindano ni madogo kuliko yake mwenye mali ya kuingia ufalme wa Mungu.[#Mat. 7:14.]

²⁵Wanafunzi walipoyasikia wakastuka sana, wakasema: Ikiwa hivyo, yuko nani awezaye kuokoka?

²⁶Yesu akawachungua, akawaambia: Kwa watu neno hili haliwezekani, lakini kwa Mungu mambo yote huwezekana.[#1 Mose 18:14; Iy. 42:2; Zak. 8:6.]

²⁷Hapo Petero akamjibu akimwambia: Tazama, sisi tumeviacha vyote, tukakufuata wewe; basi, tutapata nini?[#Mat. 4:20.]

²⁸Ndipo, Yesu alipowaambia: Kweli nawaambiani: Siku, ulimwengu utakapopata kuwa mpya, Mwana wa mtu atakapokaa katika kiti cha utukufu wake, hapo ndipo nanyi mlionifuata mimi mtakapokaa katika viti vya kifalme kumi na viwili, myahukumu hayo mashina kumi na mawili ya Isiraeli.[#Luk. 22:30; 5 Mose 7:9-10; 1 Kor. 6:2.]

²⁹Ndipo, kila mtu aliyeacha nyumba au kaka au dada au baba au mama au wana au mashamba kwa ajili ya Jina langu atakapoyapata tena na kuongezwa mara nyingi, kisha ataurithi nao uzima wa kale na kale.[#Ebr. 10:34.]

³⁰Lakini wengi walio wa kwanza watakuwa wa mwisho, nao walio wa mwisho watakuwa wa kwanza.[#Mat. 20:16; Luk. 13:30.]