Kuwatisha waandishi na Mafariseo.

¹Kisha Yesu akasema na watu waliokutanika na wanafunzi wake,

²kwamba: Kitini pa Mose wamekaa waandishi na Mafariseo.

³Yo yote, watakayowaambia, yafanyeni na kuyashika! Lakini kama wafanyavyo, msiyafuate! Kwani kusema wanasema, lakini hawayafanyi.[#Mal. 2:7-8; Rom. 3:21-23.]

⁴Huwafungia watu mizigo mizito isiyochukulika wakiwawekea mabegani, lakini wenyewe hawataki kuigusa hata kwa kidole chao kimoja tu.[#Tume. 15:10.]

⁵Matendo yao yote huyafanyia kutazamwa na watu. Hukuza makaratasi ya kuombea, huviongeza navyo vishada vya nguo zao, viwe vinene.[#Mat. 6:1; 2 Mose 13:9; 4 Mose 15:38-39; 5 Mose 6:8.]

⁶Wakialikwa chakulani hupenda kukaa penye wakuu, namo nyumbani mwa kuombea hupenda viti vya mbele.[#Luk. 14:7.]

⁷Hupenda kuamkiwa na watu sokoni na kuitwa mfunzi mkuu.

⁸Lakini ninyi msitake kuitwa mfunzi mkuu! Kwani mfunzi wenu ni mmoja, ndiye Kristo, nanyi nyote ni ndugu.

⁹Tena nchini msimwite mtu baba yenu! Kwani baba yenu ni mmoja, ni wa mbinguni.

¹⁰Wala msitake kuitwa kiongozi! Kwani kiongozi wenu ni mmoja, ni Kristo.

¹¹Lakini kwenu aliye mkubwa na awatumikie ninyi![#Mat. 20:26-27.]

¹²Kwani atakayejikweza mwenyewe atanyenyekezwa; naye atakayejinyenyekeza mwenyewe atakwezwa.[#Iy. 22:29; Fano. 29:23; Ez. 21:26; Luk. 14:11; 18:14; 1 Petr. 5:5.]

¹³Yatawapata ninyi waandishi na Mafariseo mlio wajanja, kwani mnawafungia watu mlango wa ufalme wa mbingu. Ninyi hamwingii, nao wanaotaka kuingia hamwaachi, waingie.

¹⁴Yatawapata ninyi waandishi na Mafariseo mlio wajanja, kwani mnazila nyumba za wajane mkijitendekeza, kama mnakaza kuwaombea. Kwa hiyo mapatilizo yenu yatakuwa kuliko ya wengine.[#Ez. 22:25.]

¹⁵Yatawapata ninyi waandishi na Mafariseo mlio wajanja, kwani mnazunguka baharini na katika nchi kavu, mpate mfuasi mmoja tu; kisha hapo akipatikana, mnamgeuza kuwa wa kutumbukizwa motoni kuwapita ninyi kabisa.

¹⁶Yatawapata ninyi viongozi vipofu mnaosema: Mtu atakapoapa na kulitaja Jumba la Mungu, si kitu; lakini mtu atakapoapa na kuitaja dhahabu ya Jumba la Mungu amejifunga![#Mat. 5:34-37; 15:14.]

¹⁷Wajinga na vipofu ninyi! Iliyo kubwa ni nini? Dhahabu au Jumba la Mungu linaloitakasa dhahabu?

¹⁸Tena mnasema: Mtu atakapoapa na kuitaja meza ya Bwana, si kitu; lakini atakapoapa na kukitaja kipaji kilichoko juu yake amejifunga!

¹⁹Vipofu ninyi! Iliyo kubwa ni nini? Kipaji au meza ya Bwana inayokitakasa kipaji?[#2 Mose 29:37.]

²⁰Mtu anayeapa na kuitaja meza ya Bwana huapa na kuitaja hiyo meza pamoja navyo vyote vilivyopo pake.

²¹Tena mtu anayeapa na kulitaja Jumba la Mungu huapa na kulitaja hilo Jumba pamoja naye yule anayekaa humo.

²²Tena mtu anayeapa na kuitaja mbingu huapa na kukitaja kiti cha kifalme cha Mungu pamoja na yeye anayekikalia.[#Mat. 5:34.]

²³Yatawapata ninyi waandishi na Mafariseo mlio wajanja, kwani fungu la kumi mnalitolea hata mchicha na nyanya na pilipili, lakini yaliyo magumu katika Maonyo mmeyaacha, yale ya hukumu na ya huruma na ya mategemeo. Haya yawapasa kuyashika pasipo kuyaacha yale.[#3 Mose 27:30; Mika 6:8.]

²⁴Viongozi vipofu ninyi, mbu mnawatema, lakini ngamia mnawameza!

²⁵Yatawapata ninyi waandishi na Mafariseo mlio wajanja, kwani vinyweo na vyano mnaviosha nje, lakini ndani vimejaa mapokonyo na mapujufu.[#Mar. 7:4-13.]

²⁶Fariseo kipofu, kwanza osha ndani yake kinyweo na chano, vipate kuwa safi hata nje![#Yoh. 9:40; Tit. 1:15.]

²⁷Yatawapata ninyi waandishi na Mafariseo mlio wajanja, kwani mmefanana na makaburi yaliyopakwa chokaa, nayo huonekana nje kuwa mazuri, lakini ndani hujaa mifupa ya wafu na uchafu wote.[#Tume. 23:3.]

²⁸Vivyo hivyo nanyi nje mnaonekana kwa watu kuwa waongofu, lakini ndani yenu imejaa ujanja na upotovu.[#Luk. 16:15.]

²⁹Yatawapata ninyi waandishi na Mafariseo mlio wajanja, kwani mnayajenga makaburi ya wafumbuaji, tena mnayapamba makumbusho ya waongofu

³⁰na kusema: Sisi kama tungalikuwapo siku za baba zetu, basi, hatungalifanya nao bia ya kuwaua wafumbuaji.

³¹Hivyo mnajishuhudia wenyewe, ya kuwa m-wana wao waliowaua wafumbuaji.[#Tume. 7:52.]

³²Nanyi kijazeni kipimo cha baba zenu!

³³M nyoka, m wana wa chatu! Mtaikimbiaje hukumu ya kutumbukizwa shimoni mwa moto?[#Mat. 3:7.]

³⁴*Kwa sababu hii tazameni, mimi natuma kwenu wafumbuaji na werevu wa kweli na waandishi; wengine wao mtawaua na kuwawamba misalabani, wengine wao mtawapiga katika nyumba zenu za kuombea, kisha mtawafukuza mji kwa mji;[#Mat. 10:23; 13:52; 1 Tes. 2:15.]

³⁵hivyo zitawajia damu zote za waongofu zilizomwagwa nchini, kuanzia damu ya Abeli aliyekuwa mwongofu mpaka kuifikia damu ya Zakaria, mwana wa Berekia, mliyemwua katikati ya Jumba la Mungu na meza ya Bwana.[#1 Mose 4:8; 2 Mambo 24:20-21.]

³⁶Kweli nawaambiani: hayo yote yatawajia wao wa kizazi hiki.

³⁷Yerusalemu, Yerusalemu, unawaua wafumbuaji, ukawapiga mawe walitumwa kwako! Mara ngapi nimetaka kuwakusanya watoto wako, kama kuku anavyovikusanya vifaranga vyake mabawani! Lakini hamkutaka![#Luk. 13:34-35; Tume. 7:59; 1 Tes. 2:15.]

³⁸Mtaona, Nyumba yenu ikiachwa, iwe peke yake![#1 Fal. 9:7-8; Yer. 12:7; 22:5.]

³⁹Kwani nawaambiani: Tangu sasa hamtaniona tena, mpaka mtakaposema: Na atukuzwe ajaye kwa Jina la Bwana!*[#Mat. 21:9; 26:64; Sh. 118:26; Rom. 11:26.]