Wanawali kumi.

¹*Hapo ufalme wa mbingu utafanana na wanawali kumi walioshika taa zao, wakatoka kwenda kumpokea bwana arusi.[#Luk. 12:35-36; Ufu. 19:7.]

²Watano wao walikuwa wajinga, wenzao watano walikuwa werevu.

³Kwani wale wajinga walizishika taa zao tu, wasichukue na mafuta.

⁴Lakini wale werevu walichukua mafuta katika vichupa pamoja na taa zao.

⁵Bwana arusi alipokawia, wakasinzia wote, wakalala usingizi.

⁶Kati ya usiku pakawa na kelele: Tazameni, bwana arusi huyo! Tokeni, mmpokee!

⁷Ndipo, wanawali wale wote walipoinuka, wakazitengeneza taa zao.

⁸Lakini wajinga wakawaambia wenzao werevu: Tugawieni mafuta yenu! kwani taa zetu zinazimika.

⁹Lakini wale werevcu wakajibu wakisema: Sivyo, hayatatutosha sisi na ninyi; sharti mwende kwa wachuuzi, mjinunulie wenyewe!

¹⁰Walipokwenda kununua, bwana arusi akafika, nao waliokuwa tayari wakaingia pamoja naye arusini, kisha mlango ukafungwa.

¹¹Halafu wakaja nao wanawali wale wengine wakasema: Bwana, Bwana, tufungulie![#Luk. 13:25,27.]

¹²Lakini akajibu akisema: Kweli nawaambiani: Siwajui ninyi.[#Mat. 7:23.]

¹³Kwa hiyo kesheni! Kwani hamwijui siku wala saa, Mwana wa mtu atakapojia.*[#Mat. 24:42.]

Elfu za fedha.

¹⁴Kwani vinafanana na mtu aliyefunga safari, akawaita watumwa wake mwenyewe, akawapa mali zake kuzitunza.[#Mat. 21:33.]

¹⁵Akampa kila mtu fungu, aliwezalo mwenyewe kulitunza, mmoja fedha elfu tano, mmoja elfu mbili, mmoja elfu moja, kisha akaenda zake.[#Rom. 12:6.]

¹⁶Yule aliyepokea elfu tano akaenda, akazichuuzia, akachuma nazo nyingine elfu tano.

¹⁷Vile vile na yule aliyepokea elfu mbili, naye akachuma nazo nyingine elfu mbili.

¹⁸Lakini yule aliyepokea elfu moja akaenda, akachimba shimo, akazifukia mle fedha za bwana wake.

¹⁹Siku zilipopita nyingi, akaja bwana wa watumwa wale, akafanya hesabu nao.

²⁰Akaja yule aliyepokea elfu tano, akaleta elfu tano nyingine akasema: Bwana, umenipa elfu tano; tazama, nimechuma elfu tano nyingine.

²¹Bwana wake akamwambia: Vema, wewe mtumwa mwema na mwelekevu, ulikuwa mwelekevu wa machache, nitakupa kutunza mengi. Ingia penye furaha ya bwana wako![#Mat. 24:45-47; 25:23; Luk. 16:10; 2 Tim. 4:7-8.]

²²Akaja na yule aliyepokea elfu mbili, akasema: Bwana, umenipa elfu mbili. Tazama, nimechuma elfu mbili nyingine.

²³Bwana wake akamwambia: Vema, wewe mtumwa mwema na mwelekevu, ulikuwa mwelekevu wa machache, nitakupa kutunza mengi. Ingia penye furaha ya bwana wako![#Mat. 25:21.]

²⁴Akaja na yule aliyekuwa amepokea elfu moja, akasema: Bwana, nalitambua, ya kuwa wewe u mkorofi; huvuna, usipopanda, hukusanya, usipotandaza.

²⁵Nikaogopa, nikaenda, nikazifukia fedha zako shimoni. Tazama, hizi mali zako, uzichukue!

²⁶Lakini bwana wake akajibu akimwambia: Mtumwa mbaya wewe! U mvivu! Ulinijua, ya kuwa navuna, nisipopanda, nakusanya nisipotandaza?

²⁷Basi, ilikupasa kuziweka fedha zangu kwao wenye maduka, nami nilipokuja ningalizichukua zilizo zangu pamoja na faida.

²⁸Kwa hiyo ichukueni elfu yake ya fedha, mmpe mwenye elfu kumi!

²⁹Kwani kila mwenye mali atapewa, ziwe nyingi zaidi; lakini asiye na kitu atachukuliwa hata kile, alicho nacho.[#Mat. 13:11-12.]

³⁰Lakini huyu mtumwa asiyefaa mtupeni penye giza lililoko nje! Ndiko, kitakakokuwa kilio na kukereza meno.[#Mat. 8:12.]

Hukumu ya mwisho.

³¹*Hapo, atakapokuja Mwana wa mtu mwenye utukufu wake na malaika wote pamoja naye, ndipo, atakapokalia kiti cha utukufu wake,[#Mat. 16:27; Zak. 14:5; Ufu. 20:11-13.]

³²nayo mataifa yote yatakusanywa mbele yake; naye atawabagua, kama mchungaji anavyowabagua kondoo na mbuzi.[#Mat. 13:48-49; Rom. 14:10; Ufu. 20:12.]

³³Atawaweka kondoo kuumeni kwake, nao mbuzi kushotoni.[#Ez. 34:17.]

³⁴Hapo mfalme atawaambia walioko kuumeni kwake: Njoni, mliobarikiwa na Baba yangu, urithini ufalme, mliotengenezewa tangu hapo, ulimwengu ulipoumbwa!

³⁵Kwani nilipokuwa na njaa, mlinipa chakula; nilipokuwana kiu, mlininywesha; nilipokuwa mgeni, mlinipokea;[#Yes. 58:7.]

³⁶nilipokuwa uchi, mlinivika; nilipokuwa mgonjwa, mlinikagua; nilipokuwa kifungoni mlinijia.

³⁷Ndipo wale waongofu watakapomjibu: Bwana, ni lini, tulipokuona na njaa, tukakulisha? Au tulipokuona na kiu, tukakunywesha?[#Mat. 6:3.]

³⁸Tena ni lini, tulipokuona mgeni, tukakupokea? Au tulipokuona uchi, tukakuvika?

³⁹Ni lini tena, tulipokuona mgonjwa au kifungoni, tukakujia?

⁴⁰Naye mfalme atawajibu akisema: Kweli nawaambiani: Yote, mliyomtendea mwenzao mmoja wa hawa ndugu zangu wadogo, mlinitendea mimi.[#Mat. 10:42; Fano. 19:17; Ebr. 2:11.]

⁴¹Kisha atawaambia walioko kushotoni: Ondokeni kwangu, mlioapizwa, mwingie kwenye moto usiozimika, uliowashiwa Satani na malaika zake![#Mat. 7:23; Ufu. 20:10,15.]

⁴²Kwani nilipokuwa na njaa, hamkunipa chakula; nilipokuwa na kiu, hamkuninywesha;

⁴³nilipokuwa mgeni, hamkunipokea; nilipokuwa uchi, hamkunivika; nilipokuwa mgonjwa na kifungoni, hamkuja kunikagua.

⁴⁴Ndipo, nao wale watakapojibu wakisema: Bwana, ni lini, tulipokuona na njaa au na kiu au mgeni au mwenye uchi au mgonjwa au kifungoni, tusikutumikie?

⁴⁵Hapo atawajibu akisema: Kweli nawaambiani: Yote, msiyomtendea mwenzao mmoja tu wa hawa ndugu zangu wadogo, basi hamkunitendea hata mimi.

⁴⁶Kisha hawa watakwenda kuingia penye maumivu ya kale na kale. Lakini wale waongofu watakwenda kuingia penye uzima wa kale na kale.*[#Dan. 12:2; Yoh. 5:29; Yak. 2:13.]