Kufufuka.

¹*Siku ya mapumziko ilipokwisha, siku ya kwanza ya juma kulipokucha, wakaenda Maria Magdalena na yule Maria mwingine kulitazama kaburi.

²Mara kukawa na tetemeko kubwa la nchi. Kwani malaika wa Bwana alishuka toka mbinguni, akaja akalifingirisha lile jiwe, likatoka mlangoni, akalikalia.

³Sura yake ilikuwa kama umeme, nguo zake zikang'aa kama chokaa juani.[#Mat. 17:2; Tume. 1:10.]

⁴Walinzi wakaingiwa na woga, wakatetemeka, wakawa kama wafu.

⁵Malaika akawaambia wale wanawake akisema: Msiogope! Kwani ninajua, ya kuwa mnamtafuta Yesu aliyewambwa msalabani.

⁶Hayumo humu, kwani amefufuliwa, kama alivyosema. Njoni, mpatazame mahali, Bwana alipokuwa amewekwa![#Mat. 12:40; 16:21; 17:23; 20:19; Tume. 2:36.]

⁷Nanyi nendeni upesi, mwaambie wanafunzi wake kwamba: Amefufuliwa katika wafu! Tazameni, anawatangulia ninyi kwenda Galilea. Huko ndiko, mtakakomwona. Tazameni, nimekwisha kuwaambia.[#Mat. 26:32.]

⁸Wakatoka upesi kaburini wakishikwa na woga, tena wakifurahi sana, wakaenda mbio kuwasimulia wanafunzi wake.

⁹Mara Yesu akakutana nao, akasema: Salamu kwenu! Nao wakamjia, wakamshika miguu yake, wakamwangukia.

¹⁰Ndipo, Yesu alipowaambia: Msiogope, nendeni, mwasimulie ndugu zangu, waende Galilea! Ndiko, watakakoniona.*[#Ebr. 2:11.]

¹¹Walipokwenda zao, mara nao walinzi wakafika mjini mmoja mmoja, wakasimulia watambikaji wakuu yote yaliyokuwapo.[#Mat. 27:65.]

¹²Wakakusanyika pamoja na wazee, wakala njama, wakatoa fedha nyingi za kuwapa wale askari,

¹³wakawaambia: Semeni: Wanafunzi wake wamekuja usiku, wakamwiba, sisi tulipokuwa tumelala![#Mat. 27:64.]

¹⁴Neno hili likijulikana kwa mtawala nchi, sisi tutasema naye kwa werevu, ninyi msipate mahangaiko.

¹⁵Kwa hiyo wakazichukua zile fedha, wakafanya kama walivyofundishwa. Nalo neno hili linasimuliwa kwa Wayuda mpaka leo.

¹⁶*Wale wanafunzi kumi na mmoja wakaenda Galilea, wakafika mlimani pale, Yesu alipowaagizia.[#Mat. 28:7.]

¹⁷Walipomwona wakamwangukia, lakini wengine waliingiwa na mashaka.

¹⁸Naye Yesu akawajia, akawaambia: Nimepewa nguvu zote mbinguni na nchini.[#Mat. 11:27; Dan. 7:14; Ef. 1:20-22.]

¹⁹Nendeni, mkawafundishe wao wa mataifa yote, wawe wanafunzi wangu, mkiwabatizia Jina la Baba na la Mwana na la Roho Mtakatifu[#Mar. 16:15-16.]

²⁰na kuwafundisha, wayashike yote, niliyowaagiza! Tazameni, niko pamoja nanyi siku zote, mpaka dunia itakapokoma.*[#Mat. 18:20; 24:14; Yoh. 14:23; 2 Kor. 5:20.]