Maumbufu.

¹Msiumbue mtu, msije mkaumbuliwa![#Rom. 2:1; 14:4; 1 Kor. 4:5.]

²Kwani kama mnavyowaumbua wengine, ndivyo, mtakavyoumbuliwa wenyewe. Kipimo, mnachopimia wengine, ndicho, mtakachopimiwa nanyi.[#Mar. 4:24.]

³Nawe unakitazamiani kibanzi kilichomo jichoni mwa ndugu yako, lakini gogo lililomo jichoni mwako wewe hulioni?

⁴Au utamwambiaje ndugu yako: Ngoja, nikitoe kibanzi katika jicho lako, wewe mwenyewe ukiwa unalo gogo zima jichoni mwako?

⁵Mjanja, kwanza litoe gogo katika jicho lako! Kisha utazame vema, ndivyo upate kukitoa kibanzi katika jicho la ndugu yako!

⁶Kilichotakata msiwape mbwa, wala msiwatupie nguruwe ushanga wenu wa lulu, wasije wakaukanyaga kwa miguu yao na kuwageukia na kuwararua ninyi.[#Mat. 10:11,14-15; Luk. 23:9; 2 Petr. 2:12-22.]

Kuomba na kupewa.

⁷Ombeni! ndipo, mtakapopewa. Tafuteni! ndipo, mtakapoona. Pigeni hodi! ndipo, mtakapofunguliwa mlango.[#Yer. 29:13-14; Mar. 11:24; Luk. 11:5-13; Yoh. 14:13.]

⁸Kwani kila anayeomba hupewa, naye anayetafuta huona, naye anayepiga hodi hufunguliwa mlango.

⁹Au kwenu yuko mtu, mwanawe anapomwomba mkate, ampe jiwe?

¹⁰Au anapomwomba samaki, ampe nyoka?

¹¹Basi, ninyi mlio wabaya mkijua kuwapa watoto wenu vipaji vyema, Baba yenu alioko mbinguni asizidi kuwapa mema wanaomwomba?[#Yak. 1:17.]

¹²Yo yote, mnayotaka, watu wawafanyie ninyi, nanyi mwafanyie yaleyale! Kwani hayo ndiyo Maonyo na Wafumbuaji.[#Mat. 22:39-40; Luk. 6:31; Rom. 13:8-10.]

Mlango mfinyu.

¹³*Uingieni mlango ulio mfinyu! Kwani liko lango lililo pana, nayo njia yake ni kubwa; ndiyo inayokwenda penye kuangamizwa, nao wanaoingia mle ni wengi.[#Luk. 13:24; Fil. 3:12.]

¹⁴Tena uko mlango ulio mfinyu, nayo njia yake inasonga; ndiyo inayokwenda penye uzima, lakini wanaoiona ni wachache.[#Mat. 19:24; Tume. 14:22.]

Wafumbuaji wa uwongo.

¹⁵Jilindeni kwa ajili ya wafumbuaji wa uwongo! Wanawajia wamevaa kama kondoo, lakini mioyoni ni mbwa wa mwitu wenye ukali.[#Mat. 24:4-5,11,24; Tume. 20:29; 2 Kor. 11:13-15.]

¹⁶Kwa matunda yao mtawatambua. Je? Huchuma zabibu miibani? Au huchuma kuyu mikongeni?[#Gal. 5:19-22; Yak. 3:12.]

¹⁷Hivyo kila mti mwema huzaa matunda mazuri; lakini mti mwovu huzaa matunda mabaya.[#Mat. 12:33.]

¹⁸Mti mwema hauwezi kuzaa matunda mabaya, wala mti mwovu hauwezi kuzaa matunda mazuri

¹⁹Kila mti usiozaa matunda mazuri hukatwa, utupwe motoni.[#Mat. 3:10; Yoh. 15:2-6.]

²⁰Kwa hiyo mtawatambua kwa matunda yao.[#Rom. 2:13; Yak. 1:22,25; 2:14.]

²¹Miongoni mwao wanaoniita: Bwana! Bwana! sio wote wakaoingia katika ufalme wa mbingu, ni wao tu wanaoyafanyiza, Baba yangu alioko mbinguni ayatakayo.

²²Siku ile wengi wataniuliza: Bwana, sisi hatukufumbua kwa Jina lako? Hatukufukuza pepo kwa Jina lako? Hatukufanya mengi yenye nguvu kwa Jina lako?[#Luk. 13:25-27; 1 Kor. 13:1-2.]

²³Ndipo, nitakapowaambia waziwazi: Sijawatambua ninyi kabisa. Ondokeni kwangu, mliofanya maovu!*[#Mat. 25:41; 2 Tim. 2:19; Sh. 6:9.]

Nyumba juu ya mwamba.

²⁴*Basi, kila mtu anayeyasikia haya maneno yangu na kuyafanyiza atafanana na mtu mwenye akili aliyeijenga nyumba yake mwambani.[#Mat. 7:21.]

²⁵Mvua kubwa ikanyesha, mito ikajaa, pepo zikavuma, vyote vikaipiga ile nyumba, lakini haikuanguka, kwani misingi yake ilikuwa imejengwa mwambani.

²⁶Lakini kila mtu anayeyasikia haya maneno yangu asipoyafanyiza atafanana na mtu mpumbavu aliyeijenga nyumba yake mchangani.

²⁷Mvua kubwa ikanyesha, mito ikajaa, pepo zikavuma vyote vikaipiga ile nyumba, basi, ikaanguka, anguko lake likawa kubwa.[#Ez. 13:10-11.]

²⁸Ikawa, Yesu alipokwisha kuyasema maneno haya, makundi ya watu walishangazwa na mafundisho yake.[#Mar. 1:22; Luk. 4:32.]

²⁹Kwani alikuwa akiwafundisha kama wenye nguvu, si kama waandishi wao.*[#Yoh. 7:16,46.]