Mabaya yatakayowapata wapotovu.

¹Yatawapata wanaowaza maovu,

watungao mabaya vitandani mwao,

wayafanye asubuhi kutakapopambazuka,

mikono yao ikiweza kuyamaliza.

²Kwa kutamani mashamba huyanyang'anya;

ikiwa nyumba, huzichukua nazo,

humkorofisha mwenye nyumba pamoja nao waliomo,

vilevile mwenye shamba, ijapo liwe fungu lake.

³Kweli hivi ndivyo, Bwana anavyosema:

Mtayaona mabaya, ninayouwazia mlango huu!

Yakiwapata, hamtaweza kuzitoa shingo zenu mle,

wala hamtaweza kwenda na kuzinyosha shingo zenu,

kwani siku hizo zitakuwa mbaya kweli.

⁴Siku hiyo watawatungia ninyi mfano,

wataomboleza ombolezo la kwamba:

Imefanyika! Tumeangamizwa!

Mafungu yao walio ukoo wangu anawapa wengine!

Kumbe mimi ameninyang'anya mashamba yetu,

awagawie wao wamkataao!

⁵Kwa hiyo hamtapata tena katika mkutano wa Bwana

atakayempimia mtu fungu, alilolipata kwa kura.

⁶Wao huhubiri: Msihubiri! Haifai kuhubiri mambo kama hayo, matusi nayo hayakomi![#Amo. 7:16.]

⁷Je? Sio walio mlango wa Yakobo wanaosema: Inakuwaje? Roho yake Bwana ni nyepesi ya kukasirika? Au matendo yake ni yayo hayo? Hasemi: Ninamwendea kwa wema ashikaye njia inyokayo?[#Amo. 6:3.]

⁸Lakini tangu kale mmewainukia walio ukoo wangu, kama ni adui zenu; wapitao pasipo mawazo mabaya mwawavua kanzu za juu na mavazi ya ndani, kama ni mateka ya vitani.

⁹Wanawake wao walio ukoo wangu mwawafukuza katika nyumba zao zilizowapendeza, watoto wachanga wao mkawanyang'anya utukufu wangu, wasiupate kale na kale.

¹⁰Kwa hiyo: Ondokeni! Nendeni! Kwani huku hakuna pa kutulia kwa ajili ya uchafu unaowaangamiza, mwangamie kabisa kabisa.

¹¹Kama angekuja mtu anayegeukageuka kama upepo, anayedanganya watu kwa kuwaongopea, kama angesema: Nitawahubiri mambo ya mvinyo na ya vileo, basi, yeye angekuwa mhubiri, watu hawa wanayemtaka.

Kiagio cha wokovu wa masao ya Isiraeli.

¹²Kweli nitawaokota nyote pia mlio wa Yakobo;

kweli nitawakusanya mlio masao ya Isiraeli,

niwaweke pamoja zizini kama kondoo,

wawe kama kundi la kondoo walioko katikati ya malisho

yao,

wafanye mtutumo kwa kuwa watu wengi.

¹³Mwenye kuwavunjia njia atawatangulia,

wapite langoni kwa kupavunja, watoke nje papo hapo;

ndipo, mfalme wao atakapowaongoza,

lakini atakayekwenda mbele yao wote ni Bwana.