Cheti cha kuachana.

¹Akaondoka huko, akaja mipakani kwa Yudea na ng'ambo ya Yordani. Walipomkusanyikia tena makundi ya watu, akawafundisha tena, kama alivyozoea.[#Mar. 9:33.]

²Mafariseo wakamjia, wakamwuliza, kama iko ruhusa, mwanamume amwache mkewe.

³Naye akajibu akiwaambia: Mose aliwaagiza nini?

⁴Nao wakasema: Mose alitupa ruhusa kuandika cheti cha kuachana, kisha kumwacha.[#5 Mose 24:1; Mat. 5:31-32.]

⁵Yesu akawaambia: Kwa ajili ya ugumu wa mioyo yenu aliwaandikia agizo hilo.

⁶Lakini tokea hapo mwanzo wa viumbe aliwaumba mume na mke.[#1 Mose 1:27.]

⁷Kwa sababu hii mtu atamwacha baba yake na mama yake,

⁸nao hao wawili watakuwa mwili mmoja.

⁹Kwa hiyo sio wawili tena, ila wamekuwa mwili mmoja tu. Basi, Mungu alichokiunga, mtu asikiungue!

¹⁰Nyumbani wanafunzi wakamwuliza tena kwa ajili ya neno hilo.

¹¹Akawaambia: Mtu akimwacha mkewe na kuoa mwingine anazini naye.[#Luk. 16:18.]

¹²Naye mke akimwacha mumewe na kuolewa na mwingine anazini.

Kuwabariki watoto.

¹³*Wakamletea vitoto, awaguse. Lakini wanafunzi waliwatisha waliowaleta.

¹⁴Yesu alipoviona akachukizwa, akawaambia: Waacheni vitoto, waje kwangu, msiwazuie! Kwani walio hivyo ufalme wa Mungu ni wao.

¹⁵Kweli nawaambiani: Mtu asiyeupokea ufalme wa Mungu kama kitoto hatauingia kamwe.[#Mat. 18:3.]

¹⁶Kisha akawakumbatia, akawabariki akiwabandikia mikono.*[#Mar. 9:36.]

Mwenye mali nyingi.

¹⁷*Alipotoka na kufika njiani, mmoja akamjia mbio, akampigia magoti, akamwuliza: Mfunzi mwema, nifanye nini, niurithi uzima wa kale na kale?

¹⁸Yesu akamwambia: Unaniitaje mwema? Hakuna aliye mwema, asipokuwa Mungu peke yake tu.

¹⁹Maagizo unayajua, ya kwamba: Usiue! Usizini! Usiibe! Usisingizie! Usipunje! Mheshimu baba yako na mama yako![#2 Mose 20:12-16; 5 Mose 5:16-20.]

²⁰Naye akamwambia: Mfunzi, hayo yote nimeyashika, tangu nilipokuwa kijana.

²¹Yesu akamtazama, akampenda, akamwambia: Umesaza kimoja: nenda, uviuze vyote, ulivyo navyo, uvigawie maskini! Hivyo utakuwa na kilimbiko mbinguni. Kisha uje, ujitwishe msalaba wako, unifuate![#Mar. 8:34; Mat. 10:38.]

²²Lakini alipolisikia neno hili alikunjamana uso, akaenda zake na kusikitika, kwani alikuwa mwenye mali nyingi.

²³Kisha Yesu akatazama huko na huko, akawaambia wanafunzi wake: Vitazameni vigumu vinavyowazuia waegemeao mali kuingia katika ufalme wa Mungu!

²⁴Wanafunzi walipoingiwa na kituko kwa hayo mnaneno yake, Yesu akajibu, akawaambia tena: Wanangu, vitazameni vigumu vinavyozuia kuingia katika ufalme wa Mungu![#Sh. 62:11; 1 Tim. 6:17.]

²⁵Masumbuko ya ngamia ya kupenya tunduni mwa sindano ni madogo kuliko yake mwenye mali ya kuuuingia ufalme wa Mungu.

²⁶Nao wakastuka mno, wakasemezana wao kwa wao: Ikiwa hivyo, yuko nani awezaye kuokoka?

²⁷Yesu akawachungua, akasema: Kwa watu haliwezekani, lakini kwa Mungu linawezekana, kwani kwa Mungu mambo yote huwezekana.*[#1 Mose 18:14; Iy. 42:2.]

Malipo.

²⁸Petero akaanza kumwambia: Tazama, sisi tumeviacha vyote, tukakufuata wewe.

²⁹Ndipo, Yesu aliposema: Kweli nawaambiani: Hakuna mtu aliyeacha nyumba au kaka au dada au mama au baba au wana au mashamba kwa ajili yangu na kwa ajili ya Utume mwema,

³⁰asiporudishiwa na kuongezwa mara mia siku hizi za kuwapo huku nchini nyumba na kaka na dada na mama na wana na mashamba, hata akiwa anafukuzwafukuzwa. Tena siku zile zitakazokuja ataupata nao uzima wa kale na kale.

³¹Lakini wengi walio wa kwanza watakuwa wa mwisho, nao walio wa mwisho watakuwa wa kwanza.

Mwana wa mtu atateswa.

³²Walipokuwa njiani wakipanda kwenda Yerusalemu, Yesu alikuwa anatangulia mbele yao. Nao wakashikwa na kituko, wakamfuata na kuogopa. Akawachukua tena wale kumi na wawili, akaanza kuwaambia mambo yatakayompata,[#Mar. 9:31; Yoh. 11:16,55.]

³³akasema: Tazameni, tunapanda kwenda Yerusalemu. Huko Mwana wa mtu atatiwa mikononi mwao watambikaji wakuu na waandishi, nao watamhukumu, auawe; kwa hiyo watamtia mikononi mwa wamizimu.

³⁴Ndio watakaomfyoza na kumtemea mate na kumpiga viboko na kumwua. Naye, siku tatu zitakapopita, atafufuka.

35 Yakobo na Yohana.

³⁵*Yakobo na Yohana, wana wa Zebedeo, wakamsogelea wakimwambia: Mfunzi, twataka, ufufanyie lo lote, tutakalokuomba.

³⁶Alipowauliza: Mwataka, niwafanyie nini?

³⁷wakamwambia: Utuketishe mmoja kuumeni na mmoja kushotoni kwako katika utukufu wako!

³⁸Yesu akawaambia: Hamjui, mnaloliomba. Mwaweza kukinywa kinyweo, ninachokinywa mimi, au kubatizwa ubatizo, ninaobatizwa mimi?[#Mar. 14:36; Luk. 12:50; Rom. 6:3.]

³⁹Walipomwambia: Twaweza, Yesu akawaambia: Kinyweo, ninachokinywa mimi, mtakinywa nao ubatizo, ninaobatizwa mimi, mtabatizwa;[#Tume. 12:2; Ufu. 1:9.]

⁴⁰lakini kumketisha mtu kuumeni au kushotoni kwangu hii si kazi yangu, ila hupewa walioandaliwa.

⁴¹Wenzao kumi walipoyasikia wakaanza kumkasirikia Yakobo na Yohana.

⁴²Yesu akawaita, wamjongelee, akawaambia: Mnajua: wanaotazamwa kuwa wafalme wa mataifa huwatawala, nao wakubwa wao huwatumikisha kwa nguvu. Kwenu ninyi visiwe hivyo![#Luk. 22:25-27.]

⁴³Ila mtu anayetaka kuwa mkubwa kwenu sharti awe mtumishi wenu![#Mar. 9:35.]

⁴⁴Naye anayetaka kuwa wa kwanza kwenu sharti awe mtumwa wao wote!

⁴⁵Kwani naye Mwana wa mtu hakuja, atumikiwe, ila amekuja kutumika na kuitoa roho yake kuwa makombozi ya watu wengi.

Kipofu wa Yeriko.

⁴⁶Wakafika Yeriko. Nao walipotoka Yeriko, yeye na wanafunzi wake na kundi la watu wengi, Bartimeo, mwana wa Timeo, aliyekuwa kipofu alikaa njiani kando akiomba sadaka.

⁴⁷Aliposikia, ya kuwa Yesu wa Nasareti yuko, akaanza kupaza sauti na kusema: Yesu, mwana wa Dawidi, nihurumie!

⁴⁸Wengi walipomkaripia, anyamaze, yeye akakaza sana kupaza sauti: Mwana wa Dawidi, nihurumie!

⁴⁹Ndipo, Yesu aliposimama, akasema: Mwiteni! Wakamwita kipofu, wakamwambia: Tulia moyo, inuka! anakuita.

⁵⁰Naye akaitupa kanzu yake, akainuka upesi, akaja kwa Yesu.

⁵¹Yesu alipomwuliza akisema: Wataka, nikufanyie nini? kipofu akamwambia: Mfunzi mkuu, nataka, nipate kuona.

⁵²Yesu akamwambia: Enenda! Kunitegemea kwako kumekuponya. Mara akapata kuona, akamfuata njiani.