Wakulima wabaya.

¹Akaanza kusema nao kwa mifano. Mtu alipanda mizabibu, akaizungusha ugo, akachimbua kamulio la kuzikamulia zabibu, ajenga dungu, akaipangisha wakulima, kisha akaenda katika nchi nyingine.[#Yes. 5:1-2.]

²Siku zilipotimia, akatuma mtumwa kwa wale wakulima, apewe na wakulima matunda ya mizabibu.

³Nao wakamkamata, wakampiga, wakamrudisha mikono mitupu.

⁴Akatuma tena kwao mtumwa mwingine, naye wakampiga na kumtia vidonda vya kichwani na kumtukana.

⁵Alipotuma tena mwingine, huyo naye wakamwua. Nao wengine wengi, wengine wakawapiga, wengine wakawaua.

⁶Alikuwa na mmoja tena, ndiye mwanawe mpendwa; huyo akamtuma kwao wa mwisho akisema: Watamcha mwanangu.

⁷Lakini wale wakulima wakasemezana wao kwa wao: Huyu ndiye kibwana, njoni, tumwue! Kisha nao urithi wake utakuwa wetu!

⁸Kwa hiyo wakamkamata, wakamwua, wakamtupa nje ya mizabibu.[#Ebr. 13:12.]

⁹Basi, mwenye mizabibu atafanya nini? Atakapokuja atawaangamiza wale wakulima, nayo mizabibu atawapa wengine.

¹⁰Hamjalisoma bado andiko hilo la kwamba:

Jiwe, walilolikataa waashi, hilihili limekuwa la pembeni?

¹¹Hivyo vimefanywa na Bwana; nasi tukivitazama, ni vya

kustaajabu.

¹²Ndipo, walipotafuta kumkamata, lakini waliliogopa kundi la watu. Kwani walitambua, ya kuwa amewasemea wao wenyewe mfano huo. Lakini wakamwacha, wakaenda zao.

Shilingi ya kodi.

¹³Wakatuma kwake Mafariseo na watu wa Herode, wamtege kwa maneno yake.[#Mar. 3:6.]

¹⁴Wakaja, wakamwambia: Mfunzi, tumekujua, ya kuwa wewe ni mtu wa kweli, tena humwuliziulizi mtu ye yote, kwani hutazami nyuso za watu, nayo njia ya Mungu unaifundisha, ilivyo kweli.

¹⁵Iko ruhusa ya kumtolea Kaisari kodi au haiko? Tumpe au tusimpe? Kwa kuujua ujanja wao akawaambia: Mwanijaribiaje? Nileteeni shilingi, niitazame!

¹⁶Walipomletea, akawauliza: Chama hiki cha nani? Maandiko nayo ya nani? Wakamwambia: Ni yake Kaisari.

¹⁷Ndipo, Yesu alipowaambia: Yaliyo yake Kaisari mtoleeni Kaisari, naye Mungu yaliyo yake Mungu! Wakamstaajabu sana.[#Rom. 13:7.]

Kufufuka.

¹⁸Masadukeo wanaosema: Hakuna ufufuko walipokuja kwake wakamwuliza wakisema:

¹⁹Mfunzi, Mose alituandikia kama hivi: Mtu akifiwa na mkubwa wake aliyeacha mkewe, lakini hakuacha mwana, nduguye amchukue huyo mke, amzalie mkubwa wake mwana.[#1 Mose 38:8; 5 Mose 25:5-6.]

²⁰Kulikuwa na waume saba walio ndugu. Wa kwanza akaoa mke, lakini alipokufa hakuacha mwana.

²¹Wa pili naye akamchukua, akafa, asiache mwana. Naye wa tatu vivi hivi.

²²Nao wote saba hawakuacha mwana. Mwisho wao wote akafa naye mwanamke.

²³Basi, katika ufufuko watakapofufuka, atakuwa mke wa yupi wa hao? Kwani wote saba walikuwa naye yule mwanamke.

²⁴Yesu akawaambia: Mkipotelewa hivyo, maana hamyajui Maandiko wala nguvu ya Mungu?

²⁵Kwani watakapofufuka katika wafu hawataoa, wala hawataolewa, ila watakuwa, kama malaika walivyo mbinguni.

²⁶Lakini kwa ajili ya wafu, kwamba wafufuliwa, hamkusoma katika kitabu cha Mose, Mungu alivyomwambia hapo kichakani: Mimi ni Mungu wa Aburahamu na Mungu wa Isaka na Mungu wa Yakobo?[#2 Mose 3:2,6; Mat. 8:11; Luk. 16:22.]

²⁷Basi, Mungu siye wa wafu, ila wao walio hai. Ninyi mnapotelewa sana.

Agizo kubwa.

²⁸Akamjia mwandishi mmoja aliyewasikia, walivyobishana; naye alijua, ya kuwa amewajibu vizuri. Huyo akamwuliza: Katika maagizo yote lililo la kwanza ni lipi?

²⁹Yesu akajibu: La kwanza ndilo hili: Sikia, Isiraeli! Bwana Mungu wetu ni Bwana peke yake.[#5 Mose 6:4-5.]

³⁰Nawe umpende Bwana Mungu wako kwa moyo wako wote na kwa roho yako yote na kwa mawazo yako yote na kwa nguvu yako yote![#Yoh. 15:12.]

³¹La pili ndilo hili: Umpende mwenzio, kama unavyojipenda mwenyewe! Agizo jingine lililo kubwa kuliko haya haliko.[#3 Mose 19:18.]

³²Yule mwandishi akamwambia: Vema, mfunzi, umesema ya kweli: Mungu ni mmoja tu, hakuna mwingine ila yeye.[#5 Mose 4:35; 6:4.]

³³Tena kumpenda yeye kwa moyo wote na kwa mawazo yote na kwa nguvu yote, na kumpenda mwenzio, kama unavyojipenda mwenyewe, hupita ng'ombe za tambiko za kuteketezwa nzima na vipaji vyote vya tambiko.[#1 Sam. 15:22.]

³⁴Yesu alipomwona, ya kuwa amejibu yenye maana, akamwambia: Wewe hu mbali ya ufalme wa Mungu. Kisha hakuwako hata mmoja aliyejipa moyo wa kumwuliza neno tena.[#Tume. 26:27-29.]

Mwana wa Dawidi.

³⁵Yesu alipofundisha hapo Patakatifu akawauliza akisema: Waandishi husemaje, ya kuwa Kristo ni mwana wa Dawidi?

³⁶Dawidi mwenyewe alisema kwa nguvu ya Roho Mtakatifu:

Bwana alimwambia Bwana wangu: Keti kuumeni kwangu,

mpaka niwaweke adui zako chini miguuni pako!

³⁷Basi, Dawidi mwenyewe akimwita Bwana, anakuwaje tena mwana wake?

Kujiangalia waandishi.

Kwa kuwa watu wengi walipendezwa kumsikiliza,

³⁸akasema na kuwafundisha: Jiangalieni kwa ajili ya waandishi wanaotaka kutembea wenye kanzu ndefu na kuamkiwa na watu sokoni!

³⁹Namo nyumbani mwa kuombea hupenda viti vya mbele, hata wakialikwa chakulani hupenda kukaa penye wakuu.

⁴⁰Huzila nyumba za wajane wakijitendekeza, kama wanakaza kuwaombea. Walio hivyo mapatilizo yao yatakuwa kuliko ya wengine.

Hela la Mjane.

⁴¹*Akakaa na kuielekea sanduku ya vipaji, akatazama, watu wanavyotia mapesa katika sanduku ya vipaji. Wenye mali wengi wakatia mengi.[#2 Fal. 12:9-10.]

⁴²Akaja mwanamke mjane mmoja aliyekuwa mkiwa, akatia visenti viwili, pamoja ni hela moja.

⁴³Ndipo, alipowaita wanafunzi wake, akawaambia: Kweli nawaambiani: Huyu mjane mkiwa ametia mengi kuliko wote waliotia mapesa humu sandukuni mwenye vipaji.

⁴⁴Kwani wote walitoa mali katika mali zao nyingi, lakini huyu kwa ukiwa wake amevitoa vyote, alivyokuwa navyo, ndivyo vyote vilivyomlisha.*[#2 Kor. 8:12.]