Mambo yatakayokuja.

¹Alipotoka Patakatifu, mwanafunzi wake mmoja akamwambia: Mfunzi, yatazame mawe hayo makubwa na majengo hayo makubwa!

²Yesu akamwambia: Je? Wayatazama majengo haya makubwa? Halitaachwa hata jiwe moja juu ya jiwe lenziwe lisiloporomoshwa chini.

³Kisha alipokaa mlimani pa michekele kupaelekea Patakatifu, ndipo, Petero na Yakobo na Yohana na Anderea walipomwuliza walipokuwa peke yao wakisema:

⁴Tuambie, hayo yatakuwapo lini? Tena kielekezo ni nini, hayo yote yatakapotimia?

⁵Yesu akaanza kuwaambia: Angalieni, mtu asiwapoteze!

⁶Wengi watakuja kwa jina langu na kusema: Mimi ndiye,

⁷nao watapoteza wengi. Nanyi mtakaposikia vita na mavumi ya vita msivihangaikie! Hivyo sharti viwepo, lakini huo sio mwisho.

⁸Kwani watainukiana taifa na taifa, tena wafalme na wenzao wafalme. Mahali penginepengine patakuwa na matetemeko, pengine na njaa. Hayo ni mwanzo tu wa uchungu.[#2 Mambo 15:6; Yes. 19:2.]

⁹Lakini ninyi jiangalieni wenyewe! Watawapeleka barazani kwao wakuu namo nyumbani mwa kuombea, mpigwe, kisha mtasimamishwa kwa ajili yangu mbele ya mabwana wakubwa na mbele ya wafalme, mje mnishuhudie kwao.

¹⁰Nao Utume mwema sharti utangazwe kwanza kwa mataifa yote.[#Mar. 16:15.]

¹¹Napo hapo, watakapowatoa na kuwapeleka, msianze kuyahangaikia maneno ya kusema, ila maneno mtakayopewa saa ile yasemeni yaleyale! Kwani si ninyi mnaosema, ila ni Roho Mtakatifu.

¹²Itakuwa hivi: ndugu na ndugu watatoana, wauawe, hata baba watawatoa watoto wao, hata watoto watawainukia wazazi wao, wawaue.

¹³Nanyi mtakuwa mmechukiwa na watu wote kwa ajili ya Jina langu. Lakini atakayevumilia mpaka mwisho ndiye atakayeokoka.[#Yoh. 15:18,21.]

¹⁴Hapo ndipo, mtakapochafukwa mioyo mkiona, mwangamizaji atapishaye akisimama mahali pasipompasa; mwenye kupasoma hapa sharti aangalie, ajue maana! Siku zile watakaokuwako Yudea na wakimbilie milimani![#Dan. 9:27; 11:31; 12:4,10.]

¹⁵Mtu atakayekuwapo nyumbani juu asishuke na kuingia nyumbani mwake kuchukua kilichomo!

¹⁶Naye atakayekuwako shambani asiyarudie yaliyoko nyuma, aichukue nguo yake!

¹⁷Lakini watakaoona vibaya zaidi ndio wenye mimba na wenye kunyonyesha siku zile.

¹⁸Lakini ombeni, hayo yasitimie siku za kipupwe![#Dan. 12:1; Yoe. 2:2.]

¹⁹Kwani siku zile zitakuwa na maumivu makuu kuyapita yote yaliyopatikana tangu mwanzo wa viumbe, Mungu alivyoviumba, mpaka sasa, hata halafu hayatapatikana tena kama hayo.

²⁰Nazo siku zile kama Bwana hangalizipunguza, hangaliokoka mtu hata mmoja. Lakini kwa ajili ya wale, waliochaguliwa, aliowachagua, amezipunguza siku zile.

²¹Hapo mtu akiwaambia: Tazama, huyu hapa ni Kristo! au: Tazama, yule kule! msiitikie!

²²Watainuka makristo wa uwongo na wafumbuaji wa uwongo; nao watafanya vielekezo na vioja, wawapoteze waliochaguliwa, kama inawezekana.[#5 Mose 12:32; 13:1-3.]

²³Lakini ninyi angalieni! Nimetangulia kuwaambia yote.

²⁴Lakini siku zile, yale maumivu yatakapopita, jua litakuwa jeusi lenye giza, nao mwezi hautaumulikisha mwanga wake.[#Yes. 13:10.]

²⁵Nazo nyota zitakuwa zinaanguka toka mbinguni, nazo nguvu za mbingu zitatukutishwa.[#Yes. 34:4.]

²⁶Hapo ndipo, watakapomwona Mwana wa mtu, anavyokuja katika mawingu mwenye nguvu na utukufu mwingi.[#Dan. 7:13.]

²⁷Ndipo, atakapowatuma malaika, awakusanye waliochaguliwa naye toka pande zote nne, upepo unapotokea, aanzie mwanzoni kwa nchi, aufikishe mwisho wa mbingu.[#5 Mose 30:4; Zak. 2:6; Mat. 13:41.]

²⁸Jifundisheni mfano kwa mkuyu: matawi yake yanapochipua na kuchanua majani, mnatambua, ya kuwa siku za vuli ziko karibu.

²⁹Vivyo hivyo nanyi mtakapoyaona hayo, yakiwapo, tambueni, ya kuwa mwisho umewafikia milangoni!

³⁰Kweli nawaambiani: Kizazi hiki hakitakoma mpaka hapo, yatakapokuwapo hayo yote.

³¹Mbingu na nchi zitakoma, lakini maneno yangu hayatakoma.

³²Lakini ile siku au saa yake itakapofikia, mtu hapajui, wala malaika wa mbinguni, wala Mwana, ila Baba tu.

³³Angalieni! Kesheni! Kwani hamjui, siku zake zitakapokuwapo. Vinafanana na mtu mwenye kufunga safari aliyeiacha nyumba yake, akawapa watumishi wake nguvu akimgawia kila mtu kazi yake, naye mlinda mlango akamwagiza, akeshe.

³⁴Basi, hivyo kesheni! Kwani hamjui, mwenye nyumba atakaporudia, kama atakuja jioni au kati ya usiku au jogoo awikapo au mapema.[#Mat. 25:14; Luk. 19:12.]

³⁵Asije na kuwastusha akiwakuta, mmelala.[#Luk. 12:38.]

³⁶Hilo, ninalowaambia ninyi, nawaambia wote: Kesheni!