Kuhukumiwa.

¹Asubuhi kulipokucha, papo hapo watambikaji wakuu wakala njama pamoja na wazee na waandishi nao wote wa baraza ya wakuu wote, wakamfunga Yesu, wakampeleka, wakamtia mikononi mwa Pilato.

²Pilato alipomwuliza: Wewe ndiwe mfalme wa Wayuda? akamjibu akimwambia: Wewe unavyosema, ndivyo.

³Watambikaji wakuu walipomsuta mengi,

⁴Pilato akamwuliza tena: Hujibu neno? Tazama yote, wanayokusuta!

⁵Lakini Yesu hakujibu neno tena, ikawa, Pilato akastaajabu.[#Mar. 14:61; Yes. 53:7.]

⁶Kwa desturi ya sikukuu huwafungulia mfungwa mmoja, waliyemtaka.

⁷Kulikuwako mtu, jina lake Baraba, alifungwa pamoja na watu waliofunga kondo na kuua watu.

⁸Watu wengi walipokwenda bomani kwa kutaka, kwanza awafanyie, kama alivyozoea,

⁹Pilato akawajibu akisema: Mwataka, niwafungulie mfalme wa Wayuda?

¹⁰Kwani alitambua, ya kuwa watambikaji wakuu walikuwa wamemtoa kwa wivu.[#Mat. 21:36; Yoh. 11:48; 12:19.]

¹¹Lakini watambikaji wakuu wakalichochea hilo kundi la watu, sharti awafungulie Baraba.

¹²Pilato akajibu tena akiwaambia: Basi, nimfanyie nini huyu, mnayemwita mfalme wa Wayuda?

¹³Wakapiga kelele tena kwamba: Mwambe msalabani!

¹⁴Pilato alipowauliza: Ni kiovu gani alichokifanya? wakakaza kupiga makelele kwamba: Mwambe msalabani!

¹⁵Ndipo, Pilato, kwa kuwa alitaka kuyafanya yanayopendeza watu, alipowafungulia Baraba, lakini Yesu akamtoa, apigwe viboko, kisha awambwe msalabani.

Kilemba cha miiba.

¹⁶Nao askari wakampeleka, wakamwingiza uani mwa bomani, wakakiita kikosi chote cha askari, wakusanyike.

¹⁷Wakamvika nguo nyekundu, wakasuka kilemba cha miiba, wakamvika kichwani,

¹⁸wakaanza kumwamkia: Pongezi, mfalme wa Wayuda!

¹⁹Kisha wakampiga kichwani kwa mwanzi, wakamtemea mate, wakampigia magoti na kumwangukia.

²⁰Walipokwisha kumfyoza, wakamvua ile nguo nyekundu na kumvika nguo zake, wakampeleka nje, waje, wamwambe msalabani.

Kuwambwa msalabani.

²¹Wakakamata mtu aliyepiga akitoka shambani; ni Simoni wa Kirene, baba yao Alekisandro na Rufu, wakamshurutisha, amchukulie msalaba wake.[#Rom. 16:13.]

²²Wakampeleka mahali pa Golgota, maana yake ni kwamba: Fuvu la kichwa.

²³Wakampa mvinyo iliyochanganyika na manemane, lakini hakunywa.[#Sh. 69:22.]

²⁴Walipokwisha kumwamba msalabani, wakazigawanya nguo zake na kuzipigia kura, ndizo mtu achukue.[#Sh. 22:19.]

²⁵Lakini ilikuwa saa tatu, walipomwamba msalabani.

²⁶Juu yake kulikuwa na andiko la mashtaka yake la kwamba: MFALME WA WAYUDA.

²⁷Pamoja naye wakawamba misalabani wanyang'anyi wawili, mmoja kuumeni, mmoja kushotoni kwake.

²⁸Ndipo, lilipotimia lile neno la kwamba:

Akahesabiwa kuwa mwenzao wapotovu.

²⁹Waliopita wakamtukana, wakavitingisha vichwa vyao wakisema: Wewe unayelivunja Jumba la Mungu na kulijenga tena kwa siku tatu,[#Sh. 22:8; 109:25; Mar. 14:58.]

³⁰jiokoe mwenyewe, ushuke mtini!

³¹Vilevile nao watambikaji wakuu wakamfyoza pamoja na waandishi wakisema wao kwa wao: Wengine aliwaokoa, lakini mwenyewe hawezi kujiokoa.

³²Huyu Kristo, mfalme wa Waisiraeli, ashuke sasa hivi msalabani, tuvione, tupate kumtegemea! Hata wale waliowambwa misalabani pamoja naye wakamtukana.[#Mat. 16:1,4.]

Kufa.

³³Ilipokuwa saa sita, pakawa na giza katika nchi yote nzima mpaka saa tisa. Ilipokuwa saa tisa, Yesu akapaza sauti sana:

³⁴Eli, Eli, lama sabaktani? Maana yake ni kwamba: Mungu wangu, Mungu wangu, mbona umeniacha?[#Sh. 22:2.]

³⁵Wengine wao waliosimama hapo walipoyasikia wakasema: Tazama, anamwita Elia!

³⁶Mmoja akapiga mbio, akachovya mwani sikini, akautia katika utete, akamnywesha akisema: Acheni, tuone, kama Elia anakuja kumshusha!

³⁷Kisha Yesu akatoa sauti kubwa, nayo pumzi ikamtoka.

³⁸Ndipo, pazia la Jumbani mwa Mungu lilipopasuka toka juu mpaka chini, likawa vipande viwili.

³⁹Lakini bwana askari aliyesimama hapo na kumwelekea alipoona, pumzi ilivyomtoka, akasema: Kweli, mtu huyu alikuwa Mwana wa Mungu.

⁴⁰Palikuwako nao wanawake, walisimama mbali wakitazama. Kati yao walikuwapo Maria Magadalene na Maria, mama yao Yakobo mdogo na Yose, na Salome;[#Luk. 8:2-3.]

⁴¹ndio waliomfuata na kumtumikia yeye, alipokuwa huko Galilea. Palikuwako nao wengine wengi walipanda pamoja naye kwenda Yerusalemu.

Kuzikwa.

⁴²Ilipokwisha kuwa jioni, kwa sababu ilikuwa andalio, ndio siku ya kutangulia sikukuu,

⁴³akaja Yosefu wa Arimatia aliyekuwa mkuu mwenye macheo; naye mwenyewe alikuwa akiungoja ufalme wa Mungu. Akajipa moyo, akaingia kwa Pilato, akataka kupewa mwili wa Yesu.

⁴⁴Pilato akastaajabu aliposikia, ya kuwa amekwisha kufa, akamwita bwana askari, akamwuliza, kama amekwisha kufa.

⁴⁵Alipotambulishwa na bwana askari akampa Yosefu mwili wake.

⁴⁶Naye akanunua sanda, akamshusha msalabani, akamtia katika ile sanda, akamweka katika kaburi lililochongwa mwambani, akafingirisha jiwe mlangoni pa kaburi.

⁴⁷Nao akina Maria Magadalene na Maria, mama yake Yose, wakatazama, alipowekwa.