Mwenye kupooza.

¹Siku zilipopita, akaingia tena Kapernaumu. Watu waliposikia, ya kuwa yumo nyumbani,

²wakakusanyika wengi, wasienee mle nyumbani, wala mlangoni, akawaambia lile Neno.

³Kukaja watu waliomletea mgonjwa wa kupooza, akichukuliwa na watu wanne;

⁴wasipoweza kumpelekea yeye kwa ajili ya watu wengi wakafumua paa hapo, alipokuwapo. Walipokwisha kupatoboa wakakishusha kitanda, alichokilalia yule mgonjwa wa kupooza.

⁵Yesu alipoona, walivyomtegemea, akamwambia mwenye kupooza: Mwanangu, makosa yako yameondolewa.

⁶Mlikuwamo na waandishi waliokaa mlemle, wakawaza mioyoni mwao ya kwamba: Haya huyu anayasemaje? Anambeza Mungu

⁷Yuko nani awezaye kuondoa makosa? Siye Mungu peke yake?[#Sh. 51:6; 130:3-4; Yes. 43:25.]

⁸Kwa kutambua rohoni mwake, ya kuwa wanawaza hivyo mioyoni mwao, Yesu akawaambia: Mbona mnawaza hivyo mioyoni mwenu?

⁹Kilicho chepesi ni kipi? Kumwambia mwenye kupooza: Makosa yako yameondolewa! au kusema: Inuka, ukichukue kitanda chako, uende?

¹⁰Lakini kusudi mpate kujua, ya kuwa Mwana wa mtu ana nguvu ya kuondoa makosa nchini, akamwambia mwenye kupooza:

¹¹Nakuambia: Inuka, jitwishe kitanda chako, uende nyumbani kwako!

¹²Ndipo, alipoinuka, akajitwisha papo hapo kitanda, akatoka machoni pao wote. Kwa hiyo wote wakashangaa, wakamtukuza Mungu wakisema: Yaliyo kama hayo hatujayaona kamwe.

Lawi (Mateo) anaitwa.

¹³Alipotoka tena kwenda kandokando ya bahari, kundi lote la watu likamjia, akawafundisha.

¹⁴Kisha alipokuwa akitembea akamwona Lawi, mwana wa Alfeo, amekaa forodhani. Akamwambia: Nifuata! Akainuka, akamfuata.[#Yoh. 1:43.]

¹⁵Ikawa, alipokaa chakulani nyumbani mwake, ndipo, watoza kodi na wakosaji wengi walipokaa chakulani pamoja na Yesu na wanafunzi wake; kwani walikuwa wengi walipokaa chakulani pamoja na Yesu na wanafunzi wake; kwani walikuwa wengi waliomfuata.

¹⁶Waandishi wa Kifariseo walipomwona, ya kuwa anakula pamoja na wakosaji na watoza kodi, wakawaambia wanafunzi wake; Kumbe anakula pamoja na watoza kodi na wakosaji!

¹⁷Yesu alipoyasikia akawaambia: Walio wazima hawapaswi na mganga, ila walio wagonjwa. Sikujia kuwaita waongofu, ila wakosaji.

Kufunga.

¹⁸Wanafunzi wa Yohana na Mafariseo walikuwa wakifunga. Wakaja, wakamwambia: Kwa nini wanafunzi wa Yohana na wanafunzi wa Mafariseo hufunga, lakini wanafunzi wako hawafungi?

¹⁹Yesu akawaambia: Walioalikwa arusini hawawezi kufunga, bwana arusi akingali pamoja nao. Siku zote, wanapokuwa na bwana arusi, hawawezi kufunga.

²⁰Lakini siku zitakuja, watakapoondolewa bwana arusi; siku ile ndipo, watakapofunga.

²¹Hakuna mtu anayetia kiraka cha nguo mpya katika kanzu chakavu; kama anafanya hivyo, kile kiraka kipya kinaondoa pote paliposhonwa katika kanzu chakavu; hivyo tundu lake litakuwa kubwa zaidi.

²²Wala hakuna mtu anayetia mvinyo mpya katika viriba vichakavu; kwani akiitia mle, mvinyo itavipasua viriba, nayo mvinyo itaangamia pamoja na viriba. Ila mvinyo mpya hutiwa katika viriba vipya.

Kukonyoa masuke.

²³Akawa akipita katika mashamba siku ya mapumziko; nao wanafunzi wake wakaanza kuendelea njiani wakikonyoa masuke.

²⁴Lakini Mafariseo wakamwambia: Tazama! Mbona wanafanya siku ya mapumziko yaliyo mwiko?

²⁵Naye akawaambia: Hamjasoma bado, Dawidi alivyofanya alipokosa chakula, wakaona njaa yeye na wenziwe?

²⁶Hapo aliingia Nyumbani mwa Mungu kwa mtambikaji mkuu Abiatari, akaila mikate aliyowekewa Bwana, nayo kuila ni mwiko, huliwa na watambikaji tu; kisha akawapa nao wenziwe waliokuwa naye.[#3 Mose 24:9; 1 Sam. 21:6.]

²⁷Akawaambia: Siku ya mapumziko iliwekwa kwa ajili ya mtu; lakini mtu hakuwekwa kwa ajili ya siku ya mapumziko.[#5 Mose 5:11.]

²⁸Kwa hiyo Mwana wa mtu ni bwana hata wa siku ya mapumziko.