Mwenye kumiaga mbegu.

¹Akaanza tena kufundisha kandokando ya bahari. Wakamkusanyikia kundi la watu wengi mno; kwa hiyo akaingia chomboni, akakaa ufukoni, watu wote wakiwa pwani kandokando ya bahari.

²Akawafundisha maneno mengi kwa mifano, akawaambia katika mafunzo yake:

³Sikilizeni! Tazameni, mpanzi alitoka kumiaga mbegu.

⁴Ikawa, alipozimiaga, nyingine zikaangukia njiani; ndege wakaja, wakazila.

⁵Nyingine zikaangukia penye miamba pasipo na udongo mwingi. Kuota zikaota upesi kwa kuwa na udongo kidogo,

⁶lakini jua lilipokuwa kali, zikanyauka, kwa kuwa hazina mizizi.

⁷Nyingine zikaangukia penye miiba; nayo miiba ilipoota ikazisonga, zisizae.

⁸Nyingine zikaangukia penye mchanga mzuri, zikazaa zikikua na nguvu, zikatoa kama punje thelathini, hata sitini, hata mia.

⁹Akasema: Mwenye masikio yanayosikia na asikie!

¹⁰Naye alipokuwa peke yake, wafuasi wake pamoja na wale kumi na wawili wakamwuliza maana ya mifano.

¹¹Akawaambia: Ninyi mmepewa kulitambua fumbo la ufalme wa Mungu, lakini wale walioko nje huambiwa hayo yote kwa mifano,[#1 Kor. 5:12.]

¹²kusudi watazame, lakini wasione, wasikilize, lakini wasijue maana, wasije wakanigeukia, wakaondolewa makosa.[#Yes. 6:9-10.]

¹³Akawaambia: Msipoujua mfano huu mtaitambuaje mifano yote?

¹⁴Mwenye kumiaga analimiaga Neno.

¹⁵Lakini zilizoko njiani ndio hao: Neno linapomiagwa, wakiisha kulisikia, papo hapo Satani huja, akaliondoa Neno lililomiagwa mwao.

¹⁶Vilevile zilizomiagwa penye miamba ndio hao: wanapolisikia Neno, papo hapo hulipokea kwa furaha,

¹⁷lakini hawana mizizi mioyoni mwao, ila wanalishika kwa kitambo kidogo tu. Yanapotukia maumivu au mafukuzo kwa ajili ya Neno, mara hujikwaa.

¹⁸Nyingine ndizo zilizomiagwa penye miiba, ndio hao: wanalisikia Neno,

¹⁹lakini masumbuko ya dunia hii na udanganyifu wa mali na tamaa nyingine zikiwaingia hulisonga Neno, lisizae matunda.[#Mar. 10:23-24.]

²⁰Nazo zile zilizomiagwa penye mchanga mzuri ndio hao: wanalisikia Neno na kulipokea, kisha huzaa matunda, kama thelathini, hata sitini, hata mia.

Taa na kipimo.

²¹Akawauliza: Iko taa inayoletwa, iwekwe chini ya kapu au mvunguni mwa kitanda? Hailetwi, iwekwe juu ya mwango?[#Mat. 5:15-16.]

²²Kwani hakuna lililofichwa, isipokuwa kwamba lipate kufunuliwa halafu; wala hakuna njama, ila kwamba ipate kutokea waziwazi.[#Mat. 10:26-27; Luk. 12:2.]

²³Mtu akiwa na masikio yanayosikia na asikie!

²⁴Akawaambia: Mwangalie, jinsi mnavyosikia! Kipimo, mnachokipimia wengine, ndicho, mtakachopimiwa nanyi, tena mtaongezewa.[#Mat. 7:2.]

²⁵Kwani aliye na mali atapewa; lakini asiye na kitu atachukuliwa hata kile, alicho nacho.[#Mat. 13:12-13.]

²⁶*Akasema: Ufalme wa Mungu unakuwa hivyo, kama mtu anayemiaga mbegu katika nchi.

²⁷Kisha hulala na kuamka usiku na mchana, nazo mbegu humea na kukua, yeye asivijue, vilivyo.[#Yak. 5:7.]

²⁸Nchi huzaa yenyewe kwanza hutoa mimea, halafu suke, halafu ngano zinazojaa katika suke.

²⁹Lakini punje zinapopevuka, mwenyewe mara hutuma wenye miundu, kwani mavuno yamefika.*[#Yoe. 3:13.]

Kipunje cha haradali.

³⁰Akasema: Ufalme wa Mungu tuufananishe na nini? Au tuueleze kwa mfano gani?

³¹Umefanana na kipunje cha haradali. Kinapopandwa katika nchi ni kidogo kuliko mbegu zote zilizoko huku nchini.

³²Tena kikiisha pandwa hukua, kiwe mkubwa kuliko miboga yote kwa kuchipuza matawi makubwa, hata ndege wa angani huweza kuja na kutua katika kivuli chake.[#Ez. 17:23; 31:6; Dan. 4:9,18.]

³³Kwa mifano mingi inayofanana na huu akawaambia Neno, kama walivyoweza kusikia; lakini pasipo mfano hakuwaambia neno.

³⁴Lakini wanafunzi wake akawafungulia yote, walipokuwa peke yao.

Upepo wa baharini.

³⁵Siku ile ilipokuwa jioni, akawaambia: Tuvuke kwenda ng'ambo!

³⁶Wakaliacha kundi la watu, wakamchukua hivyo alivyokuwa chomboni; navyo vyombo vingine vilikuwa pamoja naye.

³⁷Kukawa na msukosuko mkubwa wa upepo, mawimbi yakakipigapiga chombo, hata chombo kikawa kinajaa maji.

³⁸Naye alikuwa chomboni upande wa nyuma, amelala usingizi juu ya mto. Ndipo, walipomwamsha wakimwambia: Mfunzi, huoni uchungu, tukiangamia?

³⁹Akainuka, akaukaripia upepo, akaiambia bahari: Nyamaza, utulie! Papo haupepo ukakoma, kukawa kimya kabisa.

⁴⁰Kisha akawaambia: Mbona mnaogopa hivyo? Mbona hamnitegemei?

⁴¹Wakaingiwa na woga mkubwa, wakasemezana wao kwa wao: Ni mtu gani huyu, ya kuwa hata upepo na bahari zinamtii?