Mgerasi mwenye pepo.

¹Wakafika ng'ambo ya bahari katika nchi ya Wagerasi.

²Alipotoka chomboni papo hapo akakutana na mtu mwenye pepo mchafu aliyetoka penye makaburi.

³Kwa kuwa hukaa pale penye makaburi, hakuwako mtu aliyeweza kumfunga kwa mnyororo wo wote.

⁴Kwani alikuwa amefungwa mara nyingi kwa mapingu na kwa minyororo, lakini minyororo ikararuliwa naye, nayo mapingu yakasagwa naye, mpaka yakikatika, kwa hiyo hakukuwako kabisa mtu mwenye nguvu za kumshinda.

⁵Siku zote mchana kutwa alikuwa penye makaburi nako milimani akipiga makelele na kujipigapiga mawe mwenyewe.

⁶Alipomwona Yesu, yuko mbali bado, akapiga mbio, akaja, akamwangukia,

⁷akapaza sana sauti akisema: Tuko na jambo gani mimi na wewe Yesu, Mwana wa Mungu Alioko huko juu? Nakuapisha kwa Mungu, usiniumize![#Mar. 1:24.]

⁸Kwani alikuwa amemwambia: Wee pepo mchafu, umtoke mtu huyu!

⁹Alipomwuliza: Jina lako nani? akamwambia: Jina langu mimi Maelfu, kwa kuwa tumo wengi.

¹⁰Akambembeleza sana, asiwafukuze, waitoke nchi ile.

¹¹Basi, kulikuwako kule mlimani kundi kubwa la nguruwe waliokuwako malishoni.

¹²Wakambembeleza wakisema: Tutume kwenda kwao wale nguruwe, tupate kuwaingia!

¹³Alipowapa ruhusa, pepo wachafu wakamtoka, wakawaingia nguruwe; ndipo, kundi lilipotelemka mbio mwambani, wakaingia baharini, wapata kama 2000, wakatoswa baharini.

¹⁴Lakini wachungaji wao wakakimbia, wakayatangaza mjini na mashambani. Watu wakaja, watazame, lililofanyika lilivyo.

¹⁵Walipofika kwa Yesu na kumtazama yule mtu aliyekuwa amepagawa na pepo mchafu wa Maelfu, anavyokaa amevaa nguo, tena ana akili zake, wakashikwa na woga.

¹⁶Nao walioyaona wakawasimulia, ya mwenye pepo yalivyoendelea, hata yale ya nguruwe.

¹⁷Wakaanza kumbembeleza, atoke mipakani kwao.

¹⁸Alipojipakia chomboni, yule mtu aliyekuwa amepagawa na pepo akambembeleza, afuatane pamoja naye.

¹⁹Lakini hakumwitikia, ila akamwambia: Uende zako nyumbani mwako kwa ndugu zako ukawasimulie yote, Bwana aliyokutendea kwa kukuhurumia!

²⁰Ndipo, alipokwenda zake, akaanza kuyatangaza katika ile Miji Kumi yote, Yesu aliyomtendea; watu wote wakastaajabu.[#Mar. 7:31.]

Binti Yairo.

²¹Yesu alipokwisha vuka tena chomboni kuja ng'ambo, kundi la watu wengi likakusanyika hapo, alipokuwa kandokando ya bahari.

²²Akaja mmoja wao majumbe wa nyumba ya kuombea, jina lake Yairo; alipomwona akamwangukia miguuni pake,

²³akambembeleza sana akisema: Kibinti changu yumo kufani; nakuomba, uje, umbandikie mikono, apate kupona na kuwa mzima tena.[#Mar. 7:32.]

²⁴Akaondoka, akaenda naye; watu wengi sana wakamfuata wakimsongasonga.

²⁵Kukawa na mwanamke mwenye ugonjwa wa kutoka damu miaka 12.

²⁶Huyo alikuwa amepata maumivu mengi kwa waganga wengi; hivyo alizimaliza mali zake zote, lakini hawakumfaa hata kidogo, ugonjwa wake ukakaza tu kuwa mbaya.

²⁷Alipoyasikia mambo ya Yesu akaliingia kundi la watu, akamjia nyuma, akaigusa nguo yake.

²⁸Maana alisema: Hata nikizigusa nguo zake tu nitapona.

²⁹Papo hapo kijitojito cha damu yake kikakauka, akajiona mwilini, ya kuwa amelipona teso lake.

³⁰Papo hapo Yesu akatambua mwilini mwake, ya kuwa nguvu imemtoka; akaligeukia kundi la watu, akasema: Yuko nani aliyenigusa nguo zangu?[#Luk. 6:19.]

³¹Wanafunzi wake wakamwambia: Unaliona kundi la watu, linakusongasonga, nawe unauliza: Yuko nani aliyenigusa?

³²Alipotazama huko na huko, apate kumwona aliyemgusa,

³³yule mwanamke akashikwa na woga, akatetemeka, kwani alijua lililompata; kwa hiyo akaja, akamwangukia, akamwambia yote, yalivyokuwa kweli.

³⁴Naye akamwambia: Mwanangu, kunitegemea kwako kumekuponya, nenda na kutengemana, uwe mzima, teso lako lisikurudie tena!

³⁵Angali akisema, wakaja watu wa jumbe wa nyumba ya kuombea, wakasema: Binti yako amekwisha kufa; mfunzi unamsumbulia nini tena?

³⁶Yesu alipoyasikia maneno haya, yakisemwa, akamwambia jumbe wa nyumba ya kuombea: Usiogope, nitegemea tu!

³⁷kisha hakumpa mtu mwingine ruhusa kufuatana naye, ila Petero na Yakobo na Yohana, nduguye Yakobo.

³⁸Walipoingia nyumbani mwa jumbe wa nyumba ya kuombea, akaona makelele ya watu, wakilia na kuomboleza sana.

³⁹Akaingia, akawaambia: Mnapigia nini makelele na kulia? Kitoto hakufa, ila amelala usingizi tu;[#Yoh. 11:11.]

⁴⁰ndipo, walipomcheka sana. Lakini alipokwisha kuwafukuza wote akamchukua baba ya kitoto na mama yake na wale waliokuwa pamoja naye, akaingia mle, yule kitoto alimokuwa.

⁴¹Akamshika kitoto mkono, akamwambia: Talita kumi! ni kwamba: Kijana, nakuambia: Inuka![#Luk. 7:14.]

⁴²Papo hapo kijana akafufuka, akaendaenda, kwani alikuwa wa miaka 12. Ndipo, waliposhangaa ushangao mwingi.

⁴³Akawakataza sana, wasilitambulishe neno hili kwa mtu ye yote; kisha akasema, kijana apewe chakula.[#Mar. 1:44.]