Yesu mjini mwa Nasareti.

¹Akatoka kule, akaenda kwao, alikokulia, nao wanafunzi wake wakamfuata.

²Ilipokuwa siku ya mapumziko, akaanza kufundisha katika nyumba ya kuombea, nao wengi waliomsikia wakashangaa, wakasema: Huyu haya ameyapata wapi? Werevu huu ulio wa kweli amepewa na nani? Hizo nguvu nazo zinazotendwa na mikono yake ni nguvu gani?[#Yoh. 7:15.]

³Huyu si seremala, mwana wa Maria? Huyu si ndugu yao Yakobo na Yose na Yuda na Simoni? Nao maumbu zake hawako huku kwetu? Wakajikwaa kwake.

⁴Yesu akawaambia: Mfumbuaji habezwi, isipokuwa kwao, alikokulia, na kwa ndugu zake namo nyumbani mwake.

⁵Kwa hiyo hakuweza kufanya kule la nguvu hata moja, ila wanyonge wachache akawabandikia mikono, akawaponya.[#Mar. 6:13.]

⁶Akastaajabu, jinsi walivyokataa kumtegemea.

Kuwatuma mitume.

⁷Akaenda akizunguka katika vijiji vya pembenipembeni na kufundisha watu. Akawaita wale kumi na wawili, akaanza kuwatuma wawiliwawili, akawapa nguvu za kufukuza pepo wachafu.[#Luk. 10:1.]

⁸Akawaagiza, washike fimbo tu, wasichukue kingine cha njiani, wala chakula wala mkoba wala senti mishipini.

⁹Mwende mmevaa viatu, lakini msivae nguo mbili!

¹⁰Akawaambia: Kila mtakamoingia nyumbani, kaeni mwake, mpaka mtakapotoka tena!

¹¹Napo mahali, wasipowapokea, wasiwasikilize, basi, tokeni pale na kuyakung'uta mavumbi yaliyoishika miguu yenu, yaje yanishuhudie kwao!

¹²Kisha wakatoka, wakaenda na kutangaza, watu wajute.

¹³Wakafukuza pepo wengi, wakapaka wanyonge wengi mafuta, wakawaponya.[#Yak. 5:14-15.]

Kufa kwa Yohana.

¹⁴Mfalme Herode akayasikia, kwani Jina lake lilivuma, maana watu walisema: Yohana Mbatizaji amefufuka katika wafu, kwa sababu hii nguvu hizo humtendesha kazi.

¹⁵Lakini wengine walisema: Ndiye Elia; wengine tena walisema: Ni mfumbuaji kama wale wafumbuaji wenzake.

¹⁶Lakini Herode alipoyasikia akasema: Ndiye Yohana, niliyemkata kichwa mimi, huyo amefufuka.

¹⁷Kwani Herode mwenyewe alikuwa ametuma kumkamata Yohana na kumfunga kifungoni kwa ajili ya Herodia, mke wa nduguye, Filipo, ambaye alikuwa amemwoa.

¹⁸Kwani Yohana alimwambia Herode: Ni mwiko kwako kuwa na mke wa nduguyo.[#3 Mose 18:16.]

¹⁹Lakini Herodia alimvizia, akataka kumwua, asiweze.

²⁰Kwani Herode alimwogopa Yohana, kwa vile, alivyomjua kuwa mtu mwongofu na mtakatifu, akamshika na kumlinda. Naye alipomsikia mara kwa mara akahangaishwa sana moyoni, tena akapendezwa kumsikiliza.

²¹Siku iliyofaa ya kumpata ilikuwa sikukuu ya kuzaliwa kwake Herode; ndipo, alipowaalika chakulani watawala miji yake na wakubwa wa askari na watu wenye cheo wa Galilea.

²²Binti Herodia alipoingia na kucheza ngoma, akampendeza Herode na wale waliokaa pamoja naye chakulani. Ndipo, mfalme alipomwambia huyo msichana:

²³Niombe kila, utakacho! nitakupa; kisha akamwapia: Cho chote, utakachoniomba, nitakupa, ijapo iwe nusu ya ufalme wangu.[#Est. 5:3,6.]

²⁴Yule akatoka, akamwuliza mama yake: Niombe nini? Naye akasema: Kichwa chake Yohana Mbatizaji!

²⁵Papo hapo akaingia mbio kwa mfalme, akaomba akisema: Nataka, unipe sasa hivi katika chano kichwa chake Yohana Mbatizaji.

²⁶Mfalme akasikitika sana, lakini kwa ajili ya viapo vyake na kwa ajili ya wale waliokaa chakulani hakutaka kumnyima.

²⁷Ndipo, mfalme alipotuma askari, akamwagiza, akilete kile kichwa chake.

²⁸Yule akaenda, akamkata kichwa chake mle kifungoni, kisha akakileta katika chano, akampa msichana, naye msichana akampa mama yake.

²⁹Wanafunzi wake walipoyasikia wakaja, wakautwaa mwili wake, wakauweka kaburini.

Kurudi kwao mitume.

³⁰Nao mitume wakakusanyika kwa Yesu, wakamsimulia mambo yote, waliyoyafanya nayo waliyoyafundisha.[#Luk. 9:10; 10:17.]

³¹Akawaambia: Njoni ninyi peke yenu, twende mahali pasipo na watu, mpumzike kidogo! Kwani watu wengi walikuwa wakija, tena wakienda, wasipate hata kula.

³²Wakaondoka, wakaenda chomboni peke yao mahali palipokuwa pasipo watu.

³³Watu walipowaona, wakitoka, nao wengi walipotambua, wanapokwenda, wakatoka miji yote kwa miguu, wakapiga mbio kuwakuta palepale, wakatangulia kufika.

³⁴Alipotoka chomboni akaona, watu ni wengi sana, akawaonea uchungu, kwani walikuwa kama kondoo wasio na mchungaji, akaanza kuwafundisha mengi.[#Mat. 9:36; 4 Mose 27:17; Ez. 34:5.]

Kulisha watu 5000.

³⁵Saa zilipofika za jioni, wanafunzi wake wakamjia, wakasema: Hapa tulipo ni nyika, nazo saa zimefika za jioni.[#Mar. 8:1-9.]

³⁶Uwaage watu, waende zao mashambani na vijijini huko pembenipembeni, wajinunulie vyakula!

³⁷Lakini akawajibu akiwaambia: Wapeni ninyi vyakula! Wakamwambia: Twende, tununue mikate ya shilingi 200, tuwape, wale?

³⁸Akawauliza: Mnayo mikate mingapi? Haya! Nendeni, mtazame! Walipoijua wakasema: Mitano, tena visamaki viwili.

³⁹Akawaagiza wote, wakae mafungumafungu uwandani penye majani.

⁴⁰Wakakaa kikao kwa kikao, pengine mia, pengine hamsini.

⁴¹Akaitwaa ile mikate mitano na vile visamaki viwili, akatazama juu mbinguni, akaviombea, akawamegeamegea ile mikate, akawapa wanafunzi, wawapangie; navyo vile visamaki viwili akawagawia wote.[#Mar. 7:34.]

⁴²Wakala wote, wakashiba.

⁴³Kisha wakaokota makombo ya mikate wakajaza vikapu kumi na viwili pamoja na vipande vya samaki.[#5 Mose 28:5.]

⁴⁴Nao waliokula ile mikate walikuwa 5000 waume tu.

Kwenda juu ya bahari.

⁴⁵Papo hapo akawashurutisha wanafunzi wake, waingie chomboni, wamtangulie kwenda ng'ambo huko Beti-Saida, mpaka yeye kwanza aliage kundi la watu.

⁴⁶Naye alipokwisha kuwaaga akaondoka kwenda mlimani kuomba.

⁴⁷Jua lilipokwisha kuchwa, chombo kilikuwa katikati ya bahari, naye mwenyewe alikuwa peke yake pwani.

⁴⁸Akawaona, wakihangaishwa, wasiweze kwendelea, kwani upepo uliwatokea mbele. Ilipofika zamu ya nne ya usiku, akawajia akienda juu ya bahari, akataka kuwapita.

⁴⁹Nao walipomwona, anavyokwenda juu ya bahari, wakawaza kuwa ni mzimu, wakapiga makelele,

⁵⁰kwani wote walimwona, wakatetemeka. Papo hapo yeye akasema nao akawaambia: Tulieni! Ni miye, msiogope!

⁵¹Alipowapandia chomboni, upepo ukakoma. Ndipo, walipostuka na kushangaa mno mioyoni mwao;[#Mar. 4:39.]

⁵²kwani hawajaelewa maana ya ile mikate, mioyo yao nayo ilikuwa imeshupaa.

⁵³Walipokwisha vuka wakafika nchini kwa Genesareti, wakatia nanga hapo.

⁵⁴Nao walipotoka chomboni, papo hapo watu wakamtambua;

⁵⁵wakaenda mbio wakiizunguka nchi ile yote, wakaanza kuwachukua vitandani waliokuwa hawawezi, wakaenda nao huko na huko, walikomsikia, ya kuwa yeye yuko.

⁵⁶Kila alipoingia katika vijiji au miji au mashamba waliwaweka wagonjwa sokoni, wakambembeleza, wamguse pindo la lanzu yake tu; nao wote walioligusa wakapona.[#Mar. 5:27-28; Tume. 5:15; 19:11-12.]