Kuwashinda Mafariseo.

¹Wakamkusanyikia Mafariseo na wengine waliokuwa waandishi waliotoka Yerusalemu.

²Wakaona wanafunzi wake, wanavyokula vyakula kwa mikono hivyo ilivyo, maana haikunawiwa.[#Luk. 11:38.]

³Kwani Mafariseo na Wayuda wote hawali, wasiponawa mikono na kuikamua; huku ni kuyashika mazoezo ya wakale.

⁴Navyo vya sokoni hawavili, wasipoviosha kwanza; nayo mambo mengine mengi yako, waliyoyapokea kuyashika, kama kuosha vinyweo na mitungi na vyungu na vitanda.

⁵Mafariseo na waandishi walipomwuliza: Kwa sababu gani wanafunzi wako hawaendi na kuyafuata mazoezo ya wakale, ila hula chakula kwa mikono hivyo ilivyo?

⁶akawaambia: Yesaya aliyafumbua vizuri hayo mambo yenu, ninyi wajanja, kama yalivyoandikwa kwamba:

Ukoo huu huniheshimu kwa midomo tu,

lakini mioyo yao inanikalia mbali.

⁷Hivyo hunicha bure,

kwani hufundisha mafundisho yaliyo maagizo ya watu tu.

⁸Mnaliacha agizo lake Mungu, myashike mazoezo ya watu.

⁹Akawaambia: Vizuri vyenu ni kulitengua agizo lake Mungu, mpate kuyaangalia mazoezo ya wakale wenu.

¹⁰Kwani Mose alisema: Mheshimu baba yako na mama yako! na tena: Atakayemwapiza baba au mama sharti afe kwa kuuawa![#2 Mose 20:12; 21:17; 5 Mose 5:16.]

¹¹Lakini ninyi husema: Mtu akimwambia baba au mama: Korbani, ni kwamba: Mali, unazozitaka, nikusaidie nazo, amepewa Mungu, basi, ni vema.

¹²Hivyo mnamzuia mtu huyo, asimpatie baba wala mama kitu;

¹³hivyo mnalitangua Neno la Mungu kwa ajili ya mazoezo, mliyozoezwa na wakale wenu. Tena mnafanya mengi yanayofanana na hayo.

¹⁴Akaliita tena kundi la watu, akawaambia: Nisikilizeni nyote, mjue maana!

¹⁵Hakuna kitu kilichoko nje ya mtu kinachoweza kumtia uchafu kikiingia ndani yake; ila yanayomtoka mtu ndiyo yanayomtia uchafu.[#Tume. 10:14-15.]

¹⁶Kama yuko mwenye masikio yanayosikia na asikie!

¹⁷Kisha alipoondoka penye watu na kuingia nyumbani, wanafunzi wake wakamwuliza mfano ule.

¹⁸Akawaambia: Kumbe nanyi hamjaerevuka hata leo! Hamjui, kila kitu kilichoko nje kikiingia ndani ya mtu hakiwezi kumtia uchafu?

¹⁹Kwa kuwa hakimwingii moyoni, ila tumboni tu, kikatoka chooni; ndivyo, alivyotengua miiko yote ya vyakula.

²⁰Akasema: Linalomtoka mtu hilo ndilo linalomtia mtu uchafu.

²¹Kwani ndani mioyoni mwa watu hutoka mawazo mabaya: ugoni, wizi, uuaji,

²²uzinzi, choyo, ubaya, unyengaji, uasherati, kijicho, matusi, majivuno, upuzi.

²³Mabaya haya yote hutoka ndani, tena ndiyo yanayomtia mtu uchafu.

Mwanamke wa Kikanaani.

²⁴Alipoondoka pale, akaenda mipakani kwa Tiro, akaingia nyumbani, maana alitaka, asijulikane na mtu, lakini hakuweza kufichika.

²⁵Kwani papo hapo mwanamke alisikia, ya kuwa yuko. Kwa kuwa na mtoto mwenye pepo mchafu akaja, akamwangukia miguuni pake;

²⁶naye yule mwanamke alikuwa Mgriki, kabila lake ni Msirofoniki. Alipomwomba, amfukuze pepo, amtoke binti yake,

²⁷akamwambia: Uache, kwanza watoto washibe, kwani haifai kuchukua chakula cha watoto na kuwatupia vijibwa!

²⁸Lakini akamjibu akisema: Ndio, Bwana, lakini nao vijibwa hula chini ya meza makombo ya vitoto.

²⁹Ndipo, alipomwambia: Kwa ajili ya neno hili enenda, pepo amemtoka binti yako!

³⁰Akaondoka, akaenda nyumbani mwake, akamkuta kitoto, amelala kitandani, naye pepo alikuwa amekwisha kumtoka.

Kiziwi na bubu.

³¹*Alipotoka tena mipakani kwa Tiro akapita Sidoni, akafika kwenye bahari ya Galilea katikati ya mipaka ya ile Miji Kumi.[#Mat. 15:29-31.]

³²Wakamletea mtu aliyekuwa kiziwi na bubu, wakambembeleza, ambandikie mkono.[#Mar. 5:23.]

³³Akamwondoa katika kundi la watu, wawe peke yao, akaweka vidole vyake masikioni mwake, akatema mate, akamgusa ulimi.[#Mar. 8:23.]

³⁴Kisha akatazama juu mbinguni, akapiga kite, akamwambia: Efata! ni kwamba: Fumbuka![#Mar. 6:41; Yoh. 11:41.]

³⁵Ndipo, masikio yake yalipofumbuka, nayo mafungo ya ulimi wake yakalegea papo hapo, akasema vema.

³⁶Akawaagiza, wasimwambie mtu. Lakini ijapo awaagize hivyo, wale walizidi kuyatangaza po pote.[#Mar. 1:43-44.]

³⁷Watu wakashangaa mno, wakasema: Ametenda vyote vizuri; viziwi anawafanya, wasikie, nao mabubu, waseme.*